याम्बु । गैर आवासीय नेपाली संघ (ल्च्ल्ब्) पोर्तुगलला ह्रोचोहोरि पोर्तुगलला चर्चित छोङ्नाम पेमा डोमा शेर्पासे दाबी लाबा मुला । एनआरएनए पोर्तुुगलला चुनाव ८ जुन २०२५ कुनु ताबाकेन मुला । 

पेमा डोमा शेर्पासे ह्रोचोहोरि रेसेला घोषणा लामाहेन्से दाते ह्रोला चर्चा पोर्तुगलला लिस्बोनला चिया छोङ्खाङ हेन्से ग्रेन बजार दोना चर्चाला नुर दोबा मुला ।

डोमा शेर्पासे चु ङ्हाच्छा शेर्पा किदुक, पोर्तुगलला ग्रेनगाउराइ दोसिमाम ज्याबा गेडिक्ना लाबा मुला ।

सोलुखुम्बु जोङ्ला दूधकुण्ड नगरपालिका–२ रि केबा पेमा डोमा शेर्पा तिगाइ दिङहेन्से पार्तुगलला राजधानी लिस्बोनरि रेस्टुरेन्ट छोङ्नाम लासि खाबा मुला ।

‘खाम्दे क्योङ्दा ह्रोलाइ बिबा सेम थोबा’ पेमा डोमा शेर्पा दातेदोना जामेकोला ग्याम नेतृत्व लासि ह्रोचोहो पदला लागि उम्मेदवारी पिन्बा गिक्छा शेर्पा जामेकोला दोबारि सफल ताबा मुला ।

उम्मेदबारी घोषणा लामाहेन्से थेसे बिबा मुला, ‘चु उम्मेदबारी ङाला जेक्खे आहिन, मुतेबा शेर्पा जामेकोलाला उम्मेदवारी हिन्ना । ज्योमोलुङमाला जोङ ताबा नातासे मुतेबा शेर्पाला थोबो ज्योमोलुङमा तेबान नोना थान्बा ङाला सेम मुला ।’

पेमा डोमा शेर्पाला उम्मेदवारीसे पार्तुगलरि मुबा नेपाली समुदायरि छार उत्साह थेन सकारात्मक चर्चा बाबा म्राङ्मुला । खाबा निर्वाचनरि थेसे डासेला पक्का ह्राङ्बान ताबा मुला ।

नेपालरि मुमा शेर्पासे नुवाकोटरि ‘काउले इभ नेपाल’ गार्मेन्ट प्रोजेक्ट स्याङ्बा मुबा बिसाम फ्रेन्च बैंक्वुट होटलरि दिङ ङ्ही म्यानेजर दोेसि गेलाबा मुबा ।

सन् २०१९ हेन्से ह्राङ्लान टे«किङ कम्पनी फ्रेण्डशीप अल्टरनेटिभ नेपाल एण्ड केएफ ट्राभल्स संचालन लाबा मुबा बिसाम एनजीओरि नोन ह्रेङ्बा दुइ दोना गेलाबा अनुभव मुला ।

छोङ्नामरि जेक्खेन आहिन ह्रोतेन सामाजिक गेन्दुनजुगु संचालन लाबा ज्याबा अनुभव नोन मुला । शेर्पा किदुप पोर्तुगलरि गेलामा ह्रोदा मोक्कोनसे सेमरि थान्बा मुबा ।

(छिगला अर्थः छोङ्नाम– व्यवसायी, छोङ्खाङ– पसल, नुर– विषय, गेडिक्ना– कार्यसम्पादन)