खाइमा पोप्बा ह्याङ्कादे खाइमा रेबा ह्याङकादे
चु ह्युल संकटरि मुला चु ताम खाइमा गोसे ह्याङकादे...
ल्होलो जालसाजी रासि अमेरिकी साम्राज्यवाद
चु ह्युलरि आज्याबा मिसे च्याचिबा मुला रेमरेम
चुर्ला छारिब्योन स्युर्सि
तमासा च्याचिमुला चु सरकार 
सत्तालान चुगाइ मुला, कुर्सिलान चेगाइ मुला
चु भ्रष्टाचारी नेतादा...
लुबा ताम ङ्यान्बा बानी ताजिन्जि
दातेदोना पोबा आरे
चु ह्याङ्ला केवा निजिन्जि
दातेदोना डेन आरे
तिगा आशा थोसे तिगा ग्याप्पा दोसे 
दलाल हिन्ना चुकादे ह्युल चुङ्सि चाजिन्जि...
बेल्बो बजेट लटरपटर लासि
विकास मुतेबा ख्याख्युरि जिन्ना लाजि
कार्यकर्ताला ब्यान्बा डुइबासे
विकास झन मुतेबा थानथान ताना लाजि । 
न्होरलान चेगाइ मुला, नेतालान चेगाइ मुला
विकास बजेट आशासे...
गरिबी आम्राङनि, नाबा नोन आम्राङ्नि 
चु काना सरकारसे
किसमा सेजि, गेनाम नोन सेजि 
लेबाफेबा व्यवहारसे 
मुक्तिला ताम ख्लासि
सातान लुबा आश्वसन पत्याइतिबा.. 
रेगो होइ किसान रेगो होइ गेनाम
चु दुइ ब्याङ्बारि 
छोर्गो होइ छारिब्योन छोर्गो होइ प्राङ्बो दुखी
ह्याङ्ला डिछ्या बाबारि 
ह्याङ गिक तासाम जाम्बुलिङ मुक्त ताला
चु देन्बा मुला, डाबा ह्याङ्लान हिन्ना ।

२०८२/०२/१७

(छिगला अर्थः लुबा– झुठ, चेगाइ– माया, ग्याप्पा– दास, बेल्बो– असार, ख्याख्यु– टालटुल, न्होर– पैसा, नाबा– रोगी, गेनाम– मजदुर, डिछ्या– व्यवस्था)

दोःबा : यकिना अगाध