‘ङादा सहानुभूति आहिन । खाम्साम ह्रो पिन्गो, आखाम्साम ठ्वासि आपिन्गो । सोबारि पिन्गो गिक्खेन । ङादा थाहा मुला, आखाम ताला एह्राङ्नो लासि सोबारि । तासाइ ङाइ कोशिस लाला, सोसिमाम उन्सेला मुला गिक्खेन । ए आउदिन सुखरि सोउ, ङेगो । ङाइ तिगाइ गुनासो आला । ङाइ एदा स्हु पिन्बा गे खाइमाइ आला । तिगा मुबा, तिगा ताजि थे क्योङ आज्याबा म्हाङ डान्सि म्लेबा बाङ लासेला मुला । कोशिस जेक्खे आहिन, ङाइ म्लेला । संयोगसे खानाङए ह्रुप तासाम ङोआसेबा दोसि ग्यालाम ख्योसि ब्रापिन्गो । ङा चुरिन ताङ्सेला मुला ।’ चुह्राङ्बा चुह्राङ्बान क्योलोलोला ङ्हाउरि घटतिबा वियोगान्तला छिङ्गाइ रापदा डान्सिकेन अनामिका याकार, ङ्हाच्छारिक्यार ङ्हि तासि चिबा जेबा पार्कला निर्जीव एकान्तला गिक्खे खेबाः सिङ्ला बेन्चरि थोमतासि थाबाकेन मुबा दुइ ।

न्हाब्याङरि थुइबा एयरफोनरि बरिष्ठ व्हाइखाब्रिखेन किरण खरेलसे ब्रिस्ह्युबा माइती घर सिनेमाला व्हाइ ङ्ह्याचिबा मुबा–

‘बाँझो ताजि जाम्बुलिङ चु
ब्लोबा म्हिजुगु–
वसन्तरिन बिधुवा तासि मे दोजि म्हेन्दोजुगु... !’

व्हाइला छिग छिगसे सेमदा जेक्खे थुर्बा आरेमुबा अनामिकाला । थे व्हाइला अन्तरा ह्राङ्लान लागि ब्रिबाह्राङ छोर्चिबा मुबा । ङमला ङ्हाउला असफल चेगाइला ङ्यान्दि रेमरेम मिख्लिसे बाम्बा सेमदा साङ्बारि चुह्राङ्लासिन एकलासला गिक्खेपनदा दाम्बा लाला । थेरि दिनिसे थेदा, थेसे दिनिदा म्राङ्बा तागाइ ।

ङ्हाच्छा ङ्हाच्छारि दुइला आउदिन ख्याल लामुबा अनामिका । तिन्हाङ्गार बेफिक्री दोबा मुला थे । थे दुइतेन आताना दुइ थेतेन टुइसिकेन ब्राबाह्राङ छोर्ला । स्यान्दो छोर्बा दुइरि थे म्हेर्ला । स्यान्दो म्हेर्बा दुइरि थे रेला । सेमन्हाङरि ङ्योलोक्चिबा बिचलित तरंगजुगुला स्युगदा सम्हालाप लाबारि खामआखाम ताबाह्राङ छोर्बा ह्राङ्सेन लाबा मुला । सेम स्थिर आताबा छोर्बासे सेमन्हाङ्न्हाङ बिपासेना निबा योजना स्होला । सेम न्हाङ्न्हाङ स्होबा योजना सेमन्हाङरि नाइना लाला ।

ङ्हाच्छाला ह्राङ्बा स्फुर्ती आरे थेतेन । ताङ्बाला ठिक लिसो दुःखि मुला । ख्रेन्बा आहिन दुइ दुइरि ख्लासि निबा निर्मोहिला डान्बासे गिक्खेन बोटोक्बारि सेम निला । सेमला डिहिवानरि ह्रुपताला । सेम सेमरिन बिदा लासि निला । चुह्राङ्बा चुह्राङ्बान लथालिङ्ग ताबा मुला केवा ।

रेदाङ्से साम्सिकेन निबा लि मुला, आमासे बिसाम ङ्हाच्छा ङ्हाच्छारिक्यारला दापलुङ्बा लिला बारेरि ङ्योइचिला । आमासे ङ्योइमा थुन्बारि ठिक मुला ङादा बिसि टाराप लापिन्मुबा ।

अनामिका ज्याबान मध्यम बर्गीय दिमथेमेरि केबा । आपा आमाला गोर ङ्हि तान्बा गुङ्ला थे माइ जामे । थेबिमा दिरि याखारगि आले । आले लोप्खाङ डोबाकेन मुबा । आपाला सरकारी जागीर  । सेक्सन अफिसर याखारगि सरकारी गेदिमला । आमा गृहिणी जाजामेला न्हाबा छार्ना लाबारि ब्यस्त ।  पुख्र्यौली दिम सुदुर पश्चिमरिक्यार तासाइ नोन केबा छार्बा याम्बुरि ।

ज्याबान प्राईभेट लोप्खाङग्याम लोप्खाङला ग्युइसेर जिन्ना लासि याखारगि प्रतिष्ठित प्राईभेट कलेजरि ब्याचलर ङ्हिछा दिङरि खेडोब लाबाकेन लाबा अनामिका । जेबाम मुनोन मुबा थे । माङ्ग्यार च्यामा कादे जेबा मुबा थेबिमा ल्हाना जेबा थे न्हाङ्ला असल गुणजुगु आउदिन मुबा । थेला प्रशंसा लाबारि लिच्छा आतामुबा थेदा ङोसेबाजुगु ।

दुइ, छ्याम थेन ब्रेल्बाला बारेरि सेजिन्बा अनामिका दिमहेन्से ङेङ्गोर, ह्रोजुगुला मुबा चेमो । कलेजरि गुरुवर्ग हेन्से ह्रोजुगुला गुङरि ज्याबा मुबा छबि । कलेजरि ताबा अतिरिक्त गेताङजुगुरि ज्याबान भुमिका क्लाङ्मुबा ।

ह्राङ्लान स्युगरि चलप ताबाकेन लाबा केवाला याखारगि कुङ्लिङरि संयोगसेम आबि ह्याल लिउला म्हाङ म्राङ्बाजुगुला जोम्बाग्ला कलेजरि ओस्बा ओस्बान दिङ । ठ्याक्कै ओस्बा ओस्बान म्हाङ्ला स्क्रिप्ट कोरतिबारि तल्लिन ।

याखारगि छारिब्योनतेन ह्रुप ताला । जेबा स्हिवा स्वभावला छारिब्योन थेदा ङोसेना लाबारि थान्बा मिन आकाश ।

आकाश अन्तर्मुखी स्वभावसे स्याम्बा । देबाः लासि खाल्दामानतेन तिक्खुरि ङामरि ताबारि जाजाकि गाह्रो म्हान्मुबा । अनामिका स्नातक ङ्हिछा दिङ खेडोबा मुबा बिसाम आकाश स्नातक सोमछा दिङरि खेडोचिबा । ङ्हिलान मर्निङ सिफ्टला क्लास । तयारी आलानान ताना लापिन्बा ह्रुप । हाई हलो लाना लानान ङामला ह्रो दोजिन्बा मुबा ।

आकाश मोसोफल ग्याम वाङ्गाबा मुबा याम्बुरि । थे आलेतेन चिमुबा । कलेज खाबा निबारि पायक परतिबा ग्लारि मुबा थेला डेरा । आकाशला डेरा थेन अनामिकाला दिम ओतेल्हाना थारेङला ग्लारि आरेमुबा । छ्योआछ्यो ग्यार्जा डु ङिस मिटर थारेङला ग्लारि मुबा थेन्ना चिबा ग्ला ।

कलेज खामा निमा खाइमागि छ्यामनोन तामुबा । ग्यालाम थाबा पालेरि ताम लामुबा । डोबाला बारेरि । लिउला योजनाला बारेरि । दिङसे दिङ ङ्हि सोमला फेबा मुबा । टिनयज वाइजिन्बासे ङ्हिरिन गम्भीरता मुबा केवाला बारेरि ।

दिनि क्योङ्दा सेम निबा दुइ तापाग्रेनला ङ्हिछा कामरे । अनामिका दिमरिन आमासे लाबा गेरि ह्रोलाचिबा मुबा । तिक्खुरि थेला मोबाईल फोनरि  टिङटिङ ङ्ह्याबा काइतेन याखारगि म्यासेज खाजि । म्यासेज ठ्वाङ्सि च्याजि । म्यासेज आकाशसे पुइगाबाला चिम ।

‘हाई अनामिका !’

‘तिगा मुला तामसोर ?’

‘तिनि दिमरिन हिन्ना ए ?’

तिक्खुरि चुह्राङ्लासि गिक्छारेम खाबा आकाशला म्यासेजसे चोन निना लाजि । ह्रुप तामा हाई हलो बिसिमाम सामान्य ताम बिमा तिगाइ थेह्राङ्बा ताम नोन आतामुबा । तासाइ नोन तिनि तिल्दा म्यासेज पुइगाजि ताला । स्यान्दोबिमा नोन ङाला नम्बर खाराङ्लासि स्याप्जि थेसे । सेम न्हाङरि कालाङ्चिबा मुबा सेमला तामसे । म्यासेज रिप्लाई लासे कि आलासे बिसिमा कोल्चिबा मुबा अनामिका । याखारगि सेमसे बिबाकेन मुबा, ‘गिक्खेन कलेजरि डोबा ह्रो हिन्ना तिगा ताला ले म्यासेज रिप्लाई लामा ।’ स्यान्दो सेमसे बिमुबा, ‘होशियार अनामिका खानाङए तिगाइ स्वार्थ थोसि ङामरि ताबारि म्हाइबाम आहिन !’

लिच्छारि म्यासेज रिप्लाई लाबा आप्ता लाजि । पुइजि म्यासेज ।

‘हाई आकाश !’

‘ङादाम ज्याबान मुला । ओम एदा खाराङ्बा मुला ? ङा दिमरिन हिन्ना ।’

क्यार्से आकाश ब्रान्चिबा मुबा रिप्लाई ।

म्यासेज खाजि, ताङ्जि आकाश !

‘थ्यांक्स गड !’

‘अनामिका एदा याखारगि म्यासेज पुइगाबा हिम्मत पोप्बारि ठ्याक्कान ला डु ल्हागतिचिम । तिनि साहस ह्रुप्सि पुइकाबा म्यासेज एसे रिसिभ लाजि । रिप्लाई नोन लाजि । थुजेछे अनामिक !’ आकाशसे ब्रिजि ।

‘ल्हाउ याखारगि म्यासेज पुइगाबारि नोन ओत्थेबा साहस ह्रुप्तोबा ! तिगा ङा च्यान हिन्ना ले... हेहेहे ।’ अनामिकासे ब्रिजि ।

‘ताम थेह्राङ्बा आहिन, ताम लोङ्बाला हिन्ना ।’ आकाशसे पाङ्जि ।

‘ल्हाउ लोङ्तोबा ङ्यान्दि तिगा ङा फेबा ग्रहग्याम खाबा एलिएन हिन्ना ओम !’ ङेसिकेन पाङ्जि अनामिकासे । 
‘आहिन... ।’

‘अनामिका ! तिनि ङ्यासेरिक्यार फुर्सद मुसाम ह्रुप ताइ बिबा सेम लाबा । चोदे एतेन दुइ मुला बिसाम ।’ आकाशसे बिजि ।

‘चुनोन हिन्नाले एनि केटाकादेला नौटंकी । क्योलोलो म्यासेज पुइगाबारि खाइ कादे लाला ताम लाबाकेन मुबा । ताम पाङ्जि, म्यासेज रिप्लाई लाजि । दारेम ह्रुप ताबा ताम लाला । ह्रुप तामाहेन्से डेटिङ्गला ताम लासेला मुसिम ! चेगाइला ताम लासेला मुसिम । ल्हा ल्हा विचार लासि पाङ्ला ।’ आनामिकासे बिजि ।

आकाश ताङ्सिमाम ह्याप्पी ईमेजी जेक्खे पुइजि ।

ङ्यासेरिक्यार अनामिकासे म्यासेज लाजि आकाशदा, ‘खानाङ ह्रुप ताइ ह्याङ’ बिसिमाम ।

तुरुन्तान रिप्लाई लाजि आकाशसे, ‘पशुपतिरिक्यार ह्रुप ताइ । एला दिम थेन ङाला डेरानोन ङामरि परतिला ।’

अनामिकासे, ‘ताला’ बिजि ।

रेसे ङ्यासे तासिकेन निबा संकेत ह्राङ्लान ह्रेङ्सिकेन निबा क्रिपसे पाङ्बाकेन मुबा । आकाश बनकालीला याखारगि ग्रेन दोङ्ला टारि ह्राङ्दा गेन्सिमाम अनामिका खाबा ग्यालाम च्याबाकेन मुबा । सेमरि ताङ्बाला लाबा चलतिचिबा मुबा । केवारि गिक्छारेम चुह्राङ्लासि याखारगि सेमसे ताङेबा म्हि ब्रान्बाकेन मुबा । सेमसे बिबाकेन मुबा । म्हेन्दोला फोलेसे डेन लाउ । तासाइ हिम्मतसे ह्रो पिन्चिबा आरेमुबा ।

क्यारग्याम अनामिका खाबाकेन लाबा थाहा याङ्जि । कादे कादे ङामरि खाबाकेन मुबा अनामिका, ओते ओतेन तिङ्ला धट्कन योनायोना चलाब ताबा अनुभव लाबाकेन मुबा आकाशसे ।

‘क्यारग्याम्सेन ताम पाङ्सिकेन खाबा मुबा अनामिका ।

‘तिल्दा चुह्राङ्बा सुनसान ग्ला ह्रुप ताबारि ङ्योइबा ?’

आकाशसे ज्युम ङेसि पाङ्जि, ‘ङादा चुह्राङ्बान एकान्त सेम निमुला । खानाङ एतेन ङाइ ताम लाबा मौनता ख्वाइसि चिबा दोङसे जेक्खे थेगाइ । जेबा ह्राङ्ज्युङसे जेक्खे थाहा याङ्गाइ बिसिमाम... हेहेहे ।’

अनामिकासे पाङ्बारि चुजि थेनआताना, ‘हलो ह्रेम्बोरछे भाबुक तासिमाम व्हाम्बारि म्हाइबा कि तोला हिन्ना ? ङामि स्ट्रेट फरवार्ड केटी हिन्ना !’ सोझोन पाङ्गो तिगा खाराङ्बा गेसे ङ्योइबा ? थे ताम पाङ्गो । ङातेन ल्हाना दुइ आरे । आमादा घन्टा गिरि दोसिमाम खाला बिसि खाबा । ह्रोदा ह्रुप ताबा पाले लासिमाम ।’

आकाशसे ङ्याम्बा थेन छ्युल्बा काइरि बिजि, ‘अनामिका ताम थेह्राङ्बा आहिन । एदा याखारगि ज्याबा ह्रोला क्वाइसे ङ्योइबा हिन्ना । चु ग्रेन शहरला भिडरि ङाला सेमला मिसि म्राङ्बा ए ज्याबा म्हिदा ओस्सो ओस्सोन ह्रुप ताइ म्हान्सि ङ्योइबा । स्यान्दो तिगाइ आज्याबा आछोर्गो ।’

अनामिकासे पाङ्जि, ‘ल्हाना भाबुक ताआतो । ङाइ नोन ह्रो म्हान्सिमाम खाबा हिन्ना । बरु ब्राइ दोप ताइ लाजिन्बा मुला । ताम पाङ्सिकेन निमा आता ?’

ङ्हिनोन दोसिमाम खाजि । सेम सेमरिन ल्हानान ताम लासिकेन । चिबा ग्लारि दोगामा मुरि लानि फेजिन्बा मुबा । थेनि छ्याम छ्याम नोन खाबा म्राङ्सि लानि ताङ्जि । फेबाकेन लाबा सारकादे थेनिकादे ह्रुप ताबा हिन्ना बिसिमाम साक्षी चिजि ।

आकाश डेरारि दोजि । आले कान दाइसिमाम ब्रान्चिबा मुबा । कान चासिमाम म्हेर्जि । क्योलोलो ह्रुप तासिमाम खाबा अनामिकादा म्हाङनाङ म्राङ्म्याङ्गाइ बिबा मोलम लासिकेन ।

क्यार्से अनामिका दिमरि दोजि । आले थेन आपा लिबिङ्ग रुमरि टिभी च्याबाकेन लाबा म्राङ्जि । आमा भान्सारि कान स्होबाकेन लाबा म्राङ्जि । सोझोन आमा मुबा ग्लारिक्यार निसिमाम आमाला ह्रो लाजि । चाबास्हे तयार लाजि । मोक्कोन छ्यामनोन चिसिमाम कान चाजि । ह्राङ्ह्राङ्ला कोठारि वाङ्जि म्हेर्बारि ।

म्हेर्बारि म्हाइजि अनामिका । तासाइ तिनि तिल्दा मुग्याम खाइ ङ्हाच्छारि ह्राङ कान लेपला ङ्हुबा खाचिबा आरे मिरि । सेम चंगा ताबा मुला । सेमला ङोन्छाङ भावनाला पर्दारि दोलो क्योलोलो आकाशतेन ह्रुप तासि खाबा वृतचित्र चलप ताचिबा म्राङ्ला ।

क्यार्से दोमा चुर्से दोमा तिसा न्होङ्जिन्बा मुबा । तासाइ ङ्हुबा ङामरि आहिन थारेङ थारेङ ह्यारचिबा मुबा । गिक्छारेम आहिन ह्रुप ताबा आकाशतेन । ल्हानान ङ्हाच्छा हेन्से म्राङ्बा म्हि हिन्ना । तासाइ तिनि तिल्दा चुह्राङ ताचिबा मुला । खाइमा न्हाङ्गारदाङ्सेला ह्याल ताला थेदा ओम थेदा म्राङ्म्याङ्ला बिसिमाम सेमसे सेमदा ङ्योइला । ङादाह्राङ आकाशदा नोन तामुला व्हा आतामुला ताला !

सेमरि ताम क्लाङ्ना क्लाङ्नान स्ह्योरि कादे दुइरि छुप निजि थाहा नोन आतानि । मस्त ङ्हुबारि मुबा म्राप ढ्वाक ढ्वाक लाबा काइसे फेतछोर्जि ।

आमासे, ‘जामे ! ए कलेज निआतो ?’ बिसि ङ्योइजि ।

आमाला काइसे योनायोना रेजि । योना योना ब्रस लाजि । क्रा ख्रेजि । ड्रेस क्वान्जि । टाई डिक्ना लाबान बाई आमा बिसिकेन कलेजला लागि थोन्जि दिमग्याम्से अनामिका ।

कलेजरि दोजि । स्यान्दो दुइरि क्लासला डिक्बा ह्रो म्हाइबा मिसे तिल्दा मुग्याम खाइ तिनि आकाशदा म्हाइबाकेन मुला ।

आकाशदा आम्राङ्नि । क्लास तिजि, प्राध्यापकसे डोपिन्बारि तिजि । ब्ल्याक बोर्डरि चकसे कोर्षला तामजुगु ब्रिबाकेन लाबा ग्लारि आकाशसे पाङ्बा लाईनजुगु काप्सिमाम खाबाह्राङ छोर्बा चुजि ।

‘एतेन ङाइ पाङ्बा ताम दोङ्से जेक्खे थेगाइ... ।’

टिफिन टाईमरि क्यान्टिनरि ह्रुप ताजि आकाश थेन अनामिका । मुतेबा रे किन्बा दिगु किन्जि । चाजि ङ्हिसेन । ङ्हाच्छाला ह्राङ्बा चहलपहल आरेमुबा चु ङ्हिरि । उल्कान फेबा । मौका याङ्सि ब्रान्बा लिच्छाला मौनतारि रुपान्तरण तासि कुटिसि चिबा मुला ङ्हिनोन । लि आहिन मि ताम लाचिमुला ङ्हिलान । टिफिनटाईम जिन्जि ङ्हि नोन ह्राङ्ह्राङ्ला डा कोठारि वाङ्जि ।

क्लास जिन्जि । दिमरि दोबा दुइरि हिम्मत ह्रुप्सि ताम पाङ्बा बाङ लाजि आकाशसे, ‘अनामिका ! तिल्मा ङाइ एदा तिल्दा ह्रुप ताबारि ङ्योइबा बिबा ताम लाबारि आम्याङ्मान ह्याङ फ्लिकदोतोजि । दुइ थाल्बा पाले लासिमाम । एतेन याखारगि ताम लातोबा मुबा ।’

अनामिकासे बिजि, ‘पाङ्साइ ताजिले दाते । ङा मुनोन मुला एतेनछ्याम । तासाइ लब–सबला तामचा लाबा आहिन । ङ्हाच्छान पाङ्पिन्बा मुला ।’

अनामिकाला तामसे आकाश चोन निजि । तिगाइ ताम आपाङ्नि । ङ्हिनोन दोखाङ ताकतिसि ब्राचिजि कुटिसि तिगाइ आपाङ्ना ।

‘तिल्दा कुटिसि ब्राचिबा मिस्टर तिगा हिन्ना ताम ?’ तिक्खुरि अनामिकासे ङ्योइबासे आकाशसे पाङ्जि, ‘तिल्दा सुङ्दा स्हु पिन्से बिसिमाम ताम आपाङ्बा ।’

‘ल्हा ल्हा ल्हानान थोम्ना आलाउ । ताम तिगा हिन्ना पाङ्गो ?’ ङादा ल्याङ ल्याङ लाबा सेम आनिमुला ।’ अनामिकासे बोमो स्हाबाह्राङ लासि पाङ्जि ।

आकाशसे पाङ्बारि बाध्य ताजि । थेला मौनता चिबारि आखाम्नि अनामिकाला जिद्धी ङोन्छाङ ।

‘अनामिका ! ताम चेगाइला हिन्ना । तासाइ एसे ङ्हाच्छान पाङ्जि । लब सबला ताम थालाउ बिबासे पाङ्बारि आखाम्नि । पाङ्बा साहस आछ्योसाइ नोन ङाइ एदा देन्बा चाङ्मा चेगाइ लाला अनामिका ! ङाइ लाबा प्रस्तावदा आङ्यान आबिउ । बरु दुइ किन्गो । सोच बिचार लाउ । न्हाङ्गार रेनिङ आबि, ला ङ्हि सोम आहिन । एला लागि क्योङ केवा फुल्ला ब्रान्बारि ।’ आकाशला धारा प्रबाह तामसे अनामिकाला लि वापवाप ताजि । तिगाइ आबिनि अनामिकासे । ब्राबाकेन लाबा ग्यालाम फेबा ग्ला खाजि ङ्हि नोन ह्राङ्ह्राङ्ला ग्यालाम वाङ्जि ।

ल्हानान रेलिच्छा अनामिकासे आप्ता निर्धारण लाजि । आकाशला ताम ठिक छोर्जि । आकाशला चेगाइला प्रस्ताव स्वीकार लाजि सेम न्हाङ न्हाङ । कलेज खामा निमा ग्यालामरिन पाङ्गे म्हान्बा मुबा ।

लोङ्सिमाम पाङ्बारि आखाम्नि । आकाशसे नोन दोसि थे ताम दोहोर्याप लाबारि ज्याबा आछोर्ना मुसिम खाइमाइ आलानि ।

स्नातक ब्लिछा दिङला डोबा चलप ताचिबा मुबा आकाशला । फाईनल एकजाम खाबारि ल्हाना रे लेङ्बा आरेमुबा । परिक्षाला तयारीरि ल्हानान खटाप ताचिबा मुबा आकाश ।

ख्रे–ड्वाफ्रे दुइला खाङ्बासे ल्हानाह्राङ्बा दोङ्ला बा ताइबा दुइ । दिनि आउदिन चेगाइ ताला मोक्कोनला । क्योङ्दा समावेंशी स्ह्रुगसे बोलाला होेइस्हेर दिनिसे । म्हिसे म्हिदाह्राङ लेबाफेबा आला दिनिसे । ख्रे–ड्वाफ्रेला ओन्माहेन्सेला अन्याय नाबाकेन लाबा दोङजुगु बसन्त ब्रान्बाह्राङ्नोन आकाश, अनामिका ह्राङ्लान केवारि खासेला बिश्वासला छ्याम ब्राचिबाकेन मुला केवा ल्हामरि ।

तिरे ङ्यासे अनामिकाला आपा आमा थेन आले ह्राङ्लान बिशेष पार्टीरि निबा मुबा । गिक्खेन थोमतासि ङ्यासेतेन ङोबान तुन्बा ङ्हाउला पाना ओर्जि । ल्हाना पानाजुगुरि आकाशला तामजुगु छ्योल्बा मुबा । गिक्खे उदास ङ्यासेदा साक्षी थान्सि आकाशदा स्वीकार लाजि ।

योना योना ल्हानान रेलिच्छा फोन लाजि आकाशदा ।

बु गिरिन पाङ्जि, ‘आकाश ङाइ नोन एदा चेगाइ लाला ।’

आकाश ताङ्जि । ङ्हिलान ताङ्बारि स्याबारि मुला लानि सार तयार ताजि । रेजुगु ताङ्बाला छ्याम नोन थाल्सिकेन निजि । ह्राङ्ह्राङ्ला डोबाला छ्याम खाइमाइ आफेबा चेगाइला पाराखी दोसिकेन । आकाशला चेगाइ स्वीकार लामाहेन्से ल्हानाह्राङ्बा छुट्टिला रेजुगुरि याम्बुला क्याफे हेन्से ङामरि परतिबा धुलिखेल, नगरकोट, ककनीला जेबा पार्कजुगुरि ह्रुप ताबा चुजि । सेमला ताम लामुबा ज्याबा ज्याबा ओम फ्लिकदोसि खामुबा ।

स्नातक ब्लिछा दिङ्ला परीक्षा पिन्जि आकाशसे । परीक्षा जिन्माहेन्से छुट्टिला तिगाइ दुइ ह्राङ्लान नाम्सारि निसि चिबा योजना स्होजि । योजना स्होमा अनामिकादा नोन ङ्योइजि ।

‘ङा तिगाइ दुइ ह्राङ्लान नाम्सारि निला । आपा आमासे नोन ङ्योइस्ह्युमुला ।’ आकाशसे पाङ्जि ।

ज्याबान छोर्जि आकाशला ताम अनामिकादा । खाराङ्लासि ह्राङ्दा आपा आमाला चेगाइ ल्हागाब ताला ओस्बान लासि थेदा नोन आपाआमाला चेगाइ ल्हागतिला, आपा आमातेन ह्रुप ताइ म्हान्ला म्हान्जि अनामिकासे नोन । ङ्हिलान ग्रोइ लिच्छा आकाश ह्राङ्लान ग्ला स्यार नेपालला ग्रेन शहर बिराटनगर निजि ।

तिगाइ रे चिजि दिमरि । आपा आमातेन लातोबा ताम मुतेबा लाजि । आकाशला आस्याङ दिम ग्यागारलिङरि मुबा । आस्याङजुगुसे मास्टर लाबारि ग्यागारलिङ बोर्बा ताम लाजि । आपा आमाला ताम आज्ञाकारी दोसिमाम ङ्यान्चिजि । आपा आमाला ताम थाबा हिम्मत आलानि ।

आकाश दोसिमाम याम्बुरि दोजि तिगाइ दुइलिच्छा । ह्रुप ताजि अनामिकादा । ताङ्जि ङ्हिनोन । आपा आमासे पाङ्बा मुतेबा ताम थेना लाजि अनामिकादा । मास्टर डोबारि भारत निबा तामसे दुःखि ताजि अनामिका ।

ला डु ङिस लिच्छा रिजल्ट खाजि । नब्बे कारग्या बासि पास ताजि आकाश । क्यार्से दिमरि आपाआमासे पिन्बा का छ्योना लातोबा मुला । चुर्से ह्राङ्ला केवा बिमा चेगाइ चेमोदा ह्रो पिन्तोबा मुला । सातानला लागि आताना तिगाइ दिङ्ला लागि क्योङग्याम थारेङ ताबारि बाध्य ताबा मुला आकाश । बाध्यताला त्रिवेणीरि राप्बा आकाश तोच्चाग्युइसेर डुप्बारि ग्यागारलिङ निबा आप्ता लाजि ।

सातानह्राङ गिक्खे ङ्यासे ह्रुप ताला अनामिकातेन । ओम, लाला ल्हानान बिश्वास थेन भरोसाला ताम । ह्राङ्ग्याम खाइमाइ धोका आतासेला ताम थान्ना । बिश्वास पिन्बारि आकाशसे ह्राङ्ला या थासि च्याङ्ना कासे अनामिकाला चिउ छोन्गेन ताना लाला । न्हा पण्डित न्हा रिमठिम नोन तोसोगिसे ब्रेल्साङ लाला । गाङ्साल लानिला होइस्हेरसे ह्याल ताबा साजाम्बुलिङरि चु गोरङ्हि प्राणीसे छुगनिबा ब्रेल्साङ लाजि । खालाइदा आङ्योइना । आपा आमादा थाहा आपिन्ना । चेगाइला बिश्वासरि परतिसि ।

रुङ्सिकेन निबा म्हुनतेन ह्राङ्ह्राङ्ला चिबाग्लारिक्यार दोसि निजि । म्हेर्जि, म्हाङरिन सुहागरात दाङ्जि, म्हाङरिन ग्राण्ड पार्टी पिन्जि । ङाम हेन्से थारेङ थारेङदोनाला ङोसेबा म्हिजुगुदा । ल्हानान म्हिजुगुसे पिन्बा ल्हानान उपहार सोसि, म्हाङ्ला दिमरि पोप्जि ।

आकाश ग्यागारलिङ निजि । अनामिका गिक्खे याम्बुरि खामआखाम सोचिजि । कर्तव्यला दोइला छ्याम सेमनाङ आकाशला चेगाइ थोसिमाम । आकाशसे याम्बु ख्लामाहेन्से अनामिका ह्राङ्लान ल्हुइला खाजिबा खाजिबा बो म्हाबा ह्राङ्बा आज्याबा अनुभव थोसि सोचिबा मुला । ङ्हाच्छा ङ्हाच्छाला रेजुगुरि आकाशसे मुतेबा रेला स्ह्यो, दिन्छे थेन ङ्यासे दोसिमाम डान्चिजि ।

रेजुगुसे ला, दिङला दुरी स्होसिकेन निजि । गोल्छेसे आकाशला म्यासेज, फोन नोन च्याङ्सिकेन निजि । भौगोलिक दुरिसे थारेङ ताबा अनामिकासे ब्यस्तताला ङ्यान्दि स्होसिमाम खाइमाइ आकाशला सेमरि चोट ताना लाबा गे आलानि । नासि चिजि थाल्बा रेजुगु डान्सिमाम ।

स्ह्योरि गुडमर्निङ्ग थेन ङ्यासे गुड नाईट दोसिाम मुतेबा रे खाचिबा आकाश गोल्छेसे हप्ता थेन ला दोबाकेन मुबा । ह्रेङ्बा कपोलकल्पित प्लाबा म्यासेज दोसि खामुबा । ओम बिश्वासला छोदारि ह्राङ्दा खिचिबा मुबा ह्राङ्से ह्राङ्दान अनामिका ।

आकाशसे याम्बु ख्लाबा दिङ ब्लि ताजिन्जिम । छ्योआछ्यो थेसे लाबा मास्टरला कोर्ष छ्योगे लाजिन्बा मुला बिबा सोचसे दिम स्होबा मुला अनामिकाला सेमरि ।

थेसे म्हान्चिबा मुला, ‘योनान ह्रुप ताला दारेम । सेमरि स्याम्बा म्हाङ समाजला ङोन्छाङ देबाःलासि थान्ना । छुम्सि थान्बा ब्रेल्बादा समाजदा साक्षी थान्सि, धुमधामसे ब्रेल्साङ लाला ।’

चुह्राङ्बान असिमित कल्पनारि सार्बा म्हेन्दो थुसि कल्पनालान ढक्की ह्रुप्ला अनामिका ।

ख्रे लाला गुङला दुइ । ह्रेङ्बा म्हुन । म्हुनदा डेन लाबारि याखारगि तल्लीन ङ्यासे । ङ्यासेतेन अनामिकाला मोबाइलरि म्यासेज खाजि । 

‘म्यासेज थेनोन ङोसेबा आकाशला !’

‘हाई अनामिका ! ङाला रिजल्ट ज्याबा खाजि ।’

‘तिगा मुला एला तामसोर ?’

छिग फारो लासि पुइगाबा म्यासेज याङ्सि आउदिन ताङ्जि अनामिका । म्यासेज रिप्लाई लाबारि तिगा म्हाइबाकेन मुबा अफलाईन ताजि आकाश म्यासेन्जरग्याम ।

चुह्राङ्लासि गोल्छेसे ब्रेल्बादा थारेङ स्होबारि म्हाइबाह्राङ छोर्बाकेन मुबा अनामिकादा । सेमरि म्हान्बा ताम ङ्योइबा ह्राङ्लान सेम जेक्खे मुबा । स्यान्दोतेन ताम थान्बा ग्याम स्होजिन्बा आरेमुबा ।

आकाश थारेङ ताबारि म्हाइबा बिबा ताम थाहा ताजिन्बा मुबा अनामिकादा । आकाशदा ह्रुप ताबारि सेम आताबा आहिन । आकाशला दिमदोना दोसि मुतेबा ताम पत्ता ल्हागाब लाबारि आखाम्बा पक्कान आहिन । तासाइ थेदोना दोबा लासि क्वाइला ग्याम ठ्वाङ्सि जिन्बा आरेमुबा । थेनोन तामदा ङ्यान्दि स्होसि अनिश्चित ब्रान्बारि चिना चिनान तिरेकुनुला स्ह्योसे अनामिकादा आज्याबा तामसोर पिन्जि । तामसोर बाबा थेनोन म्यासेन्जर मुबा ।

म्यासेज आकाशला मुबा ।

‘अनामिका ज्याबा डान्बा ! खाराङ्लासि पाङ्से ङाइ । चु तामदा एला ङोन्छाङ थान्बारि मुस्किल ताबा मुला ङादा । ङादा थाहा मुला, ए दुःखि तासेला मुला । ङादा घृणा लासेला मुला । म्हान्बाह्राङ्बा आताबा चिम केवारि, ह्याङ्मि जेक्खे निरीह पात्र चिम । केवा मिनला रंगमन्चला । तिगा म्हान्सि खाबा मुबा । ठिम थेला लिसो ताजि केवारि । हिन्ना अनामिका ! ङाइ चुरि खासि मास्टर जिन्ना लाजि । ज्याबान ताजि । तासाइ ङाग्याम याखारगि ख्योल्बा ताजि । थे ख्योल्बासे ङादाबिमा एदा स्हुखाना लासेला मुला ।

ङा चुरि खासि ६–७ ला लिच्छा ङाला केवारि याखारगि जामेकोला ह्रो खाजि । गिक्खेन क्लासला छ्यामह्रो । थे ङाला आस्याङ्ला ङोसेबान हिन्ना । तिगाइ दिङ ङानि ज्याबा ह्रोला क्वाइसे ङामरि ताबाकेन मुबा । थे क्वाइ खाजिबा दुइरि चेगाइरि पोजि थाहान आतानि । ङानि ङ्हिला ब्रेल्बाला बारे थेला मोक्कोन दिमथेमेसे थाहा मुला । खाराङ खाराङ्लासि ख्योल्सिमाम तानिबा फिजिकल रिलेसनला नतिजा थेला गर्भरि छार्बाकेन लाबा तामसे ङादा बन्धनरि पारतिबा मुला । चोदे ङाइ थेदा स्वीकार आलासाम थाहा आरे ङाफिरि तिगा तिगा ताला ?

ङा विवशरि मुला, अनामिका ! थेतासि एग्याम थारेङ तासिकेन निबा । खाम्ला बिसाम ङादा माफ लापिन्गो ।’

म्यासेज याङ्सि, डोसि अनामिकादा क्रिङ्बा सेम ताबा मुबा । तासाइ थेह्राङ आलानि । लामा ज्याबा तासेला नोन आरेमुबा । थे भुमिगत अज्ञात चेगाइला बारेरि दिमथेमेरि खालाइदा थाहा आरेमुबा । ह्राङ्से ह्राङ्दान धोका पिन्बासे पछुताप ताबा बिमा स्यान्दो विकल्प मुनोन आरेबा बिसाइ ताला ।

तिल्दाबिसाम थेला चेगाइ । थेला भरोसा थेन बिश्वास तेन्बा मिस्टर आकाश स्यान्दोन ग्लारि बसाइँ ल्हेबा मुला । अनामिकाला सेमला नाम्साहेन्से थारेङ । टोलाप ताबा, मौनता चिबा रेदाङ्सेला गे दोबा मुला अनामिकाला । थाहा आरे आम्राङ्बा न्हाङ्गारला रेजुगु डिक्सि केवाला ल्हामदा खानाङदोना छेङ्सेला मुला । आकाशसे सेम लाजि, अनामिकासे आलानि । अनामिकासे सेम लाजि, आकाश थेला ताजि । तिगाइ दुइ ज्याबा म्हाङ दोसिमाम ख्युरुरु कोर्चिजि । अनामिका म्हेन्दो दोसि सार्जि, आकाश माली दोसिमाम म्हेन्दोला स्याहार संभार लाचिजि । चुबादान थुम्ना लासि खाबा आकाश निजि । अनामिका थेला ब्रान्सि चिजि । अनामिकाला ब्रान्बारि आकाश ठ्वाबा दोसि खाजि । स्हुखाबा मुला अनामिका ! सेम, तिङ, मस्तिष्क मुतेबा घाइते ताबा मुला थेला । दुइ दुइरि डोङ्बादा डान्बा मुला । दुइ ङ्हाच्छान तिल्माला स्वर्णिम ङ्हाउ बियोग थेन वेदनासे रिलख्वाइबाला मुला । थाहा आरे लिउ खाराङ्बा ताग्याम ? तिगा चुह्राङ्बान ताला ओम चेगाइ ?

(छिगकि दोनः ठ्वाबा– घात, ख्योबा– छल्नु, ङ्हाउ– विगत, खेबाः– पुरानो, चेगाइ– माया/प्रेम, ङ्यान्दि– कारण, ङ्योलोक्चिबा– आन्दोलित, स्युग– गति, बोटोक्बा– फतफताउनु, डिहिवान– फुलबारी, साम्सिकेन– मुर्झाउँदै, तान्बा– सन्तान, माइ– जेठी, गेदिम– कार्यालय, ग्युइसेर– शिक्षा, खेडोब– अध्ययण, ब्रेल्बा– सम्बन्ध, कुङ्लिङ– घुम्ति, जोम्बाग्ला– संगम स्थल, स्हिवा– शान्त, स्याम्बा– सजेको, देबाः– सजिलो, लिउ– भविष्य, केवा– जीवन, तापाग्रेन– मंसिर, कामरे– शनिबार, कालाङ्बा– हल्लीखल्ली, आप्ता– निर्णय, ह्राङ्ज्युङ– प्रकृति, क्वाइ– नाता, ङ्हुबा– निद्रा, डा– कक्षा, थोम्बा– अन्यौल, स्ह्रुग– रुप, होइस्हेर– किरण, थोमतासि– टोल्याएर, ग्रोइ– सल्लाह, ग्यागारलिङ– भारत, कारग्या– प्रतिशत, का– बचन, चेमो– प्रेमी/मायालु/प्रिया, डुप्बा– हासिल गर्नु, तोच्चा– उच्च, आप्ता– निर्णय, छोन्गेन– रंगीन, ब्रेल्साङ– बिबाह, छुगनिबा– गज्जबको, सोसि– संगालेर, क्वाइ– नाता, ख्योल्बा– गल्ती/भुल, ठ्वाबा– घात)