चोदे एला दिमला
याखारगि कोठारि मे ल्हागतिजि बिसाम
तिगा ए
स्यान्दो कोठारि म्हेरखाम्ला ?
चोदे एला दिमला गिक्खेन कोठारि
छेन्देकादे नाइचिबा मुला बिसाम
तिगा ए
स्यान्दो कोठारि प्रार्थना लाखाम्ला ?
चोदे खाम्ला बिसाम–
ङाइ एदा तिगाइ बितोबा आरे ।
ह्युल कागजरि स्होबा
नक्सा आहिन
थे याखारगि बोरि डेमा नोन
लेङ्बा बोजुगुरि खाराङ्बा मुबा ओस्बान चिगाइ
ओम स्योङ, पहाड, सहर, नाम्सा
ओस्बान लासि ह्राङ्ला ग्लारि म्राङ्गाइ
अर्थआरेबा, कुटिसि ।
चोदे एसे चु ताम आङ्यान बिसाम–
ङाइ एतेन
चिबारि आखाम चु जाम्बुलिङरि ।
चु जाम्बुलिङरि म्हिला ल्हुइबिमा ग्रेन
तिगाइ नोन आरे–
न्हा कोन्ज्योसोम
न्हा ग्युइ
न्हा निर्वाचन ।
कागजरि ब्रिबा खात्दामान पवित्र ग्रन्थ
डेबारि खाम्ला
ओम साला तह ङिस दिरि
क्याबारि खाम्ला ।
थे विवेक
थे छेन्दे नाङ्सिकेन राप्ला–
काना हिन्ना ।
थे शासन
टुबाकला नलीग्याम चलतिला बिसाम–
हत्याराला धन्दा हिन्ना ।
चोदे एसे चु ताम आङ्यान बिसाम–
दारे ङाइ
ह्रेच्छाक सुताइ
एदा नाबारि आखाम ।
डान्सि थान्गो–
याखारगि बिजा सेबा
याखारगि म्रिङ्कोलाला डोङ्बा
याखारगि म्हिला
गोलीसे नाङ्बा ल्हुइ–
जेक्खे याखारगि शासनला आहिन,
क्योङ ह्युलला पुडिनुप्बा हिन्ना ।
थेह्राङ्बा का
सारि आछ्योल
दाज्र्युजुगु खाजिबा मुरि फेरचिबा मुला
थेन्दा म्लाङ स्होपिन्ना ।
खानाङ फौजी बुटला ज्योइकादे मुला
ओम थेरि छेन्देकादे गुरचिबा मुला
थे साजाम्बुलिङ
चोदे एला कारि मे दोसि आछ्योङ बिसाम–
थे बाँझो ताजिन्जि ।
एदा चुरि
बु बुन्बा याङ्ताम आरे ।
चु जाम्बुलिङ दारे एला लागि आरे ।
लिच्छाला ताम–
बिल्कुल स्पष्ट–
खाजिबाइ हत्यारादा
खाइमाइ माफ थालाउ ।
थे एला ह्रोनोन तिदा आतागाइ
धर्मला ठेकेदार मुगाइ
व्हा
लोकतन्त्रला मिनरि घमण्ड लाबा पहरेदार ।
भारत ।
(छिगला अर्थः छेन्दे– लास, नाबा– सहनु, दाज्र्यु– झण्डा, ज्योइ– छाप, जाम्बुलिङ¬– संसार, साजाम्बुलिङ¬ धरती, बु– सास, याङ्ताम– अधिकार)
दोःबा : यकिना अगाध
तपाईको प्रतिक्रिया दिनुहोस