हेराङ । नेपाल तामाङ संघला केन्द्रीय जोम्ना तयारी चिसाङसे संघला जोम्ना खाबा यान्दे लारि लासेला निर्णय लाबा मुला । आदर्श पुरुष भिमबहादुर तामाङसे प्रतिपादन लाबा ‘ङोसेबा नोन स्याप्बा, द्धन्द नोन फ्याबा’ सिद्धान्तदा तामाङ संघसे जोम्नाला मुल नारा स्होबा मुला ।
तामाङ संघला केन्द्रीय चोहो रामकृष्ण तामाङला चोहोदान थेन नेपाली कांग्रेस केन्दीय ह्रोम्हि ओसेम जनजाति विभाग प्रमुख दिलमान पाख्रिनला विशेष डोन्बोरि संघला केन्द्रीय चिसाङ चिबा हिन्ना ।
चिसाङरि नेपाली कांग्रेसला केन्द्रीय ह्रोम्हि ओसेम जनजाति विभाग प्रमुख दिलमान पाख्रिनसे तामाङ संघला स्हेङ्खेन दुइहेन्से ह्राङ्से तामाङ जातिदा ज्याना लाबारि निरन्तर काइ रेन्चिबा पाङ्जि । थेसे २०६३ दिङला दुगु ३ गते नेपाली कांग्रेसला थेदुइला सभापति गिरिजाप्रसाद कोइरालासे ह्युलनाङ्ला तामाङकादेदा पोप्सि तामाङ संघदा नेपाली कांग्रेसला भातृ संगठनला लिरि स्हेङ्बा सेमताम थान्जि ।
नेता पाख्रिनसे चिसाङरि बोकिन्बा मोक्कोनदा खाबा जोम्ना खाराङ्लासि सफल ताना लासे बिबा नुररि केन्द्रित ताबारि म्होइजेन लाजि ।
गेताङरि नेपाल तामाङ संघ, केन्द्रीय सभापति रामकृष्ण लामा ’इन्द्र’से खाबा यान्देरि तासेला केन्द्रीय जोम्नादा सफल ताना लाबारि मुतेबा ह्रोजुगु सक्रिय तासि ल्हागतिबारि म्होइजेन लाजि । थेसे तामाङजुगुला ङोसेबा स्थापित ताना लाबारि सेर्खा, बार्खा, नाम, ग्लिङ आबिना ल्हागतिचिबा सेमताम थान्जि ।
केन्द्रीय जोम्ना तयारी चिसाङरि बोकिन्बा मुतेबा केन्द्रीय ह्रोम्हिकादेसे राज्यला मुलधारला तामाङ समुदायदा बातोबा तामरि बाङ पिन्जि । थेन्से तामाङ जात ल्हाना तासाइ नोन एकता आताबासे लिच्छा परतिबा धारणा थान्बा मुबा ।
चु बैठकग्याम तामाङ समुदायला सशक्तिकरण थेन एकताला लागि महत्वपूर्ण तासेला अपेक्षा लाबा मुला ।
दाते तामाङ संघसे धमाधम जोङ हेन्से प्रदेशदोनाला जोम्नाकादे लाचिबा मुला । ड्वाफ्रे ३०–३१ गते कोशी प्रदेशला जोम्ना लाबा तामाङ संघला तयारी मुला ।
चिसाङला सहजीकरण नेपाल तामाङ संघला केन्द्रीय गाउराइदिम ह्रोम्हि बिलाम मोक्तानसे लाबा मुबा ।
(छिगला अर्थः हेराङ– ललितपुर, यान्दे– भदौ, चिसाङ– बैठक, ह्रोम्हि– सदस्य, दुगु– वैशाख, नुर– विषय, म्होइजेन– अनुरोध, सेमताम– मन्तव्य, गाउराइदिम– सचिवालय)
तपाईको प्रतिक्रिया दिनुहोस