याम्बु । टेलिभिजन गेताङ ‘डम्फु सेलो’से गिक्छा दिङसाङ रे गेताङ दाङ्बा मुला । ‘डम्फु सेलो’ इन्डिजिनियस टेलिभिजनरि प्रसारित तामाङ सेलो दोहोरी ह्वाइ हिन्ना ।
व्हाइ कोसि डोन्बोतेन साक्षत्कार लासि खाबा गेताङ ड्वाफ्रे (जेठ) ११ कुनु प्रसारणला दिङगिक छ्योबा दुइसाङरि ल्होलोल्होलो गेताङ लासि दाङ्बा हिन्ना ।
याम्बुला चाबेलरि मुबा केएल टावररि डोल्पो टुल्कु रिन्पोछेला ग्रेनडोन्बोरि तामाङ ह्युल्बा न्हाङ्ला ल्होलो व्यक्तित्वकादेला गुङरि स्याबागोबा छ्यामला गेताङ स्हेङ्बा मुबा ।
गेताङरि ङ्हाच्छाला रिमठिम थेन पर्यटनलोन्पो हितबहादुर तामाङ, ङ्हाच्छाला ठिमलोन्पो शेरबहादुर तामाङ, प्रतिनिसभा ह्रोम्हिकादे सुर्यमान दोङ थेन विना लामा, नेपाल तामाङ घेदुङला प्रेचोहो कुमारसिं घिसिङ, स्ह्यानह्युल तामाङ परिषदला ग्रेनगाउराइ टासि लामा, तामाङ कलाकार छेनला चोहो बिशाल काल्तानसे ज्याबाम्हान्बा ल्हेङ्बो थान्बा मुबा ।
काइपाकादे मिलन लामा, शुसन लामा, योगेश लामा, सार्थक लामा, काइमोकादे निर्जला गुरुङ, मेचु धिमाल, लक्ष्मी स्याङतान, स्मिता प्रधान, अस्मिता अधिकारी, बालिका लामा छ्यामलासे ह्वाइ कोबा मुबा ।
नेपाल तामाङ ताम्बा घेदुङला टोलिसे साङसेरगेमला ह्वाइ थान्बा मुबा ।
डम्फु सेलो गेताङ इन्डिजिनियस टेलिभिजन थेन आइटिभि ग्याम साताला तिरेम सुङरे कुनु प्रसारण ताबान खाबा मुला । गेताङ दिङ गिकरि गोर च्युइ ङासे ङि बो (५२ औं भाग ) प्रसारण ताबा स्हेङखेन जगत दोङसे पाङ्जि ।
थेसे गेताङ तामाङ ह्युल्बाला सेमरि चिबारि सफल ताबा थेन ल्हानाला ज्याबा ह्रो तासि खाबा बिसि पाङ्जि ।
(छिगला अर्थः रिमठिम– संस्कृति, ठिम– कानुन, छेन– संघ, स्ह्यानह्युल– अन्तराष्ट्रिय)
तपाईको प्रतिक्रिया दिनुहोस