प्लेन गि
जेक्खे प्लेन गि
गेङला म्लिक्कारि
तिरेकुनु
आमाग्योइकादे चुह्राङ्लासि म्हासेला मुला
खाराङ्लासि
म्हाजि दोङरापला गर्भरि
थे डाइनोसरकादे ।
थेदुइ
थेदुइ जेक्खे
गेङला लिच्छा लिच्छा
छ्योङ्चिबा म्हिकादे
बिबारि चुसेला मुला–
ङा खाला हिन्ना ?
खाइ ङाला ग्योइ ?
ङाला ह्युल खानाङ मुला ?
गेङतेन
हिन्ना, जेक्खे गेङतेन
ह्राङ्ला आमाग्योइदा सेबाकादेसे
याङ्सेला मुला, थेदुइरि
खाजिबाइ पार्करि
सडकला गुङरि
व्हा सरहरला गुङथामा
जेक्खे
गोइलो, कु, सालिक, चिन्हकादे
म्युजियमरि ज्योथान्बा
ह्राल्ज्या ह्रोल्ज्याङ ।
गोइलोतेन तासेला आरे ग्योइ
चिन्हतेन तासेला आरे ग्योइ
सालिकतेन तासेला आरे ग्योइ
कुतेन तासेला आरे ग्योइ
ओम एला बिबा
ह्युलतेन तासेला आरे ग्योइ
स्हुला ताम मि
चु तासेला मुला कि
ह्राङ्ला ग्योइदा युग युगदोना होङ्ना लाचिबा
थे ह्राल्ज्या ह्रोल्ज्याङसे नोन
म्लेसेला मुला आमाग्योइ ।
चुलिच्छा
म्हिजुगुतेन
ग्युइ तासेला आरे
विज्ञान तासेला आरे
सभ्यता तासेला आरे
ह्युल तासेला आरे
ङोसेबा बिबा तिगाइ नोन तासेला आरे
मुतेबा म्हि गिक्खे तोसोला
बिले कपीपेष्ट दोसेला मुला ।
तासेला मुला ओम जेक्खे
या यारि प्लेन काकार गेङ ।
थेदुइरि
हिन्ना, थे दुइरिन
क्रासि क्रासि
दोङरापसे पढाइतिसेला मुला
डाइनोसर दोबा
म्हिला सभ्यता थेन आमाग्योइला चेगाइ ङ्हाम्बा राप ।
(छिगला अर्थः म्लिक्का– लोभ, ज्योबा– सजाइएको, ह्राल्ज्या ह्रोज्ल्याङ– बाजागाजा, स्हु– दुःख)
तपाईको प्रतिक्रिया दिनुहोस