ल्हाम नोन ल्हामला ल्होला
जिजिविषाला अनौठो
थेनआाना ल्हामजुगु
खाइमा खानाङ खाइमा खानाङ
खाइमा दिमम्हेला चेगाइ
ह्राङ्लान ग्योइला चेगाइ
ह्रोजुगुला चेगाइ
ह्राङ्लान संस्कारला चेगाइ
ओम ह्युलला चेगाइ ओतेबान
चगाइ ल्हागतिसि नोन आताबा चिम
ह्याङ्से तिगाइ लाबा ग्ला आयाङ्माहेन्से
‘चेगाइसे जाम्बुलिङ’ आन्हा बिबाह्राङ
ह्राङ्लान केवाला धरातल
डान्सि नोन उदेक छोर्मुबा
खाइमा चु आतानि
खाइमा थे आतानि बिसिमाम
दुइसे सीमा थाल्बाकेन लामा
नेताला ल्हुइज्यो थेन
थेला ङेङ्गोरसे
राइ दोसाइ नोन
ह्युलला ग्यालठिमसे राइ दोबारि आखाम्मा हेन्से
ग्यार्जाछा छारिब्योनकादेसे ह्युल ख्लाबा लर्कोरि 
म्हेछाबा विमानस्थलरि 
मोक्कोेनतेन फेतोमा
स्हेरला मिख्लि थेन बोल्बा 
बरु दुर्सारि ओते मिख्लि आब्योङ ताला
बिमानस्थलरि बुमछा छारिब्योनकादेला
मिख्लिला फ्रुम–फ्रुम डिक्सि
समुन्द्र दोबा मुला । 
मिख्लिला दुर्सा दोबा मुला
ह्युल्बाला मिख्लिला साइ
हिसाब लाबारि आखाम्ना
सरकारला मि काना तामाहेन्से
ङानोन थे निधो लासि लर्कोरि वाङ्जि
मेनपावरला प्राबा साइ ओस्बान
ओम
ह्युल, दिमम्हे, ह्रोजुगुग्याम 
थारेङ तातोबाला बोल्बादा
ग्लागिरि पोरे जोर्सि
ह्राङ्लान न्होरसे चुङ्सि 
मुला खासुला तिङ क्लेसि
समुन्द्र क्याम्साङ्ला ह्युलरि 
गोङ्मा जुबाकेन लामा
केवाला ग्यार्जाछा ल्हामकादेरि 
स्याप्बा थेन फेबाला सीमा आतानि
खालाइ ह्रेङ्बा ल्हामला नोन
डान्बारि लायक आतानि
खालाइ तुन्बा ह्रुपरिन
आफ्याबा छाप तापिन्जि
थेदा खासु क्याम्साङ्ला
स्यान्दोला ह्युलला ल्होलो
परिवेशदा छ्योल्सि डान्चिजि
ओम
मिला समुन्द्र ब्योङ्मुबा
खाल्से थेला कल लासि
छार ह्युल
छार परिवेश
छार छोनला म्हि
छार ग्योइ
छार धर्म 
मुतेबा मुतेबा छारतेन छ्योल्मा हेन्से
ङामि इशारारि ब्राबा
ताइह्राङ दोबा मुला
क्योलोलो केबा लाइनुह्राङ ताबा मुला
च्यासि ङेमुबा 
ङा नोन ङोजि
छोर्जि !
ङामि क्योलोलो केबाला चिम ।
(छिगला अर्थः केबा– जन्मेको, ल्हाम– यात्र, थेनआताना– अनवरत, चेगाइ– माया, केवा– जीवन, राइ दोबा– कोल्टे फेर्नु, बुमछा– लाखौं, प्राबा– चर्को, साइ– मूल्य, न्होर– पैसा, छ्योल्ब– मिसाएर)

दोःबा : यकिना अगाध