याम्बु १४ बेल्बो । तामाङ समाज नेपालला रामेछाप शाखा कृपाश्वर घिसिङ तामाङ (मन्थली न.पा. १४ फुलासी)ला चोहोदानरि कामरेकुनु छार कार्यसमिति स्होबा मुला ।

छार कार्यसमितिला गिक्छा स्यानचोहोरि काजिमान घिसिङ (मन्थली न.पा. पुरानो गाउँ), ङ्हीछा स्यानचोहोरि अमर बिरही थिङ (मन्थली न.पा. १ चनखु), जामेकोला स्यानचोहोरि हिरामाया तामाङ (खाँडादेवी गा.पा. ७) मुला ।

छार कार्यसमितिला गाउराइरि नेरुता मोक्तान (उमाकुण्ड गा.पा ६) , छ्यागाउराइ हेमन्त घिसिङ (मन्थली न.पा ४ सालु), न्होरचोहोरि तीर्थबहादुर तामाङ (लिखु तामाकोशी गा.पा. ३) थेन छ्यान्होरचोहो नवीनकुमार तामाङ (मन्थली न.पा. १४ फुलासी) मुला ।

छार कार्यसमितिला ह्रोम्हिकादेरि मनिषा लो तामाङ (मन्थली न.पा. १ चनखु), श्याम मोक्तान तामाङ (मन्थली न.पा. पुरानो गाउँ), अमिर घिसिङ (खाँडादेवी गा.पा.), मानबहादुर तामाङ (मन्थली न.पा. १४ फुलासी), जनक दोङ तामाङ, कविता थोकर तामाङ (मन्थली न.पा. ६ कौछिनी), चेतबहादुर तामाङला मुला ।

तामाङ समाज नेपाल ‘पोबा, ग्युइसेर थेन न्होर कोङ्ना लाबा’ बिबा मुला नाराला छ्याम सन् २००५ रि कताररि स्हेङ्बा नेपाल प्रवासी तामाङ समाज, कतारला आधिकारीक गेन्दुन हिन्ना । दारे चु गेन्दुनसे ह्राङ्ला शाखा नेपालनाङ स्होइ लाबा मुला ।

चुनोन ताङरि हेराङरि गिक्छारेम शाखा स्होजिन्बा मुला बिसाम रामेछापरि दाते ङ्हीछा शाखा स्होबा हिन्ना । नेपाल तामाङ समाज २०७६ दिङरि याम्बुला जिल्ला प्रशासन गेदिमरि विधिवत दर्ता ताबा गेन्दुन हिन्ना ।

समाजसे सिन्धुपाल्चोकरि आशा योन्जन, ओखलढुंगारि होमबहादुर तामाङ (कुमार), याम्बुरि श्रीकृष्ण तमाङ गोलेदा संयोजक स्होसि शाखा स्हेङ्बा गेदा ङ्हाच्छा बोर्बाकेन मुला ।

कामरेकुनु ताबा गेताङरि समाजला केन्द्रीय चोहो कमल योन्जनसे तामाङ समाज नेपालला उद्देश्यदा ह्युलला मुतेबा जोङरि ल्हेना लासिकेन तामाङ समुदायला लामा, ताम्बा, गान्बा, कलाकार, बुद्धिजीवि, व्हाइखाब्रिखेन, क्लाङम्हि थेन स्यान्दो थुमला म्हिकादेदा गिक्खे ग्लारि बाबा दोखाङ मुबा सेमलेङ थान्जि ।

समाजला न्होरचोहो सोनी लुङ्बा तामाङसे गेन्दुनजुगुरि जामेकोलाकादे आउदिन च्याङ्ना सक्रिय ताबा बिसि चिन्ता उन्बा मुबा । थेसे जामेकोलाकादे दिमला गेरि जेक्खे आताना दारे सामाजिक गेरि नोन सक्रिय तातोबा ताम थान्जि ।

गेताङरि समाजला स्यानचोहो अशोक सिङ्तान तामाङसे ङ्हाउला उपलब्धीकादेदा सोना लासिकेन सामाजिक गेरि थेनआचिना ओसेम समुदायदा ल्हेना लासि पोबा बाबारि ह्राङ सातान तत्पर मुला बिसि पाङ्जि ।

छिमेकी मार्टला चोहो नरबहादुर तामाङसे एकता थेन ह्रोगेलान स्हेग्याम तामाङ समुदाय सामाजिक, न्होर थेन राजनीतिक लिसे बाङ्खाम्सेला सेमताम थान्जि ।

(छिगला अर्थः गिक्छा– प्रथम, स्यानचोहो– उपाध्यक्ष, गाउराइ– सचिव, छ्यागाउराइ– सहसचिव, ह्रोम्हि– सदस्य, पोबा– परिवर्तन, ग्युइसेर– शिक्षा, न्होर– आर्थिक, गेन्दुन– संस्था, हेराङ– ललितपुर, स्यानचोहो– उपाध्यक्ष, ङ्हाउ– विगत, ह्रोगे– सहकार्य, स्हेग्याम– माध्यम)