बेरोजगार ताजि मुतेबा छारिब्योनजुगु
तिगाइ आरे गे दोइ नाम्सा दिमरि
डोबाला रहर ग्युइसेर–ग्युइला ताम
लुबा ग्लेठिमसे आश्वासनरिन थान्बा ताजि चु ग्लारि । 
आशा ताला सेमरि भरोसा ताला
ह्राङ्से तिगाइ ज्याबा लाला बिसिमाम ।
ह्राङ्लान म्हाङ्ला दोइ काप्सिकेन निला
दिमथेमेला जिम्मेवारी ओतेन ल्हेसि निला
चुनोन तामला तनावसे खाइमा
आम्हेर्नान म्हुन निला,
ओम खाइमा रे ह्रेच्छाकरि नुप्ला । 
खाला मुला ले बाध्यताला डुङ्बारि 
फसआतिबा, आखिबा चु जाम्बुलिङरि 
ह्राङ्लान मिख्लि थुङ्सि सोतोला
कादे अनौठो स्हेर मुला सेमरि । 
दिङ थाल्सिकेन निला झन
ह्राङ्ला लिउला तामजुगुसे सताप लाला
तिगा लासे खाइ केवारि बिबान
मिख्लि थेन मिछामजुगुसे मुतेबा दुइ नारा ल्हागाब लाचिला । 
सेमला रहर जाजान ताला
बाध्यताला ङोन्छाङ छाला–ताङ्ला बिना बिनान
थाल्बाचिम दिङ गाङ ङिस थासि । 
खाइ ! खाइमा खाला थे सुखला रे
ङाइ कोशिस लाचिबा मुला
आब्रे ङा खाइमाइ, आल्हे खाइमाइ ग्याप्से 
थेनआताना ङ्हाच्छा वाङ्चिमुला
पुजुतारला ग्यालाम तासिमाम ङा
केवातेन ग्रेन युद्ध छेबाकेन मुला । 
लोवर लिङ्गतेन, बिजनबारी, दार्जिलिङ, भारत ।

दोःबा : यकिना अगाध