तामाङ ग्योइ, ग्योइकाइ, रिमठिमदा ल्हेना छार्ना लाबारि २४ दिङ हेन्से थेनआताना गेलासि खाबा तामाङ डाजाङ गेन्दुनसे तिनि हेन्से डम्फु ह्राप्बा तालिम पिन्बाकेन मुला ।

‘डम्फु ह्राप्पा, लोप्प गेताङ’ क्राछिगरि स्हेङ्बा चु गेताङरि डम्फु ह्राप्पा लोप्बा सेम किन्बा क्योङ्दा बोकिन्बारि डाजाङसे म्होइजेन लाबा मुला ।

गेताङ काठमाडौं महानगरपालिका वडा नं. १५ ला वडाचोहो ईश्वरमान डंगोलला ग्रेनडोन्बोरि ठ्वाङ्सेन तासेला मुला ।

तिनि स्ह्योला ११ ङ्ह्यामा हेन्से तिसेला चु गेताङ सिम्बुला बिजेश्वरीरि मुबा तामाङ कुदाप धिमरि तासेला मुला ।

तामाङ डाजाङ गेन्दुनसे स्हेङ्बा चु गेताङला लागि काठमाडौं महानगरपालिका वडा नं. १५ से न्होर ह्रो लाबा मुला ।

तामाङ डाजाङला चोहो फुलकुमार बम्जनला आन्सार चु गेताङसे डम्फु ह्राप्पा लोप्बा जेक्खे तासेला आरे । डम्फु लोप्पाला छ्याम तामाङ व्हाइला लय, ताल थेन स्याबा ग्युइल (कला) नोन लोप्सेला मुला । चोहो बम्जनसे बिजि, ‘म्हासिकेन निबा ग्योइ, माउलिक रिमठिमदा सोना छार्ना लाबारि ह्रोल्ज्याङ (बाजागाजा) ग्रेन हतियार हिन्ना ।’

थेला आन्सार चु तालिम ग्याम तामाङला डम्फुला प्रचार जेक्खे आताना लय, ताल थेन ग्योइ नोन प्रचार प्रसार तासेला मुला ।