जाजा मुमा स्योङरि युङ्बा ब्याङ्सि फालछेप्बा, तारङा म्हाइसिकेन ब्राबा, खाङ्बारि या स्याल्सि दार्बा थे रेजुगु डान्मा सेमनोन छ्योपबाम्ला । तासाइ दातेला मेलम्ची स्योङ... थे खेःबान स्योङ नोन हिन्ना, तासाइ ङ्हाच्छालाह्राङ आछोर । स्योङ्मि दाते नोन थेरिन कलकल ब्योङ्चिबा मुला तासाइ थे क्युइतेन छ्याम ह्याङ्ला स्हेर नोन ब्योङ्चिबा मुला ।

२०७८ दिङरि तिगा ताजि, थेमि ह्याङ्से खाइमाइ म्हान्बा आरेमुबा । स्योङ्से कात्ते ब्योङ्जि, थेमि स्योङ्ला धार जेक्खे आहिन, ह्याङ्ला म्हाङ, डान्बा, ख्राङ्गाला ङेबा, जाजामेला न्हाङ्गारला म्हाङ मुेतबा ब्योङ्जि । कादेलाम दिम नोन आचिनि, कादेसेम केवान नुप्ना लाजि । रंगीचंगी दिमजुगु, रमाइलो ङ्यासेजुगु, मोक्कोन थुमथुम डान्बारि चुजि । ओम, स्योङ्ला गुरि राप्मा, दारे ङ्हाच्छा ह्राङ्बा स्हिवाङ आखा, बरु लोङ्बा खाला । तासाइ मेलम्चीला म्हिजुगु साहसी मुला । मेलम्ची स्योङ्से कादे किन्जि, थेबिमा ल्हानान लेङ्बा थान्बाला मुला, थे हिन्ना हिम्मत थेन साहस । खालाइ ब्लाप्बा आरे, टाङ्बा आरे ।

ह्याङ दोसि नोन दिम स्होसेला मुला । ग्यालाम स्होसेला मुला । छोन्बो मेलम्ची स्होसेला मुला । स्योङ्से दोसि नोन तिगाइ ब्योङ्जि बिसामले, ह्याङ दोसि रेसेला मुला । दातेबिमा झान बाङ्बा दोसि राप्सेला मुला । मेलम्ची स्योङ ह्याङ्ला हिन्ना । ह्याङ्ला स्हुला साक्षी नोन हिन्ना । ओम, ह्याङ्ला साहसला गाथा नोन हिन्ना ।

(छिगकि दोनः खेःबा– पुरानो, स्हेर– पीडा, स्हिवाङ– शान्ति, स्हु– दुःख)

दोःबा : यकिना अगाध