(दोङरापला भग्नावशेषग्याम याखारगि जामेकोलाला काइरि)
थेन्छे बिला–
युद्द वीरजुगुला क्लाङ हिन्ना,
रणभेरी, तरबार
थेन बुटस्होन्बोला टकटक हिन्ना
तासाइ थे जामेकोलाकादेला राप
थेला गर्भरि
दोङरापला मेफ्रा लाबा ताला
थेनोन खालाइसे आब्रि ।
खाइमा रणभूमि ज्योला
गोलीकादेला काइरि
बिजाकादेदा स्योम्सि
ह्याङ गेङ ख्राङ्ला ।
खाइमा ह्युलला नक्सा पोला
ह्याङ्ला पछ्यौरीला मुजाकादेरि
रेखाकादे ओम लासकादे गाप्बा ताला ।
खाइमा ह्याङदा
‘डेन दोसि सोना लाला,
खाइमा ‘सम्पत्ति’ स्होसि लुटप लाला ।
खाइमा ह्युलला नाना–आङा
ओम खाइमा दुस्मनला म्रिङकोलाकादे बिसि
ह्याङ फिरि बारुद आरेबा टुबाक चलप ताला ।
ह्याङ्से म्राङ्बा मुला–
सेनाकादे दोसि निमाहेन्से
थेन्ना मिरि
खाजिबाइ युद्ध लेङ्बा आता
थेला निराशादा पुइखाम्बा
जेक्खे याखारगि जामेकोला म्हाइला ।
ह्याङ खाइमा–
ङेङगोरला छेन्दे पुइला
खाइमा बैरीकादेला बासना पुइला ।
दोसि नोन दोङराप छ्योइजुगुरि
ह्याङ जेक्खे
‘युद्ध दुइला खास अवस्था’ ताला लाला ।
खाइमा युद्ध दोसि खासेला मुला
थेला क्योङबिमा ङ्हाच्छाला न्हाबाग्ला
ह्याङ्ला ल्हुइ ताबा लाला
ओम मुतेबा बिमा लिच्छाला आश्रयग्ला
ह्याङ्ला मौनता ताबा लाला
‘सैनिक’ छिगतेन एला गर्व थुइबा मुला
‘विधवा’ छिगतेन ङाला दिङ थुइबा मुला ।
थेन्से म्लेबा लामुला–
ह्याङ लडाइ लडाप आता
ह्याङसे लडाइ नाबा लामुला ।
ओम नाबा ताम
खाइमा खाइमा लडप ताबा बिमा कठिन ताबा ताला ।
खाइमा शान्तिला चिसाङ चिला
थेरि खाजिबाइ सुडेनीकादे आता
खालाइ ल्हुइथाङसेविकाकादे आता
ताला ओम जेक्खे सुट क्वान्बा म्हि ताला
थेसे युद्धदा ‘नीति’
ह्याङ्दा ‘बन्धकी’ बिबा लाला ।
खाइमा शान्ति सम्झौतारि हस्ताक्षर ताला–
ह्याङ दोसि गेङरि चाचा च्याङ्ना युबारि चुला
तिल्दाबिसाम युद्धला घाटा
मुतेबा बिमा ङ्हाच्छा ह्याङ्ला कुदापरि दोगाला ।
ह्याङ्दा थाहा मुला–
मुतेबा युद्ध बिमा ङ्हाच्छा
सुट बुट क्वान्सि ग्लुबाचुङ्बा लाला
ओम शान्ति बिमा ठिक ङ्हाच्छा
नाफाला दर निश्चित लाला ।
एसे खाजिबा तामदा ह्युलभक्ति बिसि पाङ्ला
थे पूँजीला काफ्लाक्बा सौन्दर्य हिन्ना
थेसे ङान्ना कोलाकादेला यारि टुबाक
ओम जामेकादेला सुङफिरि ताला खेला ।
‘युद्ध थेन जामेकोलाकादे’
जेक्खे अंककादेला ज्याबा जेक्खे आहिन
थे क्रिङ्बाकादेला व्हाइखा हिन्ना,
थे ताम खाइमाइ तामसोर आदो
तासाइ मुतेबा सत्यनाशला टारिन ताला ।
पुँजीला चु रणभेरीदा–
याखारगि स्यान्दो युद्धसे निसाल दोतोला
खाजिबा युद्धला छोन वाला ताला–
टुसे बाम्बा
ओम इन्क्लाबसे होङ्बा ताला ।
तिल्दाबिसाम ह्याङ्दा थाहा मुला–
वर्ग युद्ध नोन थे लिच्छाला व्हाइखा हिन्ना
थेसे फ्याबारि खाम्ला
चु नाफाला लागि ताबा हिंसाला अध्यायदा ।
(छिगला अर्थः क्लाङ– खेल, ज्योबा– सजाउनु, छेन्दे– लास, न्हाबाग्ला– विश्रामस्थल, नाबा– झेल्नु, ल्हुइथाङ– स्वास्थ्य, खेबा– भिर्नु, ज्याबा– गणना, निसाल– जवाफ)
नेपाली दोःबा : बलराम तिमल्सिना, तामाङ दोःबा : यकिना अगाध
तपाईको प्रतिक्रिया दिनुहोस