खालाइ फोइदानसे सिजि,
खालाइ डोसिमाम ।
खाला आस्तिक मुबा
थेनि कोन्ज्योसोमला कृपासे सिजि ।
खालाइ चु ताङ्बारि सिजि
कि दारेम बैंकला लाइनजुगु थुन्बा तासेला मुला ।
खाला ह्राङ्ला नाख्रुला लिच्छाला दार्बादोना
सरकारतेन ङ्योइसिमाम लड्तिबारि खाम्मुबा,
थेनि सरकारला आपेबा हिंस्रक ङेसेबासे सिजि ।
ह्यामग्याम सोबारि नाइबा तर्क पिन्बान
पुलिससे
खाल्दा छिक्मारि
काडिला वाला–म्लाङ म्हेन्दो सुबा मुबा
थेला सेमजो
थेनोन म्हेन्दोला थाङसे सेजि ।
खालाइ ह्राङ्ला अश्लील ब्लाप्बान्हाबा कुर्सीरि
लोभ थेन वासनाला ख्युन चासि
सिबा स्याप्जि ।
खालाइमि जेक्खे चु म्राङ्सि सिजि
कि चु दुर्सारि
थेन्ना लागि दारे खाजिबाइ ग्ला लेङ्बा आरे ।
खालाइदा दिमरि फ्लिकदोसि खाबा ग्यामजुगुसे सेजि ।
चुह्राङ्लासि थेनिकादे कुन्दुरनाङ म्हिजुगु गुङरि परतिजि
थेनि दाते नोन
खाजिबाइ हान माङ्ग्यार
चेगाइला लागि कुटिसि सिबारि खाम्मुबा ।
खालाइदा घृणासे सेजि,
खालाइदा वाङ्से ।
खालाइदा ऐश्वर्यसे सेजि
खालाइदा भक्तिसे ।
ह्यामरि सिबा मोक्कोन म्हिजुगु
ह्यामसे जेक्खे सिबा आरेमुबा ।
(छिगकि दोनः ह्याम– महामारी, सेमजो– प्रियजन, ख्युन– विष, हान– उखान, चेगाइ– प्रेम, वाङ– शक्ति)
दोःबा : यकिना अगाध
विहाग वैभव समकालीन हिन्दी व्हाइखाला चर्चित व्हाइखाब्रिखेन हिन्ना । थेला केबा सन् १९९३ रि भारतला उत्तर प्रदेशला जौनपुररि ताबा मुबा । थेदा दलित चेतना, सामाजिक च्योच्यो आरेबा, नागरिकता, सानाम्पा केवा थेन सत्ता–संरचना ब्रेल्चिबा नुरदा व्हाइखारि सशक्त तोसोसे रेन्बा व्हाइखाब्रिखेनला स्ह्रुगरि ङोसेमुला ।)
तपाईको प्रतिक्रिया दिनुहोस