थेदुइरि खालाइला लागि
म्हेचाबा ग्योइ मुबा
खालाइला लागि भोटे
ओम खालाइला लागि मतवाली
ग्योइलान कारण फुर्बा, पेम्बा
दोर्जे थेन छिरिङकादे
लोप्डारि अपहेलित तातोमुबा । 
लोप्खेनसे ङ्योइबाकेन लामा
थेन्से पाङ्बाकेन लामा
लोप्डासे ब्रेमुबा 
डेक्स, बेन्चकादेसे मि स्योङ्मुबा
सेम पेमुबा ।

आमासे ङोसेना लास्ह्युबा
आपासे लोपस्ह्युबा
ज्योज्योसे सुङस्ह्युबा
नानासे उनस्ह्युबा बिमा
स्यान्दोन चिम
स्यान्दोन बिबा चिम
छोर्मुबा ल्हे तिल्दा थेन्नाह्राङ आछ्यार ? 
उच्चारण तिल्दा थेन्नाह्राङ आता ? 
तिल्दा ङाला व्याकरणरि 
आकार जेक्खे ल्हाना खाला ? 
डेङकादे तिल्दा ङादा जेक्खे च्याला ? 
ङाल हुलियासे स्यान्दोला नार्तु नोला 
ङाला ह्रिक्पासे थेन्ना सहास ल्हेला 
चुह्राङ्बान संघर्षला कादे कुइनेटोकादे वाइसिमाम
ङाला आमाला कुतेन थुइबा
ङाला आपाला डम्फुतेन डुप्बा
पुर्खाला ङोसेबातेन थुइबा
ङाला चु साप्रातेन थुइबा
ङाला ग्योइ दारे ह्राङ्बाङ दोबा मुला ।

दारे ङाला माम थेन म्हेमेकादेसे
आस्याङ थेन आङिकादेसे
ज्योज्योआले थेन नानाआङाकादेसे
पाङ्चिबा, खालाइसे ङ्यान्चिमा
गर्वसे कु बोसेला मुला । 
पेम्बा, दोर्जे थेन छिरिङकादेसे पाङ्मा
लोप्डा अनुशासित तासेला मुला
डेङकादेसे धर्य तासि ङ्यान्सेला मुला
डेक्स थेन बेन्चकादेसे स्वीकार लासेला मुला
ग्योइला वानरि
रङ्गी चङ्गी म्हेन्दोकादेसे
जेसेला मुला
ग्योइला वान
मुतेबा म्हेन्दोला जेबा म्राङ्सि
ङा, थे थेन थेनिकादे ह्याङ तासेला मुला
ङाला थेनिकादेला थेन थेनिकादेला ह्याङ्ला तासेला मुला ।
(छिगला अर्थः वान– वगैचा, लोप्डा– कक्षा, लोपखेन– शिक्षक, ब्रेबा– गिज्याउनु, ह्रिक्पा– स्वभाव, ह्राङ्बाङ– स्वतन्त्र, बोबा– फुल्लिनु)

दोःबा : यकिना अगाध