याम्बु २३ गतेने । ग्योइकाइब्रिखेन विश्व सिग्देलला व्हाइखापोप ‘तालीला समाजशास्त्र’फिरि परिचर्चा गेताङ ताबा मुला ।

सुनकोशी वाङ्मय प्रतिष्ठानला आयोजनारि सुङरे ठमेलला चिःवहाल गौचररि स्हेङ्बा गेताङ व्हाइखाब्रिखेन श्यामलला डोन्बोग्रेन्पोरि ताबा हिन्ना ।

गेताङरि श्यामलसे सिग्देलसे ज्याबा व्हाइखा ब्रिबा पाङ्जि । थेसे ग्योइकाइब्रिखेन सिग्देलला व्हाइखासे समाज पोबाला लागि ज्याबा सामतेनला ल्हेछ्या लाबा ताम थान्जि ।

व्हाइखाब्रिखेन आर.एम. डंगोलसे तालिला समाजशास्त्ररि शक्तिशाली व्हाइखाकादे मुबा पाङ्जि । थेसे ब्रिखेन सिग्देलसे व्हाइखारि ह्राङ्ला फेबा ङोसेबा स्होबारि सफल ताबा पाङ्जि । च्याङ्ना ब्रिबा तासाइ डाकल्हिबा व्हाइखा ब्रिबा बिसि थेसे प्रशंसा लाजि । थेसे चु व्हाइखा पोपाला ४५ गोर व्हाइखासे समाजरि मुबा विकृति थेन विसंगतिदा उजागार लाबा पाङ्जि ।

गेताङरि ब्रिखेन सुधा मैनालीसे सिग्देलला व्हाइखा सामाजिक नुररि दान्वाङ तासि समाज थिग्युरला लागि सालीन विद्रोह लाबा पाङ्जि ।

गेताङरि ग्योइकाइब्रिखेन विश्व सिग्देलसे ह्राङ्ला व्हाइखारि मुबा कमजोरीदा दामपिन्बासे समिक्षक, डोन्बोग्रेन्पो श्यामल थेन आयोजक सुनकोशीदा थुजेछे पिन्जि ।

व्हाइखाब्रिखेन रमी प्रिया, चन्द्रबहादुर लामा, अमोघ काफ्लेतेन स्यान्दोकादेसे तालीला समाजशास्त्रग्याम व्हाइखाबा डोबा मुबा । 
सुनकोशी वाङ्मय प्रतिष्ठानला चोहो छविरमण सिलवालला चोहोदानरि ताबा गेताङ ग्रेनगाउराइ प्रदीप सापकोटासे सहजीकरण लाबा मुबा । डेन सेमताम ह्रोमि पूर्णबहादुर श्रेष्ठसे थान्बा मुबा ।

गेताङला छ्यामआयोजक चिःवहाल थेत्माइ, ठमेल थेन इखबर नेट मिडिया पार्टनर मुबा ।

(छिगदोनः ग्योइकाइब्रिखेन– साहित्यकार, व्हाइखाब्रिखेन– कवि, ब्रिखेन– लेखक, दान्वाङ– आधारित, थिग्युर– सुधार, ह्रोमि– सदस्य, छ्यामआयोजक– सहआयोजक)