सिन्धुली । घ्याङलेख गाउँपालिका न्हाङ्ला सिम्लेखोला–हायूटार–सोलाभज्याङ सडक बोरि स्होसि जिन्बा छ्योआछ्यो १७ किलोमिटर कालोपत्रे सडकला मिरे ठ्वाङ्सेन लाबा मुला । बागमती प्रदेश सरकारला भौतिक ङ्हाउदान फेल्गेबा ब्लोन दिनेशचन्द्र देवकोटासे चु सडकला ठ्वाङ्सेन लाबा हिन्ना ।

सिम्लेस्योङ–हायूटार बोला सडक स्होबा ठेक्का श्री जयबाबा गोरख–सारस–बालबोट जेभीसे याङ्बा मुबा । थे कम्पनीसे २४ करोड ८८ बुम ८३ तोङजा रुपैयाँ लागतरि १०.२० किलोमिटर सडकरि आस्फाल्ट कङ्क्रीट कालोपत्रे स्होबा जिन्ना लाबा हिन्ना । ठेक्का थुन्च्या वि.सं. २०८० बेल्बो १९ गते ताबा थेन २०८२ तापा २८ गते स्होसि जिन्बा ङ्हाउदानफेल्गेबा गेदिम सिन्धुलीसे उन्पाङ्बा मुला ।

हायूटार–सोलाभज्याङ बो न्हाङ्ला ६.३० किलोमिटर सडक कालोपत्रे लाबा मुला । थे बोला गे श्री संजिव–सिन्धुली जेभीसे १० करोड ८० बुम ३८ तोङ्जा रुपैयाँ लागतरि स्होसि जिन्ना लाबा हिन्ना ।

चुनोन दुइसाङरि ४० मिटर ह्रेङ्बा ठाडे स्योङरि स्होबा पुल (लागत ५ करोड ८७ बुम ९६ तोङ्जा रुपैयाँ) थेन ४० मिटर ह्रेङ्बा तामाजोर स्योङरि स्होबा पक्की पुल (लागत ५ करोड ४० बुम ८८ तोङ्जा रुपैयाँ) सुताइ ठ्वाङ्सेन लाबा मुबा ।

(छिगकि दोनः मिरे– मंगलबार, ङ्हाउदान– पूर्वाधार, फेल्गेबा– विकास, ब्लोन– मन्त्री, बुम– लाख, तोङ्जा– हजार, थुन्च्या– सम्झौता, उन्पाङ्बा– जनाएको, बो– खण्ड)