गोर्गि च्यानदा सेसि ब्याङ्जि
क्योङ डिक्सि ताप्जि थे च्यानदा
तिनिन्हाङ्गार ल्हानान ल्हुन्दिकादे
च्यानदोसि थोन्बाकेन मुला
म्हिला का सिप्परि ।
ह्युलरि क्योङ ह्युल्बाकादे
नोइसे, ख्रेन्बासे आन्हेम शोकसे
सिसाइ नोन, दुङाल तासि क्रासाइ नोन
मानवता ओन्छेला आरे थे च्यानसे
सेवाला भावना ओन्छेला आरे थे च्यानसे ।
म्हिसे छेक्सि, ताप्सि ल्हुन्दि दोबा थे च्यान
म्हिसे अगोना ‘सिंह’ दोना लाबा थे च्यान
चु च्यानला गे म्हिला हिंसा लाबान हिन्ना
नाम्सादिमरि वाङ्सि आतंक माजिङ्बा हिन्ना
च्यानमिम लिच्छारि च्यान नोन हिन्ना
च्यानमिम खाइमान म्हिला ह्रो दोआखाम
च्यानमिम खाइमान ह्युल्ला संरक्षक दोआखाम ।
खबरदार... !
छार च्यान नोन खेबाः च्यान दोसि थोन्बाकेन मुला
ह्युलरि हिंसालु च्यान वाङ्बा दुस्साहस लाबाकेन मुला
आतंक माजिङ्बा थेन च्यान हाबा केन्मुला
निरंकुश दोसि थेमि नाम्सादिमरि वाङ्बाकेन मुला ।
नाम्सादिमरि वाङ्पुङ्ला आदे थे च्यानदा
क्योङ डिक्सि ताप्दोला थे हिंसालु च्यानदा
क्योङ डिक्सि ब्याङ्दोला थे छार थेन खेबाः च्यानदा
निरंकुश च्यानला आतंक ग्याम्से
मुक्त लादोला ह्याङ्ला नाम्सादिमता ।
काभ्रे ।
तपाईको प्रतिक्रिया दिनुहोस