स्ह्योरि ङातेन रेला 
मे फुइला
खोले दाइला 
म्हेख्लि होला
पाते दाइला
गाटा च्याला ख्रुङ्ला
दिमला धन्दा सेजिन्बा मुला । 
कागजला म्हेन्दो हेन्से
टुबाक दोना स्होला । 
वान फ्याल 
या ङ्हीसे च्योच्यो
चलप लाला हथौडा
ख्यारख्युरला फोहोर ग्लागिरि ह्रुप्सि
मे म्राला । 
आमाला डेबा क्वान डुप्ला
डेबा ख्यासि क्वान्ना
नाम्साला जेबा मिरि थान्सि
म्लेपिन्ना– 
अत्याधुनिक इच्छाकादे । 
मुतेबा काक्ताला कारण मुला, बिला
ओम छिम्बा नोन मुला, बिला
टुला छोन नोन गोबा मुला 
दृढ विश्वास थेन इच्छाला छ्याम
जिम्मेवारीला बामकादेसे पुइचिबा मुला 
अभावला दोइ । 
थेदा
‘आरती’ला बिमा
खलाँतीला काइ सेम निला । 
‘लाथान’ रि म्राबा धुपकादे बिमा
जेठी सर्किनीला टु ज्याबाथाङ खाला । 
कोकाकोलाला ब्रोइ थाहा आरे
वात्तिला क्युइ म्लेबा आरे 
थे माकाइ चुङ्सि
चाउचाउ ग्लुसि आचा । 
लाप्तेकादे थुइसि
टपरी स्होबारि सेबा मुला
ङ्हे ङ्हेला 
दही, मोही थेन म्हार स्होला । 
रा नोन न्हाबा मुला
खोरनाङ । 
तासाइ नोन तिल्दा सातान
फेल ताला थे जाँचकादेरि ? 
सर !
ङा छ्योइसाङ तामाङला आमा–
मसलीमायासे चोदे ल्हाना गे सेबा मुला
यारि नाम मुबा 
ह्रिक्पा, स्वभाव सेबा ङाला जामे
तिल्दा ताला सातान फेल ? 
तिगा ह्राङ्ला लोप्खाङरि 
गेला जाँच आता ?

(छिगला अर्थः गाटा– करेसाबारी, वान– झाडी, काक्ता– समस्या, छोन– रङ, नाम– शीप, छिम्बा– समाधान)

दोःबा : यकिना अगाध