ङा साजाम्बुलिङला गिक्छा म्हि हिन्ना, 
ङा खाजिबाइ ऋषिला अवैध सन्तान आहिन ।
रामायण–महाभारतला नीति रापजुगुतेन ङाला खाजिबाइ सरोकार आरे । 
ङानोन भारतसाला गिक्छा पूर्वज हिन्ना । 
न्हा ङा आस्तिक हिन्ना
न्हा ङा नास्तिक हिन्ना 
ङामि यथार्थवादी हिन्ना ।

न्हा ङा नाम्साला हिन्ना
न्हा ङा अशिक्षित हिन्ना
ङामि आदिवासी हिन्ना ।

प्रकृतिला ग्योइ गोबा
प्रकृतिला ठिमजुगु गोबा
ङा गिक्खे म्हि समुह हिन्ना ।

न्हा ङा धर्म पोबाला लोङ्बासे पहाडरि लाबा मुला
न्हा राज्यला लोङ्बासे ह्रिरि शरण किन्बा मुला
निस्वार्थ ह्राङ्ला बाङरि ह्राङ्बाङ्बा सोना लाबारि खाम्बा मुला 
न्हा ङाइ मुगल व्हा अंग्रेजकादेला चाकरी व्हा ग्याप्पा स्वीकार लाबा मुबा
न्हा ङाइ ह्राङ्ला आङा जामेकादेदा उपहार पिन्सि संरक्षण ह्रिबा दोङराप थोबा मुला
अरावली, विन्ध्याचल, सातपुडा ताबान ह्रि महलदोनाला पहाडकादेरि 
ङाला पुर्वजला गोङ्मा दातेइ लेङ्बा मुला ।

ङा केबाहेन्सेला ह्राङ्बाङ जीव हिन्ना
ङा आदिवासी हिन्ना ।

न्हा ङा बामान (पुजारी) हिन्ना
न्हा ङा क्षत्रीय (रक्षक) हिन्ना
न्हा ङा वैश्य (छोङ्खेन) हिन्ना 
न्हा ङा शूद्र (सेवक) हिन्ना
ङा चु ब्लि नोन गुणकादे मुबा गिक्खे जात हिन्ना
ङा आदिवासी हिन्ना ।

न्हा ङा इसाइ हिन्ना
न्हा ङा हिन्दू हिन्ना
न्हा ङा मुसलमान हिन्ना
ङा प्रकृति मूलक आदिवासी हिन्ना ।

न्हा ङाइ पाप–पुण्य, थोप्साङ व्हा दोसिकेबारि विश्वास लाला
न्हा ङाइ पाखण्ड, कर्मकाण्ड थेन अन्धविश्वास ल्हेना लाला
न्हा ङाइ स्वर्ग–नर्कला सेम थान्ना
ङाम प्रकृतिला कोला हिन्ना 
ङाम आदिवासी हिन्ना ।
भारत ।
(छिगला अर्थः साजाम्बुलिङ– पृथ्वी, ठिम– नियम, ह्राङ्बाङ्बा– स्वतन्त्रता, छोङ्खेन– व्यापारी, थोप्साङ– भाग्य)

दोःबा : यकिना अगाध