ओइ फिरग्यापह्युल्पा
ल्हानान डान्बा मुला
डान्बा खाला छ्यामनोन चाबा ओम क्वान्बा ।

छ्याम नोन छे थाबा
थे सिङ्ला दोइ पुइबान
गिक्खेन काइरि बिरहला व्हाइ कोबा
छ्याम नोन लासि क्लाङ्बा
सिङ्ला दोइतेन टु थाबा
खुइया लाबान दुख सुखला व्हाइ
गिक्खेन भाकारि कोबा ।

कात्ते डान्बा खाला कात्ते
झन थे एसे ख्लासि निबा
ह्राङ्ला तिङ्ला प्लेन म्राङ्मामि
झन नोन तिङ थिबा लासि
एलान डान्बा खाला ।

ओइ फिरग्यापह्युल्पा
सुखला सा बुन्बारि
एदा रहर आरेमुबा
चुमि बाध्यता मुबा
कर आहिन जिम्मेवारी मुबा ।

ओइ फिरग्यापह्युल्पा
तिङ प्राकथिना डान्बा खाला ।

दिमथेमेला ताङ्बाला लागि
मोक्कोन स्हेर नाजि 
आपाला इज्जत सोना लाबारि
आमाला ङ्हेला धाराला छे फाबारि
ह्राङ्ला म्हाङजुगु कुटिसि दुल्जि ।

दिमग्याम थोन्मा आमाला मि फुबा
तान्बासे आमाला ममता म्हाना लाबा
दाते नोन थुमथुम डान्बा खाला ।

दिमथेमेला ताङ्बाला लागि
ह्राङ्ला रहर मोक्कोन दुल्जि
तान्बाला लागि स्हेरजुगु मोक्कोन छुम्जि
डान्मा सेम न्हाङ्न्हाङरिन ब्रुइ ब्रुइ ताला

ओइ फिरग्यापह्युल्पा
ल्हानान ल्हानान चेगाइ मुला होइ ।

(छिगकि दोनः तान्बा– सन्तान, थुमथुम– झलझली, चेगाइ– माया)

दोःबा : यकिना अगाध