हेराङ । बागमती गाउँपालिका–४, प्युटारला श्री बाग्मती दानस्हि लोप्खाङदा ई–लाइब्रेरी हस्तान्तरण गेताङ स्योल्बा मुला ।
लबग्रीन नेपाल थेन चौतारी जापानला पहलरि, एल्साराइन जापानला गोछापाजुगुला न्होरकि ह्रो ओसेम बागमती गाउँपालिकाला छ्यागेरि स्हेङ्बा ई–लाइब्रेरी भवन औपचारिक स्ह्रुगरि लोप्खाङदा हस्तान्तरण लाबा हिन्ना ।
छ्योआछ्यो २४ बुम रुपैयाँला लागतरि स्हेङ्बा चु परियोजना न्हाङरि लोप्खाङला लागि आधुनिक साप्तोनला छ्याम ई–लाइब्रेरी स्हेङ्बा हिन्ना । गेताङरि लोप्खाङदा ८ सेट कम्प्युटर, ई–चौतारी सर्भर, ब्याकअप प्रणाली, क्लाङ्छ्योङ बार्बु ओसेम ल्होलो ग्युइसेरकि बार्बुजुगु सुताइ पिन्बा ग्रादाङ पिन्बा मुला ।
गेताङरि स्थानीय जनप्रतिनिधि, लोप्खाङ डिछ्याबा दाछोक, लोप्बोन, अभिभावक ओसेम ल्होलो गेदुङ गेन्दुनला गोछापाजुगुसे बोकिन्बा मुबा । बोकिन्बाजुगुसे डिजिटल ग्युइसेररि पहुँच फेल्ना लाबारि चु तोसोला पहल महत्वपूर्ण ताबा पाङ्जि ।
चु ई–लाइब्रेरी स्हेङ्मा हेन्से लोप्खेनजुगुदा आधुनिक प्रविधिग्याम खेडोब–अध्यापन सहजता तासेला विश्वास किन्बा मुला ।
(छिगकि दोनः हेराङ– ललितपुर, दानस्हि– आधारभूत, स्योल्बा– सम्पन्न, गोछापा– प्रतिनिधि, न्होरकि– आर्थिक, छ्यागे– सहकार्य, स्ह्रुग– रुप, बुम– लाख, साप्तोन– सुविधा, क्लाङ्छ्योङ– खेलकुद, बार्बु– सामाग्री, ग्युइसेरकि– शैक्षिक, ग्रादाङ– जानकारी, डिछ्याबा– व्यवस्थापन, दाछोक– समिति, लोप्बोन– शिक्षक, गेदुङ– संघ, गेन्दुन– संस्था, ग्युइसेर– शिक्षा, फेल्ना– विस्तार, तोसो– प्रकार, लोप्खेन– विद्यार्थी, खेडोब– अध्ययण)
तपाईको प्रतिक्रिया दिनुहोस