युद्धला ताङ जिन्बा मुला
दारे सीमाला सेना चुर्से दोबा मुला
खानाङ मुला ङाला लोप्खाङ–कलेज, नाम्सा–दिम, ह्रि–पहाड
दाते खाल्से ताकतिचिमुला
चरा–चुरुंगीला मिरि निशाना ? 
चु दुइ खतरनाक मुला ङ्योइबारि
ओम ताचिबा तामरि आक्रोश उन्बारि
तिल्दाबिसाम टुबाकला गिक्छा गे ताला
ङ्योइबा म्हिला ल्हेफिरि निशाना ताकतिबा 
दाते थुम्बाकेन मुला
ताम लाबा थेन ङ्यान्बा परम्परा 
दारे सेनाला दक्षता बिबान
नाम्सा थेन ह्रिफिरि गोली छेप्बा
ओम ङ्योइबा लोप्बोनजुगुफिरि काडि छेप्बा 
चु स्यान्दो तोसोला युद्ध हिन्ना
खानाङ सम्भव मुला–
नाम्सारि ल्हानान म्हि फोइदानसे सिचिमुला
किसानसे आत्महत्या लाचिमुला 
ओम सहररि गाङ्साल म्हिसे–
ल्हानान चासि, फो बोना लासि
ह्राङ्लान ल्हुइला दोइ ताआखाम्ना
तिरेकुनु ह्योङ्सिकेन गुर्सि
ह्राङ्ला ल्हुइला दोइरि ङ्हेप्सि सिचिमुला
खाजिबाइ युद्धरि बम फोसि
सहर म्युगुम्युगु तासि आहिन
चुमि विकास लासिकेन
मंगलग्रह दोबा राप हिन्ना
चु विकासरि लेङ्बा आरे
ह्रि–पहाड
नैसर्गिक बु बुन्बा चाङ्मा लाबा 
ओम म्हि म्हाइचिबा मुला–
खानाङ मुला चाङ्मा क्युइ ? 
खाजिबाइ युद्ध आतागाइ 
तासाइ नोन सेनामि चिसेला मुला
ओम तिगा लासेओम स्ह्यान्दो थेसे ?
थेन्छे क्याम्प स्होबा मिनरि 
ह्रि थानथान ताना लासेला मुला
ह्रिजन्तु सुरक्षाला मिनरि 
नाम्सा ल्हेसि सहररिक्यार ताप्सेला मुला
ओम सहररि ङ्योइबा
नाम्साला बिजाबुमोफिरि गोली छेप्सेला मुला
आहिन्साम तिल्दा ओम
सीमाला सेना चुर्से खाबा ? 
खानाङ मुला ङाला लोप्खाङ–कलेज, नाम्सा–दिम, ह्रि–पहाड ।
(छावनीजुगु लिब्रो छत्तीसगढ, दन्तेवाडारि लडप ताचिबा म्हिजुगुदा समर्पित)
(छिगला अर्थः ङ्योइबा– प्रश्न, लोप्बोन– विद्यार्थी, ङ्हेप्बा– चेपिनु, बु– श्वास, चाङ्मा– शुद्ध, बिजाबुमो– बालबालिका, ताङ– चरण)

दोःबा : यकिना अगाध