पाडाम्हेन्दो ह्राङ लासि तामाङ ह्युल्दा छार लागे
तामाङ ह्युल्से तेन्बाला विधि विधान ब्रीसि बागे ।
विधि विधान ब्रिबारि जोङ जोङ्ला तामाङ गिक तागे
पेङ्दोर्जे म्हेमेसे स्हेङ्बा ठिम सिंह दरबार पेश लागे ।।

प्राङ्बोला मलम थोसि ब्राबा पेङदोर्जे म्हेमेला ङा कोला
ताम्बा, बोम्बो, लामा संस्कार तामाङला, सरकारसे चु ताम गोतोला ।
तामाङ संस्कार न्हङरिरि ङ्हान्बा जातिला ताम आरे ह्युलठिमरि ब्रितोला
ताम्बाला काइरन लासिनाम फुरफुर ह्युल ताङ्ना लादोला ।।

आदिवासीला ताम खाजि तामाङ संस्कार विधान आखानि
मोक्कोन तामाङ जोम्दोजि सरकारदा पाङ्बारि विधान स्होबा आतानि ।
तामाङ संस्कार ग्योइ गोइलो ब्रिसि ह्युलठिमरि थान्सामि
ल्होछार नाम्सारि दाङ्सेला सोमरे विदा याङ्सामि ।।

ठुङ्सा, बाप्सा साङसेरकेम आम्माइले होइ ताम्बासे बिमु आम्माइले
सरकारी गेला लागिरि बाबा मुला आमाग्योइ थेन बाइला ग्योइ ।
पास्नि, छेवार ब्रेल्साङरि पाङ्गे बिगे ताम्बाला काइ
सरकारी ताजि आमाग्योइ फुरफुर ताङ्सि बेनान स्याइ ।।

आलाबा आहिन सरकारसे लाबा मुला गेकादे
आडिक्पा विधि विधानदा डिक्ना लासि ब्रिसी बागे ।
तामाङ न्हाङखोरकादेला सरकार थोरिन मुला झुकाब
विधान सच्याप लादोबा (सरकारदा फुल्जि सुझाव...२)

(छिगला अर्थः स्यो– पत्र, ह्युलठिम– संविधान)