याम्बु । नेपाल तामाङ ताम्बा घेदुङसे स्हेङ्बा डु रेला डम्फु स्हेङ्बा तालिम थुम्बा मुला । ड्वाफ्रेला छेपा ङ्हा (जेठ १७) कुनु याम्बुला कागेश्वरी नगरपालिका मुलपानीरि तालिमरि बो किन्बाकादेदा प्रमाणस्यो थेन थेन्से स्हेङ्बा डम्फु पिन्बा मुबा ।
आदिवासि जनजाति उत्थान राष्ट्रिय प्रतिष्ठानला न्होर ह्रोरि ताम्बा घेदुङसे निबा १२ गते हेन्से याम्बुरि तालिम तिबा मुबा । तालिमरि गोर च्युइसे डु जोङग्याम म्हेन्दो बोगालसे निस (२७) से बो किन्बा मुबा ।
थुम्बा गेताङला ग्रेनडोन्बो आदिवासि जनजाति उत्थान राष्ट्रिय प्रतिष्ठानला ह्रोचोहो रेशम गुरुङसे तालिमरि बोकिन्बाकादेदा प्रमाणस्यो थेन् डम्फु पिन्बा मुबा । ग्रेनडोन्बो गुरुङसे तामाङला माउलिक ङोसेबा डम्फु सोना लाबारि प्रतिष्ठानला नोन भुमिका ताबासे ह्रोलाबा सेमताम थान्बान खाबा रेरि याम्बु बिमा फिक्र्याप ग्लारिनोन चुराङ्बा प्रशिक्षणकादे तासेला ग्रा पिन्जि ।
ताम्बा घेदुङला चोहो ओसेम प्रशिक्षक पासाङ मोक्तानला चोहोदानरि ताबा थे गेताङरि तामाङ लोकसम्राट चन्द्रकुमार मोक्तान, नेपाल तामाङ घेदुङला केन्द्रिय ह्रोम्हि बिलाम मोक्तान, रिमठिम घेदुङला चोहो छेवाङ तेन्जिङ लामा, स्योमि बुद्ध ह्योन्जन लामाछ्यामसे ज्याबाम्हान्बा ल्हेङ्मो थान्मुबा ।
थेराङनोनलासि प्रशिक्षार्थी साङमाला ग्याबा (रामेछाप), कुमारसिं लामा (काभ्रे), अविना ह्योन्जन (रामेछाप) थेन सोम बहादुर पाख्रिन ओखलढुंगा) से डम्फु स्हेङ्बा लोप्पा दुइला अनुभव थान्बा मुबा ।
तपाईको प्रतिक्रिया दिनुहोस