खाराङ्लासि मुला आकार
ङोसेबारि आखाम
थेह्राङ्नोन लासि ङोसेजि ङाइ एदा
खाराङ्लासि ङाइ ङोसेजि–
ङोसेबारि आखाम्ना आखाम्नान 
खाइ खाराङ्लासि सुबारि दोजि 
चेगाइला डहु दोङ
एला अज्ञात ङोसेबा न्हाङरि लाबा ए
रहस्यमय अमेजोन ह्रि न्हाङरि 
खालाइसे स्यापआम्याङ्बा
अनौठो प्रजातिला जैविक जीव ह्राङ्बान
अचम्म छोर्बा मुबा
प्रशंसा आरेबा ए थेन ङा–
अस्थिर सम्बन्ध
जुग थेन जमाना मुुबा साक्षी
ल्हेबा मुबा बिले चेगाइ !
ऐजेरु ह्राङ्नोन बुबा मुबा
केवाला हाँगा हाँगारि चेमोला म्हेन्दो
ल्होलो छोन थोसि
सार्बा मुबा मौसम मौसमरि 
भरोसामय आशाला आशावादी पुपुकादे
स्वर्णिम आनन्दित सहवासला दुइ
केवा थेन जोवनला उन्माद
उत्ताउलो तासि
बर्खे खहरे च्योच्यो ङा एरि, ए ङारि
तामुबा म्ह्युबा 
चेगाइ न्हाङ्ला कोलाज ।

ङा ब्योङ्मुबा
स्योङ ह्राङ, स्योङतेन दोबा लासि थारेङ थारेङ
एसे म्रासि चेगाइला नाङ्साल 
ब्रान्सि चिमुबा । 
दिङ्छा स्योङ गुला बगरसे ह्राङ
सम्झौतारि सोबा केवा
डान्बाला न्हानजुगुरि 
डान्बाला मिख्लि धारासे बाम्बा तामुबा
खेसिकेन निबा सग्लो दोङ्ला
सग्लो ए थेन ङा चिबा खिदेखेप्पा बेन्च
ब्रान्बाला पारिलो ब्लेनाङ
बसन्त ङ्योइबाकेन लाबा कोइलीला काइसे
डान्बा दोबाकेन लाबा
एसे ह्राप्बा बाँसुरीला काइ डान्बारि दोला
तिक्खुरि मौनतादा हापख्वाइसि
गिक्खे गिक्खेन
एला डान्बारि, एला डान्बारि 
बाङ्से क्रासि सेम ख्रुला । 
क्योङरेम डान्ना
क्योङ म्हुन म्हाङकादेरि म्राङ्ला
ल्हागतिचिबा हिक्कु एदा डान्मा
तिक्खुरि थेनचिला
तिरे जेक्खे ताम लाआम्याङ्मा
थे रे दिङछा ह्राङ ल्हागतिला
खानाङए चु मुतेबा
कोलाज चेगाइलामि आहिन ?

दुनियादा मुतेबा पन्ध्रौं रेरि
म्हुना गि म्लाङ होइस्हेर बोलासि
लानि फेला । 
दोप मुला कुरि 
खालाइमागि ए थेह्राङ्लासि लानि ह्राङ लामा
ङा म्लाङ म्हुनला 
म्लाङ कल्पनाला ग्याम ग्यामरि 
चुह्राङ्लासि म्हाइसि म्हाला
खाराङ्लासि गिक्छा रेम छार ग्लारि दोबा
लहामरि ल्हामम्हि म्हाला । 
एला ब्रान्बारि 
रे ह्रेङ्बा छोर्मुबा, म्हुनमि झान ह्रेङ्बा
ख्रेन्बा–फुइबा म्हाबा चिम
सेमग्याम
ए खाबा ग्लारि परिबन्दला गारा ल्हागतिमा
सेमला भवसागररि 
ममताला दोंगा, वियोगान्त वियोगला लुङ्सुरसे
क्यार ह्योङ मार ह्योङ तासि
अन ब्यालेन्स तामा
आउदिन लोङ्बा ज्वालामुखी
फोबारि म्हाइबा चिम
ए थेन ङा छ्याम आतामा
सेमला क्यानभासरि सेम सेमरिन
गि आहिन ल्होलो
लारग्युङरि आवाङ्बा छोन ह्रुप्सि
छोन आरेबा केवाला
चे थेन व्हारिरि 
छोन मुबा चेगाइला अनौपचारिक अनौठो लि
फ्यातेन ब्योङ्बाकेन मुला
कोलाज चेगाइला । 

दातेः साईप्रस, लिमासोल ।

दोःबा : यकिना अगाध