जब्बारला आपासे कोला ब्योन दोसिकेन निबा म्राङ्माहेन्से थेला खिम्जेला याखारगि केटीतेन ब्रेल्साङ लापिन्बा ताम पक्का लाजि । आपाचासे ब्रेल्साङ्ला पक्का लाजिन्बा लिच्छा तिरेकुनु जब्बारसे हस्बाला जामे शब्बुदा क्योइ बासिमाम खाबाकेन लाबा म्राङ्मा थेला होशहवास नोन सुपम्हाजि ।

शाहजादा स्योङरि थोबो ख्रुसि खाबा आउदिन जेबा केटीला म्हारह्राङ्बा क्रा म्राङ्सि थेला चेगाइरि थे चोत्ते म्योजि कि जब्बारला हालत नोन न्होङ्जि । सुङ्से तिगाइ बिबारि आखाम्नि तासाइ थेला ल्हुइ ब्लाप्जि, लिला छोन फोङ्सार्जि ओम थे म्हाङरि म्हाबारि चुजि ।

आपाआमासे थेला नाछाल म्राङ्सि गिसेम गिरि ग्रोइ लाजि । सोझोन आपाङ्साइ नोन थेदा बिजि, ‘थेला ब्रेल्साङ योनान ताइ लामुला । केटी नोन जाजा आहिन, क्योङ छामे दोजिन्बा मुला । शमसलला जामेगेन जहुन्ना ख्यारख्युरला नाम्सा ब्लिरिन गिक्खे थेह्राङ्बा जामे हिन्ना । क्युइला ग्रेन दार्बुङ थोबोरि थान्सि माइल ङ्ही ब्राला । दिमला गे दातेन सम्हालतिमुला । चुरि खामाहेन्से जब्बारला आमादा नोन ब्लाप्बा न्हाम्याङ्ला । ओन्छ्यान खुयु दोजिन्बा मुला । तासाइ आपा आमाला चु तामसे जब्बारदा तिगाइ सान्त्वना आतानि । थे बिसाम ह्रेङ्बा ह्रेङ्बा सा बुन्सि कुटिसि स्यान्दोलोङ ताचिमुबा ।

कोलाला चु नाछाल म्राङ्सि आमाचासे तिरेकुनु मि छ्योप बाम्ना लासि ग्रान फापुङ्बान ङ्योइजि, ‘एला ब्रेल्साङला ताम लामा ए तिल्दा चुह्राङ्बा उदास ताबा ?’ थेलिच्छा थेसे देन्बा ताम पाङ्पिन्जि । जहुन्नाला ताम ङ्यान्बारिन आङ्यान्ना थेसे बिजि, ‘ब्रेल्साङ लापिन्साम हस्बाला जामे शब्बुतेन लापिन्गो, आहिन बिसाम खालाइतेन आला ।’

आपा आमासे ल्हानान सम्झाप लाजि । थेसे बिसाम जहुन्नाला प्रशंसा थेन शब्बुला निन्दा लाबारि चुजि । चुह्राङ्बा पेबा आखाबा तोसोसे ब्रेल्साङ लाबाजुगुला कात्ते निन्दा ताला बिबा ताम नोन ल्होलो उदाहरण पिन्सिमाम आपा गफ्फारसे गोना लाबारि म्हाइजि । तासाइ ह्राङ्ला जिद्दीरि क्यारमार आताना जब्बार अडिग चिजि ।

कोलाला हठतेन ब्रेसिमाम खेप्पा गफ्फार तिरेकुनु हस्बातेन ताम लाबारि निजि । फ्लिक दोसि खामा थेला मि बोबोसे वाला थेन लि अपमानसे न्होङ्बा मुबा । टुबाक गुरि थान्सि, बामला चादर सारि ब्याङ्सि थे सारिन ब्लेकख्याजि ।

जब्बारला आमा ऊँटदा बेरला बा ख्वाचिबा मुबा । थे तिक्खुरि छ्योङ्सि खासि खेप्पाला ङामरि खाजि । जब्बार थारेङ ग्याम्सेन उत्सुकतापूर्वक ङ्यान्चिमुबा । खेप्पा फोमाह्राङ् लासि बिजि, ‘चुह्राङ्बा नालायक कोला बिमा तान्बा आरेबा ज्याबा ।’

जब्बारला आमासे लोङ्सिकेन कोलाला थोबो बामरि थान्सि नार्तुरि यासे रिसिकेन ङ्योइजि, ‘ओइ कोन्ज्योसोम ! तिगा ताजि ?’

खेप्पासे बिजि, ‘तिगाइ तासे ले ? चुह्राङ्बा पेबा आखाबा थेन जिम्मेवारी आरेबा कोलासे स्यान्दो तिगा लापुङ्से ? इज्जत मोक्कोन साप्रारि निजि, दिम नोन बर्बाद तासेला मुला ।’

आमासे दोसि ङ्योइजि, ‘ओइ ! चुह्राङ तिल्दा बिबाकेन मुला ?’

आपाचासे बिजि, ‘चोदे चुला चुह्राङ्बा शौख मुबा हिन्साम तिल्दा फ्युक्पोला दिमरि केबा आकिन्नि ? थाहा मुला, हस्बासे तिगा बिजि ? सोझो सुङ्से ताम नोन आलानि । बिजि– शब्बला ताम नोन सोच आतिउ । खाल्छे ग्यार्जा ङ्हीसे गाङ्साल रुपैयाँला मुठा बासि खाला, थेसेन शब्बुदा ब्रेल्साङ लाला ।’

ग्यार्जा ङ्हीसे गाङ्साल रुपैयाँला ताम थेबातेन जब्बारला आमाला मि ग्रेन ताजि । खेप्पासे पाङ्चिजि, ‘ए नोन खुयु दोजि । एसे केवारि चुह्राङ्बा लुङ्सुर थेबा मुला ? ग्यार्जा ङ्हीसे गाङ्साल ! तिगा थे जाजा ताम हिन्ना ?’

‘शमसलतेन जहुन्नाला ताम लामा थेसे च्युइ ब्रे ह्रिबा मुबा, लिच्छारि च्युइ डुरि ङ्यान्जि । थेला जामे नोन म्हि नोन हिन्ना । ओम थे बदजातसे ह्रिला– ग्यार्जा ङ्हीसे गाङ्साल ! ओम एसेन पाङ्गो, छोन जाकि म्लाङतार ताजि व्हा जाकि ल्हाना तार तार ताजि बिसाम तिगा फेबा ताला ले ? जामेकोलामि जामेकोलान हिन्ना । गेतेन मतलब कि छोनतेन ? ला डु ङ्हाच्छा चुला लागि टुबाक ग्लुमा याखारगि ऊँट चुङ्बा मुबा । ग्यार्जा ङ्हीसे गाङ्सालमि चु केवानाङ छाबारि आखाम, तासाइ आँट च्यागो । एसेन पाङ्गो, चुह्राङ्बा साइ खाइमाइ थेबा मुला ? ग्यार्जा ङ्हीसे गाङ्सालरिम फिरंगीला तोप ग्लुला ।’

जब्बारसे चु बेनान थेसि ह्राङला बु कुन्हाङरिन दुल्ला ओम क्यार फ्लिकदोसि निजि ।

गिक्खे कोला रेम्हुन चुह्राङ्लासि बोल्चिबा म्राङ्आखाम । खेप्पासे बिजि, ‘ङाला तिगा भर ? मिन्बा रोरो हिन्ना, खाइमा ताइला थाहा आरे । कादे तिगा मुला चुलान लागि मुला आम्दानीला दाःन चु गोर ङ्ही ऊँट हिन्ना । चु ङ्ही नोन चुङ्जि बिसाम ह्राङ्नोन फिरंगीजुगुला सडकरि युङ्बा फ्रेबा मजदुरी लातासेला मुला । म्हिसे चुह्राङ बिसेला मुला, ‘गफ्फारला कोला मजदुर दोजि । चुमि चुला थोप्साङ ! ङा सातानमि आचि ।’

लिच्छारि ङ्ही नोन ऊँट बन्नुला बजाररि चुङ्जि ओम शब्बु जब्बारला चाङ दोसिमाम दिमरि वाङ्गाजि ।

शब्बुदा चु तामरि आउदिन गर्व मुबा कि थेला लागि ग्यार्जा ङ्हीसे गाङ्साल च्यासिमाम फाबा मुला । क्युइ किन्बारि निमा गाङ्साल दार्बुङ जेक्खे बासि खाला, थेनोन पाक्याङ पेक्केङ तासि । खिम्जे मीरनसे सम्झप लाजि– ‘चुह्राङ्बा नखरा ज्याबा आहिन । मर्ददाम गे सेम निला । खाजिबाइ रे चुह्राङ्बा या चातोला कि क्रेप्सा खिसिमाम सातानला लागि पेक्केङ तातोला ।’

शब्बुसे मि झिक्याप लासि ओम जुम्बि उन्बान पाङ्जि, ‘ओहो ! ङाला आपासे ङादा चुरि या चाबारि पुइगाबा हिन्ना ले ? खालाइसे थुर्सिम च्यागाइ ! एला ताम फेबान हिन्ना । एला ह्रेम्बोसेम ग्यार्जा डुरि एदा बाबा हिन्ना । खजा– खोरोन्डो ताजि बिसाम स्यान्दो बासिन ख्लाला ।’

शब्बु ल्हानान शोख थेन ज्योबारि सेम लामुबा । थे म्लाङ मखमली बास्कट क्वान्मुबा, थेला डुप्बाजुगुरि सिपला ग्यार्जा सोम बटन फ्लाक्बा तामुबा । क्रारि म्हार फोर्मुबा ओम माङ्ग्यार निबा ङ्हाच्छा क्युइसे या फुसि डिक्ना लामुबा । लारि ङ्हीरेम ङ्हीरेम क्रा ख्रुमुबा ।

जब्बारला आमासे चु मोक्कोन म्राङ्मुबा ओम नार्तुरि या थान्सि खिम्जेतेन बिमुबा, ‘च्यागो ओम, ग्यार्जा ङ्हीसे गाङ्साल फासि ब्रेल्साङ लाजि, तासाइ ङादा तिगा ब्लाप्बा न्हाम्याङ्से ? चुदाम ह्राङ्ला नखराग्याम फुर्सद आरे ।’

खेप्पासे कोलादा सम्झाप लाजि, ‘जवान दिङ एला हिन्ना । दाते आछानि बिसाम गुजारा खाराङ लासि चलतिला ? चुह्राङ्लासि दिमरिन चिबा जेला ? आम्दानीला साधन ङाला ऊँट मुबा, एला ब्रेल्साङरि जिन्जि । दारे नोन तिगाइ आलानि बिसाम तिगाइ ङाइचा फिरग्याप ह्युलरि निसि मजदुरी लातोबा ?’

सेम सेसिमाम जब्बार छाबारि बन्नु निबारि बाध्य ताजि । तासाइ थेला सेम नाम्सारिन चिमुबा । बन्नु निबा हप्ता गि नोन छ्योबा आरेमुबा, शब्बुला डान्बासे बेचैन तासि थे तिरेकुनु म्हुना गाङ्सालरिन रेसिमाम नाम्सारिक्यार खाजि ।

च्युइसे डु माइल ब्रासिमाम थेसे स्ह्योला म्युख्लि वाला ह्यालरि ल्हागाङफिरि ह्राङ्ला नाम्साला छाना म्राङ्जि, थे थेनताजि । नाम्साला बोमो लि थेन खिम्जेनुगुला पालेला लोङ्बासे थेला काङरि च्युनपिन्जि । थे याखारगि युङ्बारि चिसिमाम ह्राङ्ला दिमला म्रापरिक्यार च्याबारि चुजि । थेसे म्हान्जि–शब्बु क्युइ किन्बारि थोन्मा च्याङ्नारि तिरेममि म्राङ्म्याङ्ला । बावडीरि निसि चितोजि, थे क्युइ किन्बारि खाला, गोर ङ्ही ताम लासि फ्लिक दोला ।

तासाइ शब्बु क्युइ किन्बारि निमा गोरङ्ही ह्रोतेन खाबा मुबा । जब्बार गोङ्मा च्युइ सोम थारेङ याखारगि युङ्बाला उरि चिसिमाम छोनछोन फिर्चिबा तिङ्से च्याचिजि, तासाइ छिग पाङ्आखाम्नि । पाङ्से खाराङ्लासि ? थे खिम्जेजुगुसे बदनाम लापिन्सेला मुबा । थे युङ्बा ह्राङ्नोन तासि च्यासिमाम चिचिजि । शब्बु सहेलीतेन ङेबान, पाक्याङ पेक्केन ताबान फ्लिकदोसि निजि । जब्बार खुइया लासि बन्नु फ्लिकदोसि निजि ।

विरहला मेरि दारे ईष्र्याला म्हार नोन काप्जि । थेसे म्हान्जि– ‘ङा चु फिरग्याप ह्युलरि गिक्खेन सिबाकेन मुला, ओम थे थेरि ताङ्चिबा मुला । थेदा ङाला जाकि नोन चिन्ता आरे । जामेकोलाला जातरि वफादारी आता ।’

कु–च्युइ रेलिच्छा थे दोसि म्हुक्गि ब्रासिमाम नाम्साला बावलीरि दोजि– शब्बुदा प्लिक च्याबारि ओम याखारगि च्योबा स्याप्बा आशारि । तासाइ शब्बु दोसि गिक्खे आखानि । गोरसोम ह्रोतेन ङेसिक्लाङ्सिकेन खाजि । जब्बार थेन्ना ताम न्हाब्याङ तासिमाम ङ्यान्बारि चुजि । 
मीरनसे शब्बुला कामसिङ थुर्सि पाङ्जि– ‘ओइ एला नखरा ! नाम्साला केटाजुगु एला लागि ल्हुइ पिन्बारि तयार मुला ।’

शब्बुला लि गर्वसे चम्काप ताजि । थेनि क्युइ बोर्सि फ्लिकदोजि । जब्बारला कुफिरि बिले ग्यार्जा मनला युङ्बा ताइजि, तासाइ थे असहाय मुबा ।

दारे थेला सेमरि शंकाला ब्लु फुइजि । शंका म्हिला सेमरि उरमान ह्राङ् फेल्ला– थेदा टा व्हा दाःन नोन आतो । कल्पनाला मुरिन थे ल्हेला । ओम शंका निश्चयरि पोबारि नोन ल्हाना दुइ ल्हागआति ।

नाम्सारि तिगाइ फुर्सदिला केटाजुगु मुबा, थेन्ना गेनोन आवारागर्दी मुबा । रहमान थेन अब्बासग्याम तिगादाम्मान अपेक्षा लाबारि खाम्मुबा । ओम चोदे तिगाइ तोरमार आरेबा हिन्साम मीरनसे तिल्दा थेह्राङ्बा ताम लाजि ? शब्बुला चु ज्योबा खाल्ला लागि ? ‘स्हिगो थेदा ङाला जाकि नोन चिन्ता आरे, ओम ङा चुरि सिबाकेन मुला ।’ जब्बार न्हाङ्न्हाङरिन काला घुट्की थुङ्मुबा ।

थेसे म्हान्जि– रुपैयाँ छाबालान लागि थे दिमग्याम थारेङ मुला । चुह्राङ्लासि ब्रे–च्युइ आनारि खानाङ न्होर पोप्खाम्ला ? दिमरि निबा सेमसे थेदा म्योबा ह्राङ्बान स्होजि । तिरेकुनु मौका च्यासि थेसे ह्यो लाजि । थोप्साङ ज्याबा मुबा– आचुङ्नि । ग्यार्जा गिसे गाङ्साल छासि लागिसे गाङ्सालरिन दिमरि दोगाजि । जब्बारला आपादा ढाडस खाजि– कोला फोइदान नोन सिसेला आरे ।

खाराङ्लासि पिङला दाग क्वानग्याम देःबा लासि आम्हा, थेह्राङ्नोन लासि सेमरि वाङ्बा शंका नोन देःबा लासि आम्हा । जब्बारसे शब्बुदा ङ्योइजि– ‘ङा बन्नुरि मुमा एसे ल्हानान रमाइलो लाजि ले ?’

शब्बु नोन सोझी मजदुरनी आरेमुबा । चम्काप तासि ङ्योइजि– ‘खाराङ्बा रमाइलो ? खाल्तेन ?’

जब्बारसे बिजि– ‘नाम्सारि तिगा म्हि च्याङ्ना मुला ओम ? रहमान मुला, अब्बास मुला । चोत्ते ज्योसि क्युइ किन्बारि तिल्दा निला ओम ? ’

शब्बुसे बिजि– ‘चोदे ङाइ खाइमाइ खालाइदा मि थिसि च्याबा हिन्साम सिगाइ, आहिन बिसाम ङाफिरि पाले लाबा म्हि सिगाइ ।’

जब्बारसे बोल्सिकेन ङ्योइजि, ‘ए ज्योसिमाम ह्राङ्ला जेबा उन्बारि आनिमुबा ?’

शब्बुसे बिजि– ‘ङाइ तिल्दा उन्बारि निसे ? खालाइले च्याजि बिसाम थे ङाला पाले हिन्ना ?’

जब्बारसे दोसि ङ्योइजि– ‘थेह्राङ हिन्साम चोत्ते जेना ज्योसि तिल्दा थोन्ना ?’

ह्राङ्ला जेबाला गर्वसे थोबो थिसि शब्बुसे बिजि– ‘ङाइ तिगा लासे ? तिगा लि म्लाङ स्होउ ? खाराङ्बा मुला ओस्बान मुला ।’

जब्बारसे दारेम शब्बुफिरि कोङ्ना निगरानी थान्बारि चुजि । शब्बुग्याम गोङ्मा ग्यार्जा गि थारेङ नोन खालाइ ह्रेमकोला म्राङ्जि कि थेदा शंका ल्हागतिमुबा– थेसे थेतेन मि क्युचिबा मुला । तिगाइ रेरिन थेला चाबा थुङ्बा म्हाजि । नाम्साग्याम खालाइ ल्हाम्पा ब्रासाइ नोन थेदा छोर्मुबा– सायद शब्बुला लिला चर्चा थेसि चुनोन ल्हेन स्होसि चुरि खाबा मुला । मोक्कोन नाम्सा थेदा शब्बुला लिच्छा म्योसि ब्राबाह्राङ छोर्बारि चुजि ।

तिरे म्हुना जब्बारसे ङ्योइजि– ‘तिनि माङ्ग्याम खामा ङेचिबा मुबा, तिल्दा ?’

शब्बुसे पाङ्जि– ‘ङा खानाङ ङेबा मुबा ?’

जब्बारसे पाङ्जि– ‘ओम थे मोक्कोन म्हि तिल्दा च्यासिमाम राप्चिबा ओम ?’

ह्राङ्ला लिला महिमासे पुलकित ताबान शब्बुसे बेवास्ता लासि पाङ्जि– ‘ङादा तिगा थाहा ?’

जब्बारसे सुङ्फि ख्राप्जि– ‘ल्हानान घमण्ड मुला ह्राङ्ला लिला ! नार्तु थापिन्ना ।’

शब्बु ज्युम ङेजि । थेसे बिजि– ‘ग्यार्जा ङ्हीसे गाङ्सालाला नार्तु हिन्ना !’ ओम खितिति ङेजि ।

शब्बु म्हेर्जि । तासाइ जब्बारदा खानाङ खासे निद्रा ङ्हुबा ! थेसे ङ्योइजि– ‘ओइ ङ्यान्गोम !’ तासाइ निसाल आखानि ।

जब्बार सोचतिबारि चुजि– ‘स्हिगोम चुला घमण्ड ! ङा चुरि बोल्चिबा मुला ओम चु छेम निना म्हेर्चिबा मुला । चु बेनान लिला घमण्ड हिन्ना । चुनोन लिला ङ्यान्दि नाम्साला न्होङ्बा केटाजुगु म्योचिबा मुला । ङाला इज्जत तिगा चिजि ? चोदे चु लि आरेबा हिन्साम ङाला इज्जत चुह्राङ्लासि साप्रारि आछ्योल्सेला । चुह्राङ्बा लिला तिगा गे ?’

गम्भीर तासि थेसे सोचतिजि– ‘इज्जत आरे बिसाम तिगाइ आरे । ओम चु लिमि क्योङ्से च्याला । चुफिरि ङाला तिगा याङ्ताम ? खाइमादोना चु लि चिला, ङादा न्हा चैन याङ्ला न्हा इज्जत ।’

म्हुनला सन्नाटारि खाबा विचारजुगु ल्हानान उग्र तामुला । रेह्राङ थेदुइरि विचारदा बोबारि ग्यार्जाछा छेर्बा आता । थेतासि भक्तजुगु म्हुनरि समाधि ल्हागाब लाला, हत्यारासे म्हुनरि म्हि साइला, ह्योसे म्हुनरि ह्यो लााल ओम विरही नोन म्हुनरिन म्योला ।

जब्बार दोपरि मि ठ्वाङ्सि शब्बुला लिला ङ्यान्दि ताचिबा मोक्कोन अनर्थ सोचतिचिबा मुबा । थे अनर्थ थेसे नाआखाम्नि ।

थेसे खुमग्याम छ्यार्बा छुरा तेजि ओम दोपरिन साम्सिकेन शब्बुला नार्तु चुङ्जि । झट्का गिरिन नार्तु थासि ब्याङ्पिन्जि ।

शब्बु क्रिङ्जि । जब्बारला आमा रेसिमाम छ्योङ्सिकेन खाजि । नाङ्साल म्राजि । खिम्जेजुगु पोप्जि । जब्बारला आपा बोमोसे केबाकेन मुबा, स्यान्दोसे क्योन्बाला उपाय पाङ्चिबा मुबा । याखारगि खुयुसे क्रिङ्जि– ‘योना ! खालाइसे ग्यु–राला लेपलेप छोन्बो स्याला प्लेन थासि नार्तुरि थानपिन्गो, आहिन्साम केटी सिसेला मुला ।

जब्बारला आमासे लोङ्सिकेन बिजि– ‘चुदुइरि ग्यु–रा खानाङ ?’

खुयुसे बिजि– ‘थेमि एन्छेन सेगो ।’

जब्बार राप्सिमाम ङ्यान्चिबा मुबा । थेसे शब्बुला नार्तु चु ङ्यान्दि थाबा मुबा कि थे थेला जेक्खे तागाइ । स्यान्दोला मि थेफिरि परतिबा नोन थेसे नाआखाम्बा मुबा । थेसे शब्बुदा जेक्खे ह्राङ्तेन थान्बा सेम मुबा । स्यान्दोसे च्यामा थेला सेमरि पोर तामुबा । तासाइ दारेम शब्बु सिबारि खाम्ला बिबा थेसि थेला सेम दार्जि ।

‘छोन्बो लेप्बा स्या आयाङ बिसाम... ।’

थेसे दोसिन थेनोन छ्यार्बा छुरा थिजि ओम ह्राङ्ला ल्हेफुमग्याम छोन्बो स्याला प्लेन थासिमाम शब्बुला नार्तुरि थानपिन्जि । जब्बारला आपाआमा म्योबाह्राङ ताजि, स्यान्दो मोक्कोन स्तब्ध ताजि ।

शब्बु लिला पोरला स्हेरसे खाटरि क्रिङ्चिबा मुबा । जब्बार ल्हेफुमरि पट्टी खिसि खाटला ङामरि चिसि थेला लिग्याम नाफ्राङ दाङ्मुबा । पोरला ङ्यान्दि शब्बुला लि क्योङ बोकबोक टाङ्बा मुबा । क्युइला फ्रुम ग्लोङ्बारि नोन गाह्रो मुबा, थेफिरि छावा । चुह्राङ्बा नाछाल म्राङ्सि जब्बारसे थेला क्योन्बा बन्नुला फिरंगी डाक्टरला अस्पतालरि लासेला निश्चय लाजि ।

थे ह्राङ्नोन खामआखाम ब्राबारि खाम्मुबा, तासाइ तिरेम्हुना बेनान म्हेर्चिबा दुइरि थेसे शब्बुदा बामरि थान्जि, काडि जुजि ओम बन्नुरिक्यार निजि ।

थे तिगाइ थारेङ ब्रामुबा, दोसि ब्लाप्बा न्हामुबा । क्वान फुसिमाम शब्बुला सुङरि क्युइला फ्रुम ताइना लामुबा । ङ्हारेरि थेनि बन्नुला अस्पतालरि दोजि । च्युइ ङ्ही रेलिच्छा शब्बुला पोर प्लिङ्जि ओम नाछाल थिग्युन ताजि ।

नार्तु आरेमाहेन्से लाबा सुङबिमा नार्तुला गालग्याम ल्हाना थोन्ना ओम काइ ल्हानान नार्तुग्याम थोन्बाह्राङ ताला । थेनोन काइरि शब्बुसे बिजि– ‘मेमसाहेबसे बिजि, विलायतग्याम रबरला नार्तु ह्रिबारि खाम्ला ।’

जब्बार लोङ्सि पाङ्जि– ‘बस्, मुगाइ । ह्याङ्दा नार्तु आतो । ए नार्तु आरेबान आउदिन जेबा छोर्मुला । ङादा तिगा स्यान्दोदा नार्तु उन्तोबा मुला ?’

शब्बु उदास ताजि । थेसे कान चाबारि आङ्यान्नि । जब्बार ग्रेन काक्तारि परतिजि । थेसे म्हान्जि– ‘चु मेमला पुडिनुप्गाइ ! ङाइ याखारगि नार्तु थाबा, थे स्यान्दो स्होबारि तयार मुला ।’

ङ्हीरेदोना शब्बुसे कान आचानि, थेलिच्छा जब्बारसे रबरला नार्तुला लागि चालीस रुपैयाँ डाक्टरदा पिन्जि । तासाइ थेसे म्रिङ्चादा याखारगि सर्त थान्जि– ‘शब्बुसे नार्तु ल्हागब लासेला मुला, तासाइ खालाइ ह्रेमकोलासे च्याजि बिसाम नार्तु तेसिमाम छुम्तोसेला मुला ।’

दोःबा : यकिना अगाध

(छिगकि दोनः खिम्जे– छिमेकी, नाछाल– अवस्था, ग्रोइ– सल्लाह, तान्बा– सन्तान, छाबा– कमाउनु, दाःन– आधार, थोप्साङ– भाग्य, खजा– अपाङ्ग, ज्योबा– सिंगार, म्युख्लि– मधुरो, च्योबा– चुम्बन, उरमान– आकाशे बेली, फेल्ला– फैलिन्छ, देःबा– सजिलो, ल्हाम्पा– यात्री, ल्हेन– बहाना, छेम– मज्जा, ङ्यान्दि– कारण, याङ्ताम– अधिकार, क्योन्बा– उपचार, थिग्युन– सुधार, काक्ता– समस्या)