च्युइसे सोम दिङ्ला जागिर ल्हामरि
ल्होलो स्हु नाजि
ल्होलो स्हेर पुइजि
राप नोन रापला बो मुला
नाबान नाबाला सााङ्मो मुला
तिनि ङा ताबा मुला
याखारगि खेप्पा पेन्सनर मास्टर
ह्राङ्ला ग्योइ नाङ्सि
स्यान्दोला ग्योइ लोप्तोबा मुला
ह्राङ्लान ग्योइ लोप्बारि आम्याङ्बा
चु खाराङ्बा विडम्बना !
च्युइसे सोम दिङ डोजि स्यान्दोलन ग्योइ
म्याप्जि स्यान्दोलान हिगि
दारे बिदा किन्बाकेन मुला
पेन्सनर बोक्टो खेप्पा मास्टर दोसि
तलब आतो
राज्यला चाचा चातोबा आरे
म्हाइलाबा ह्राङ्लान हिगि लोप्बारि
खासेला मुला जरुर
डोबा बिमा स्यान्दो
स्यान्दो नाम आसेनि
केवानाङ इमानदारीता लोप्जि
तासाइ इमानदारीताला चुरि
खाजिबाइ साइ आस्याप्नि ।
बिबासे
केवा गिक्खे नाबा हिन्ना बिमुला
ओम ङाइ केवादा चोदे नाजि कि,
चुदा ङ्हेना लाजि बिसाम
ल्हालो स्योङ ब्योङ्सेला मुला ।
ग्युइलाम तिगा ताम
तिगाइ पिन्जि ओम तिगाइ किन्जि ताला
चु महासागर तारतिबारि
सायद केवा गिसे आछ्यो ताला
ङाम ग्युइला स्योङ तारतिबा माझी
स्यान्दोदा स्योङ थापिन्सि
ह्राङ्जा जासामनोन चिचिला
चुनोन स्योङ, गान्दि, लाबा थेन ल्हाप्तेबादा
ह्राङ्ला राप पाङ्चिला ।
खाइमागि
दिङ्छा डोबा लोप्खाङ च्यासि सोचतिला
कोइलीदा ग्रेवाला ग्योइ लोप्जि
ग्रेवादा मैनाला ग्योइ लोप्जि
झरनादा हुइला ग्योइ लोप्जि
हुइदा झरनाला ग्योइ लोप्जि ।
दाते ङा याखारगि खेप्पा पेन्सनर मास्टर दोबा मुला
ओम चु प्रकृतिला कुरि चिसि
थोम तासि डान्चिमुला
ङाइ लोप्तोबा
देन्बा तिगा मुबा ?
(छिगला अर्थः सेमताम– आत्मलाप, ल्हाम– यात्रा, स्हु– दुःख, नाबा– भोग्नु, स्हेर– कष्ट, बो– चाङ, राप– कथा, साङ्मो– बिस्कुन, म्याप्बा– घोट्नु, हिगि– लिपी, नाम– इलम, केवा– जीवन, साइ– मूल्य)
दोःबा : यकिना अगाध
तपाईको प्रतिक्रिया दिनुहोस