पाराङस्यासे समुन्द्र गि क्राजिन्बा मुला । 
थेला मिख्लिला चाचा
कर्णालीग्याम पुइसि
सिंहदरबारदोना बाबा मुला 
खच्चडजुगुसे ।

मुबाम दाते थेला नाम्सारि नोन मुला
सिंहदरबार । 
थेतेन मुस्कानला वान मुला 
विश्वास आरेबिसाम तिर्याम च्यापिन्गो
एदा नोन सेल्फी किन्बारि हतार तासेला मुला ।

पाराङस्या संघर्षला फुल प्याकेज नोन हिन्ना
थेसे स्हुला गणित डोला 
ताङ्बाला ग्योइ लोप्ला । 
थेतेन याफ्लाला पुल लेङ्बा मुला
विश्वास आरे बिसिमाम तिर्याम ङ्यान्सि च्यागो
थेला दिग्याम ब्योङ्चिमुला टुला पिङ स्योङ । 
थेतेन जिम्मेवारीला पाण्डुलिपी मुला
विश्वास आरे बिसाम तिर्याम डोसि च्यागो
एला मिनाङ स्क्रोलिङ तासेला मुला हिगिकादे । 
थेदुइरि पाराङस्याला मिख्लि ग्लुबारि 
खामुबा योद्धा गि
तिनि नोन थे हिक्कुजुगुला चाम क्रेसि
आनन्द म्हाइचिबा मुला । 
थेदुइरि मुस्कानला वान कोर्बारि 
खामुबा याखारगि भमरा
तिनि नोन थे म्हेन्दोला थोबो क्रेसि
स्याचिबा मुला अस्वभाविक स्याबा ।  
थेदुइरि याफ्ला स्याम्सि
निबा मुबा चौबीर क्यारेटला हिराकादे
थे तिनि सामन्तीला ह्यो जुम्बिरि डुङ्चिबा मुला । 
गुङ गुङरि कादे खाजि
कादे निजि
एनजिओ केवा
थे समवेदना ज्योर्सि
पाराङस्यादा रोबर्ट स्होबा सेमरि मुबा । 
चोदे दुइदोना लेङ्बा मुबा पाराङस्यातेन
जेक्खे कुन्दुरनाङ बु । 
थेनोन थोसि फिरग्याप ह्युल निजि थे । 
दार्से थे आछ्योबा म्हाङजुगु
च्याचिला
मेट्रो स्टेशनला ब्लाक्पा ऐनाकादेरि । 

(छिगला अर्थः पाराङस्या– माइली, वान– बगैंचा, स्हु– दुःख, लोप्ला– सिकाउँछ, डोला– पढाउँछ, केवा– जीवन)

(चु व्हाइखा ‘बहिष्कृत आवाज’ व्हाइखा पोप ग्याम किन्सि दोःबा हिन्ना । दोःबा : यकिना अगाध)