तिरेकुनु फ्लिदोसि खासेला मुला जामेकोला
याफ्लारि ल्हे थोसि
या तासेला मुला थेला कासे छ्योपबाम्बा
सुङग्याम ब्योङ्बा का गोइलोरि हार्सेला मुला ।

दोसि गोल्छेसे थेला सुङदा बानी तासेला मुला
गोइलोला ताङ्बा छोन थेला लिरि दोसि खासेला मुला
थेसे डान्सेला आरे म्लेसि नोन
ह्राङ्ला याफ्लाला बारे, ल्हेला बारेरि नोन ।

तिल्दाबिसाम जामकोलासे तिगाइ डान्सेला आरे
ओम चुह्राङ्लासि लोङ्बाग्याम क्यार थारेङ निसि
व्हा बिले लोङ्बाला गुङ्नोन गुङ
जामेकोला जाकि नोन दार्सेला आरे
चुह्राङ्बा तिगाइ ताबा आरे, थेसे थेला तिङ दुर्ना लागाइ ।

जेक्खे खाइमागि थेला
याखारगि म्हाङ दुर्सेला मुला
व्हा म्हाङरि जामेकोला ।

थेलिच्छा खाइमागिजेक्खे खाबा रे जामेकोला थोन्सेला मुला 
म्हाङ्ला नालग्याम फेबा ‘लिथडी’ ल्हुइ थोसि
थे रेहेन्से ल्हानान रे लिच्छा
याफ्लारि ल्हे थोसिमाम ।

थे रेहेन्से ल्हानान रेदोना
म्हाङला जामेकोला छोर्सेला मुला
दोपदोप्बा इनाररि
ह्राङन्हाङरि मुबा थेला कानो याखारगि स्यान्दो जामेकोलासे नोन
खाल्से थेला मि च्याला थेलान
काना दोना लापिन्न...

जामेकोलासे म्हान्सेला मुला–
खाजिबा बो कानो दोतोबा मुबा, थे ताजि
कादे कुटिसि चितोमुबा, थे चिजि
कादे लाचार तातोमुबा, थेनोन ताजिन्जि
दोसि दारे थेसे तिगा लाबारि लेङ्बा मुला
दोपदोप्बा इनाररि चिसि ?

थेसे चु क्योङ डान्सेला मुला, जेक्खे म्हाङरि
म्राङ्बारिम थे माङ्ग्यारग्याम आउदिन ताङ्बा म्राङ्मुला
सुङरि थेला ल्हे आरेसाइ नोन
मिसे थेसे म्राङ्बा बिमा थारेङ म्राङ्साइ नोन
छोन थेला लिरि च्यागारच्युगुर तासाइ नोन ।

ल्हेला बारे थेसे खाइमाइ डान्सेला आरे
म्लेसि नोन 
न्हा ल्हेला बारेरि
न्हा याफ्ला बारेरि
न्हा सुङफिला बारेरि

(छिगला अर्थः दार्बा– काम्नु, दुर्बा– धड्कनु, खाइमागिजेक्खे खाबा रे– विरलै, ‘लिथडी’ बिबा छिग राजस्थानी/मारवाडी छिग हिन्ना, चुला अर्थ ल्हनान कमजोरी ल्हुइ मुबा जामेकोला व्हा चन्चल, नखरा उन्बा बिबा ताबा चिम)

(हिन्दवी अनलाईन ग्याम)

दोःबा : यकिना अगाध