याम्बु । ह्राङ्बाङ ऊर्जा उत्पादकजुगुला गेन्दुन नेपाल (इप्पान)ला छार नेतृत्व दाम्बाला लागि चुनावी माहौल लेप्बा मुला । खाबा ड्वाफ्रे २९ गतेला लागि निर्धारण ताबा इप्पानला साधारणछोबाग्याम छार नेतृत्व दाम्बाला लागि स्यानचोहो उत्तम लामा भ्लोनला नेतृत्वरि टिम कापाङ लाबा मुला ।

राजधानीरि आयोजित गिक्खे गेताङरि भ्लोनसे दिङ सोमला ग्यात्दुइला भिजन थेन टिम कापाङ लाबा मुला । इप्पानरि वरिष्ठ स्यानचोहो स्यान्दो ग्यात्दुइ स्वतः चोहो दोबा डिछ्या मुला । भ्लोनसे इप्पानला वरिष्ठ स्यानचोहोला लागि ह्राङ्ला उम्मेदवारी कापाङ लाजि । थेला नेतृत्वरि स्यानचोहोरि उत्तरकुमार श्रेष्ठ, हिम पाठक, सुसन कर्माचार्य थेन बिक्रम विष्टला ङ्हाच्छा ल्हेबा मुला । थेह्राङ्नोन लासि, ग्रेनगाउराइरि टिएन आचार्य थेन स्यानगाउराइरि कविता कडेलदा ङ्हाच्छा ल्हेबा मुला । न्होरचोहोरि नरेन्द्र बल्लभ पन्त मुला ।

गेदाछोकला गोर ङ्हा गाउराइरि विजयमोहन भट्टराई, कुवेरमणि नेपाल, सुमन जोशी, शंकर बस्याल थेन अविज्ञा मल्लदा उम्मेदवार कापाङ लाबा मुला । चुह्रङ्नोन लासि ह्रोमिजुगुरि अनुप आचार्य, जगतबहादुर पोखरेल, कदम केसी, वर्णन लामिछाने, इसा श्रेष्ठ थेन प्रतिमा ज्ञवाली मुला । भ्लोन नेतृत्वला टिमसे खाबा ३ दिङरि लासेला गेला एजेण्डाला छ्याम इप्पान भिजन २०२९ कापाङ लाबा मुला । चु भिजनरि ह्युलदा उर्जारि आत्मनिर्भर स्होसि ऊर्जा थुमदा न्होरकि समृद्धिको मुख्य दाःनला स्ह्रुगरि स्थापित लाबा प्रतिबद्धता उल्लेख लाबा मुला ।

थेला आन्सार सरकारसे खाबा १० दिङ न्हाङरि ३० तोङ्जा मेगावाट विद्युत उत्पादन लाबा दोन्डुप थान्बा मुला, थेला लागि ५० खर्ब रुपैयाँ बिमा ल्हाना लगानी तोबा म्राङ्बा मुला । चु महत्वाकांक्षी दोन्डुप याङ्बाला लागि निजी थुमला भूमिका निर्णायक ताला, तासाइ चु लगानीला लागि विद्युत ग्लुबा थुन्च्या (पीपीए), प्रशारण लाइन थेन प्रशासनिक जटिलता गम्भीर चुनौतीला स्ह्रुगरि मुला । खाबा दिङजुगुरि चु जटिलता ब्लाबारि पहल लासेला थेसे पाङ्जि । दाते छ्योआछ्यो १२ तोङ्जा मेगावाट बिमा ल्हानाला आयोजनाजुगुला पीपीए रोकतिबा नाछालदा ठ्वाङ्बारि पहल लासेला नोन थेसे पाङ्जि ।

भिजन २०२९ सार्वजनिक लाबान वरिष्ठ स्यानचोहोला उम्मेदवार भ्लोनसे पाङ्जि, ‘नेपालला ऊर्जा थुम तिनि ग्याल्साङ न्होरतन्त्रला ग्रेन्पो दाःनला स्ह्रुगरि स्थापित तासिकेन निबा मुला । निजी थुमला निरन्तर लगानी संघर्ष थेन प्रतिबद्धतालान ङ्यान्दि नेपाल लोडसेडिजमुक्त तासिकेन ऊर्जा आत्मनिर्भरता व्हना ङ्हाच्छा वाङ्बा मुला । विद्युत निर्यात लाबा ग्याल्साला स्ह्रुगरि स्थापित ताबा दाःन तयार ताबा मुला । तिनि नेपालला क्योङ विद्युत उत्पादनरि निजी थुमला योगदान ८० कारग्या बिमा फिरि मुला बिसाम मेगावाट तोङ्जाछा आयोजना स्हेङ्बा वित्तीय डिछ्याना ओसेम खेडोबला छ्यारि–चरण मुला । ऊर्जा थुमरि ताबा लगानीसे बैंकिङ ओसेम वित्तीय थुमरि ल्हाना पूँजी परिचालन, रोजगारी सिर्जना, ङ्हाउदान फेल्गेबा ओसेम दुर्गम थुमला सामाजिक–न्होरकि पोग्युर्बारि– रूपान्तरणमा महत्वपूर्ण योगदान दोना लाबा मुला । जलविद्युतला छ्याम सौर्य ऊर्जारि निजी थुमला ल्हेबा बोकिन्बासे नेपालला ऊर्जा कोङ्ह्रावादा कोङ्ना लासिकेन बोर्बा मुला । निजी थुमला चुनोन योगदानसे ऊर्जा थुमदा नेपालला न्होरकि समृद्धिला मुख्य दाःनला स्ह्रुगरि स्थापित लाबा मुला । नेपाल सरकारसे खाबा १० दिङ न्हाङरि ३० तोङ्जा मेगावाट विद्युत उत्पादन लाबा दोन्डुप ङ्हाच्छा बाबा दातेला नाछालरि निजी थुमला भूमिका अझ महत्वपूर्ण थेन निर्णायक दोबा मुला ।

विद्युत् छोङ्नामला थुमरि नेपालदा लो एशियालान ऊर्जा केन्द्र स्होबा दोन्डुपला छ्याम भारततेन १० दिङरि १० तोङ्जा मेगावाट थेन बंगलादेशतेन ५ तोङ्जा मेगावाट विद्युत् निर्यात लाबा योजनादा प्रभावकारी स्ह्रुगरि ङ्हाच्छा बोर्बारि कुटनीतिक पहल किन्सेला भ्लोन नेतृत्वला टिमला भिजन स्योरि उल्लेख मुला ।

(छिगकि दोनः कापाङ– घोषणा, ह्राङ्बाङ– स्वतन्त्र, छोबा– सभा, स्यानचोहो– उपाध्यक्ष, ग्यात्दुइ– कार्यकाल, डिछ्या– व्यवस्था, ग्रेनगाउराइ– महासचिव, स्यानगाउराइ– उपहासचिव, गेदाछोक– कार्यसमिति, ह्रोमि– सदस्य, दाःन– आधार, दोन्डुप– लक्ष्य, थुन्च्या– सम्झौता, नाछाल– अवस्था, ग्याल्साङ– राष्ट्रिय, ग्रेन्पो– प्रमुख, ङ्यान्दि– कारण, व्हना– तर्फ, ग्याल्सा– राष्ट्र, कारग्या– प्रतिशत, डिछ्याना– व्यवस्थापन, खेडोब– अध्ययण, छ्या– चरण, ङ्हाउदान– पूर्वाधार, फेल्गेबा– विकास, पोग्युर्बा– रूपान्तरण, कोङ्ह्रावादा– सुरक्षा, छोङ्नाम– व्यापार, लो– दक्षिण, स्यो– पत्र)