बुद्ध केवासाङ्ला दुइसाङरि हेराङला प्युटारहेन्से आश्राङदोना बाइक र्याली
हेराङ २९ दुगु । बुद्धला २५६९ छा केवासाङ्ला दुइसाङरि हेराङला बागमती गाउँपालिका ४ प्युटाररि विशेष गेताङ ङ्योइसाङ लाबा मुला । दुगु शुक्ल ङ्ह्याकुनु केबा, ग्युइ याङ्बा थेन डोङ्बा कोन्ज्योसोम गौत बुद्धला डान्बारि नेपालतेन जाम्बुलिङ नाङ्ला बौद्ध धर्मालम्बीसे चु रे म्होइबा, भक्ति थेन ल्होलो गेताङ स्होसि बुद्ध केवासाङ तेन्बा लामुला ।
बुद्ध केवासाङ्ला दुइसाङरि प्युटार बुद्धिजीवि, लामा गुरु थेन समाजसेवीकादेला सक्रियतारि ‘जाम्बुलिङ शान्तिला मोलम’ लासि विशेष बाइक र्याली थेन शोभाल्हामला ङ्योइसाङ लामुबा । प्युटार चोकग्याम तिबा थे ¥याली वडा नं. ६ ला आश्राङला आँपचौररि मुबा स्तुपारि दोसि थुम्बा मुबा ।
गेताङरि बुद्धिजीवि, लोप्खेन, सामाजिक अभियन्ता, ङ्हाच्छाला वडाचोहो, वडा नं. ६ आश्राङला वडाचोहो नारायण भोम्जन, बौद्ध धर्मला अनुयायी, समाजसेवी थेन सर्वसधारण शुभेच्छुककादेसे उल्लेखनीय बोकिन्बा मुबा ।
वडाचोहो नारायण भोम्जनसे प्युटारहेन्से शोभाल्हामरि बोकिन्बा मुतेबा म्हिकादेदा आश्राङरि डेन लासि, बाइक र्याली सफलतापूर्वक थुम्बा ग्रा पिन्जि ।
बुद्धला ग्युइसेरसे जाम्बुलिङ शान्ति, अहिंसा, मैत्री थेन करुणाला सन्देश पिन्बा बिबान बोकिन्बाकादेसे चुह्राङ्बा गेताङसे सामाजिक एकता थेन धार्मिक सहिष्णुतादा झन कोङ्ना लाबा विश्वास थान्बा मुबा । शोभाल्हामला ताङरि बौद्ध धर्मला मुल सन्देशकादे थेन बुद्ध दर्शनला ग्युइसेरकादेला प्रचार प्रसार लाबाला छ्याम स्थानीय म्हिकादेरि धार्मिक चेतना छोरुवा खाना लाबा बाङ लाबा मुबा ।
चुह्राङ्बा गेताङसे स्थानीय तहरि धार्मिक थेन सामाजिक छोरुवा बाबा थेन खाबा पुस्तारि बुद्धला ग्युइसेरदा कोङ्ना लासि पुस्तान्तरण तासेला सेमताम थान्बा मुला ।
तपाईको प्रतिक्रिया दिनुहोस