वर्तमान कविता समुहसे दाङ्जि व्हाइखारि गेनाम दिवस
याम्बु । वर्तमान व्हाइखा समुहसे स्यानह्युल गेनाम दिवसल दुइसाङरि ‘गे, गेनाम विशेष व्हाइखा डोबा’ क्राछिगरि विशेष गेताङ लाबा मुला ।
याम्बुला मिन्डखटारला युरेसियन लोप्खाङरि दाङ्बा गेताङरि नेपालला समकालीन १२ व्हाइखाब्रिखेनकादेसे केवा, संघर्ष थेन गरिमा उजागार लाबा व्हाइखा प्रस्तुत लाबा मुबा ।
व्हाइखाग्यम्से सामाजिक च्योच्यो आरेबा, न्होर स्हु थेन सामान्य गेनामकादेसे कुटिसि नाचिबा ओसेम जुझारुपनला संवेदनशीलता चित्रण लाबा चु गेताङसे गेनाम वर्गफिरि म्होइबा थेन डेन फुल्बा मुबा ।
गेताङला ठ्वाङ्सेन व्हाइखाब्रिखेन विश्व सिग्देलसे ‘जुस छोङ्खाङ’ व्हाइखा डोबाग्याम लाबा मुबा, थेरि जुस छोङ्खाङरि गेलाबा याखारगि छारिब्योनसे कुटिसि नाबा थेन न्होर शोषणला सुक्ष्म चित्रण लाबा मुबा ।
व्हाइखाब्रिखेन चन्द्रबहादुर लामाला ‘गे दिवस’ व्हाइखा गेनामला केवादा छोन्बो लिरि उन्बान गे दिवसला नुप्बा भावनात्मक सन्देश प्रवाह लाबा मुबा ।
व्हाइखाब्रिखेन सञ्जय सुमनला ‘टु’ व्हाइखासे गे थेन धैर्यदा अमुल्य प्रतीकला लिरि प्रयोग लाबा मुबा । व्हाइखाब्रिखेन रमी प्रिया (रमी श्रेष्ठ)से ‘म्हि थेन डेङ’ ग्याम्से गेनाम वर्गसे नाबा मानसिक थेन सामाजिक डेङकादेदा उजागार लाबा मुबा । व्हाइखाब्रिखेन तीर्थराज भट्टला ‘गिट्टी तोबा आमाला मोलम’ व्हाइखासे गिट्टी तोसि सोतोबा आमाला स्हेर थेन पोबाफिला करुण पुकार प्रस्तुत लाबा मुबा ।
व्हाइखाब्रिखेन दिलकुमारी डंगोलला ‘तार एप्रोन’ व्हाइखासे सेवा थेन ल्हुइथाङ नामलारि क्रियाशील जामेकोलाकादेला संवेदनशीलत संघर्ष उजागार लाबा मुबा । व्हाइखाब्रिखेन नवराज घिमिरेला ‘साम्हि’ व्हाइखासे समाजला पेदेरि मुबा मुतेबा उपेक्षित तासाइ आउदिन बाङ्बा गेनामकादेला राप थेना लाबा मुबा ।
व्हाइखाब्रिखेन धिरकुमार श्रेष्ठला ‘प्राङ्बो ग्याप्पाला राप’से याखारगि सेवकला कुटिसि चिबा स्हेर थेन वफादारीला राप सरल ग्योइरि व्यक्त लाबा मुबा । व्हाइखाब्रिखेन सुरेश गाउँलेला ’ओइ भरिया ज्योज्यो’ व्हाइखासे दोइ पुइबा गेनामला ल्हुइ थेन भावानात्मक स्हेर उजागार लाबा मुबा ।
व्हाइखाब्रिखेन केशव सिलवालला ‘चिबु ताङ ह्रुप्बाकेन याखारगि जामेकोला’ व्हाइखासे जात, वर्ग थेन लिङ्गला फेबादा केवा सोबा जामेकोलाला स्हेर उन्बा मुबा । व्हाइखाब्रिखेन अभय श्रेष्ठसे ‘सुकुनाराला चाङ्मा लाथान’ व्हाइखा डोबान गेनामला ल्हुइदा गेला चाङ्मा लाथानला लिरि प्रस्तुत लाबा मुबा ।
व्हाइखाब्रिखेन ईश्वर थोकरसे ‘एला मिन’ क्राछिगला व्हाइखा डोबा मुबा ।
गेताङसे ग्योइकाइ जेक्खे आहिन, गेला गरिमा थेन गेनामला केवारापकादेदा माङ्ग्यार बाबा बाङ्बा बाङ लाबा मुबा । वर्तमान कविता समुहला चु पहलसे चुह्राङ्बा काइकादेदा ग्ला पिन्बासे प्रशंसा याङ्बा मुला ।
चुसे व्हाइखा सामाजिक न्याय, सहानुभूति थेन चेतनाला स्हेग्याम दोबारि खाम्सेला पुष्टि लाबा मुला ।
(छिगला अर्थः स्यानह्युल– अन्तर्राष्ट्रिय, गेनाम श्रमिक, क्राछिग– शीर्षक, न्होर– आर्थिक, स्हु– कष्ट, म्होइबा– श्रद्धा, नाबा– भोग्ने, गे– श्रम, मोलम– याचना, ल्हुइथाङ– स्वास्थ्य, नामला– पेशा, ग्याप्पा– दास, चाङ्मा– पवित्र, स्हेग्याम– माध्यम)
तपाईको प्रतिक्रिया दिनुहोस