ग्याबा तामाङ उत्थान संघसे कुछा स्हेङ्बा रेदिङ दाङ्जि
हेराङ । ग्याबा तामाङ उत्थान संघला कुछा स्हेङ्खेन दुइसाङरि ज्याबाम्हान्बा किन्बापिन्बा लासि दाङ्बा मुला । संघसे गणतन्त्रला दुइसाङरि हेराङला कोन्ज्योसोम गाउँपालिका वडा नं. १ ला चौघरेरि भव्य लिरि विशेष गेताङ ङ्योइसाङ लासि दाङ्बा हिन्ना ।
गेताङ संघला केन्द्रीय चोहो काजीमान ग्याबा तामाङला चोहोदान थेन ब्रिखेन ओसेम अन्बेषक रविन्द्र ग्याबा तामाङला ग्रेनडोन्बोरि ताबा मुबा ।
गेताङरि सुनसरी जोङ धरान उपमहानगरपालिका १९ रि चिबा टेकबहादुर च्याबा तामाङला क्योङ दिमम्हेदा ओसेम नेपालनाङ चिबा च्याबा ह्रुइला तामाङकादेदा ग्याबा ह्रुइला हिन्ना बिसि घोषणा लाबा मुबा ।
गेताङरि ब्रिखेन ओसेम अन्बेषक रविन्द्र ग्याबा तामाङसे ङ्हाच्छा स्हेङ्बा दुइदा डान्बान संघसे लासिकेन खाबा गेजुगु प्रशंसानीय ताबा थेन संघसे दारे खाबा रेजुगुरि लातोबा गेफिरि सेमताम थान्बा मुबा ।
गेताङरि कोन्ज्योसोम गाउँपालिका वडा नं. १ ला वडाचोहो शंखलाल तामाङसे संघदा खाबा रेजुगुरि ह्राङ्ला तर्फतेन गाउँपालिका ग्याम खाम्बा न्होर ह्रो लासेला प्रतिबद्धता लाजि ।
गेताङरि घिसिङ समाजला ग्रेनगाउराइ दीपक घिसिङ लामा, अनिल ग्याबाला छ्याम ल्होलो डान्बोकादेसे सेमताम थान्बा मुबा ।
गेन्दुनला गाउराइ विकास ग्याबा तामाङसे गेताङ स्याङ्बा मुबा ।
तपाईको प्रतिक्रिया दिनुहोस