याम्बु, ७, ड्वाफ्रे । एसिया इन्डिजिनियस पिपल्स प्याक्ट (एआइपीपी) ला चोहो वेभरली लङ्गिडला छ्याम नेपालला आदिबासी सवाल थेन नाछालथोरि काठुइ ताबा मुला ।
नेपाल आदिबासी जनजाति गेन्दुनछेन (नेफिन) ला समन्वयरि गेन्दुनछेनला गेदिमरि नारे ताबा काठुइरि नेपालला छ्याम एसियन ह्युलला आदिबासी जनजाति गोछापाजुगुसे बोकिन्बा मुबा । गेताङरि चोहो बेभरलीसे नेपाल ह्राङ्बान एशियन ह्युलला आदिबासीला सवाल मोक्कोन ग्लारि च्योच्यो तासाइ नोन कादे ग्लारि याङ्ताम कार्यान्वयनरि काक्ता मुबा पाङ्जि ।
थेसे ग्याल्साग्याम लेबाफेबा थेन काक्तारि मुबा आदिबासीदा तोर थिबा थेन क्षमता ल्हेना लाबाला लागि एआइपीपीसे छ्यागे लासि गेताङ स्होबा ग्रादाङ पिन्जि ।
नेपाल आदिबासी जनजाति गेन्दुनछेन (नेफिन) ला चोहो निमा लामा ह्योल्मोसे नेपालरि आदिबासीला लागि ह्युलठिमसे सुनिश्चित लाबा नुर थेन थेला कार्यान्वयनला नाछालफिरि ग्रादाङ पिन्जि । थेसे आदिबासीला याङ्ताम सम्बोधनला लागि कानुन स्होबारि आखाम्मा ल्हानान याङ्ताम कार्यान्वयनरि खाबारि आखाम्बा पाङ्जि ।
गेताङरि एआइपीपीला नेपाल ग्रेन्पो जगत बराम, नेपाल आदिबासी जनजाति स्योमि गेन्दुनछेन (फोनिज) ला चोहो लक्की चौधरी, निडाका इन्द्रमाया गुरुङ, स्यान्दो गान्बाजुगु खडकबहादुर सारु मगर, चकचकी राजवंशी, बन्दना श्रेष्ठला छ्याम ल्होलो गेन्दुनला गोछापाजुगुसे बोकिन्बा मुबा ।
(छिगकि दोनः काठुइ– छलफल, गेन्दुनछेन– महासंघ, गोछापा– प्रतिनिधि, काक्ता– समस्या, छ्यागे– सहकार्य, ग्रादाङ– जानकारी, नुर– विषय, नाछाल– अवस्था, ग्रेन्पो– प्रमुख, स्योमि– पत्रकार)
तपाईको प्रतिक्रिया दिनुहोस