ह्युल ब्लुम्चिबा मुला
तासाइ,
नाकिजुगु सत्तारि मुला
थेकादे न्हा चुला देन्बाला लागि
न्हा ख्राप्ला अन्याय म्राङ्सि
ह्राङ्लान दोप्ताला काङफ्ला ल्हेम्बारि
तयार मुला सातान स्योन्दोलोङ तासि ।
चुनाव खामा मे ह्योङ्सिकेन बिला–
‘ङानि ह्युल्बाला सेवक हिन्ना !’
डासि निजिन्माहेन्से पोसतिला
ह्राङ्लान भरौटे थेन ङेङ्गोरजुगु ।
सडकरि म्हि सिला
ख्रेन्बासे, गरिबीसे, न्याय आयाङ्बासे
तासाइ थे नाकिजुगु
संसद भवन थेन सिंहदरबार न्हाङरि
दिनि दुसिमाम म्हेर्चिबा मुला ।
खाइमा छेला थेनि गिसेम गि
ह्युल विकास थेन ह्युल्बाला बारे डान्सि आहिन
‘नाख्रु खाल्से चाबा ?’ बिबा माजिङ्बारि ।
ह्युल बर्बाद ताजि बिसि चिन्ता आरे थेन्दा
तिल्दाबिसाम,
नाकिजुगु ह्युलला रक्षक आहिन
थेनिम जेक्खे
दोप्दा पोबा बानी ल्हागतिबा कुर्सीपन्थी प्राणी हिन्ना ।
ङ्यान्गो ओइ छारिब्योनकादे... !
दारे दुइ खाबा मुला
चु नाकिकादेदा ह्याङ्से ताप्दोला
सिंह ह्राङ् ङ्हार्सि
तिल्दासिबाम,
चु ह्युल जनावरकादेला ग्ला आहिन
ह्याङ्ला पुर्खाला कासे स्होबा दिम हिन्ना
ह्याङ्ला लिउला दानः हिन्ना ।
दातेः टोकियो, जापान ।
(छिगला अर्थः ब्लुम्बा– डुब्नु, देन्बा– साँचो, दोप्ता– मालिक, लिउ– भविष्य, दानः– आधार)
दोःबा : यकिना अगाध
तपाईको प्रतिक्रिया दिनुहोस