ताम्बा सङ्घ नेपालसे स्हेङ्बा ङारेला ताम्बा प्रशिक्षण थेन जोम्ना गेताङ नारेहेन्छे तिबा मुला। याम्बु बाउदाला नयाँबस्तीरि स्हेङ्बा गेताङला ठ्वाङ्सेङ ग्रेन डोन्बो छ्यामरि जापानला लागिरि ङाच्छाला राजदूत डा. गणेश योन्जनसे लाबा मुबा। 

गेताङला ठ्वाङ्सेङ सत्रदा सम्बोधन लाबान ग्रेन डोन्बो योन्जनसे ताम्बा गेदुङसे तामाङ ह्युल्बाला रिमठिमकि ङोसेबादा संरक्षण थेन प्रवर्द्धनला ग्यात लासि खाबा ताम थान्बा मुबा। योन्जनसे पाङ्जि, ‘१३ दिङ ङाच्छा ठ्वाङ्बा ताम्बा गेदुङ नेपालसे ताम्बाला सैद्धान्तिक, सांस्कृतिक थेन व्यवहारिक ग्युइ प्रवाह लाबान ह्युल्बारि छोर्ङान ठाम्बा जुन महत्वपूर्ण गे लाचिबा मुला चुला दोङरापसे क्योइबा गे लासेलान मुला।’ 

थेराङलासिन मानवशास्त्री डा. मुक्तसिंह तामाङसे प्रशिक्षण गेताङ भव्य थेन फलदायी तागाइ बिबा सेमताम थान्बान चु गेताङसे ताम्बा सैद्धान्तिक, दार्शनिक, आसेम डाम्फु थेन टुङ्ना स्हेङ्बाला व्यवहारिक ग्युइ छ्यामरि स्याबा गोःबाला व्याहारिक ग्युइकादे पिन्सेला ताम थान्जि। 

तामाङ ह्युल्बारि छार्म्याङ ताम्बाकादे उत्पादन लाबा दोन्तासे स्हेङ्बा गेताङला गिक्छा रेरि ताम्बा गेदुङला ग्रेन गाउराइ खोजराज गोलेसे ताम्बा ङोसेबा, ताम्बाला किसिम, गेदुन थेन संरचना फिरि प्रशिक्षण दोन्बा मुला। 

थेराङलासिन ङिच्छा, सोम्छा थेन ब्लिच्छा रेरि ताङसे- ताम्बा थेन ताम्बाला स्हेकादे, ह्रामा थेन ताम्बा व्हाइ, ह्रोल्मो थेन गोबा आसेम ताम्बा स्याबा नुररि प्रशिक्षण पिन्सेदा मुला। डारे कुनु बिसाम समापन गेताङ तासेला मुला।

बौद्धनाथ क्षेत्र विकास समितिला न्होर ह्रोरि स्हेङ्बा प्रशिक्षण गेताङरि २१ जोङकादेग्याम छार्म्याङ ताम्बाकादे बोकिन्बारि दोखाबा मुला।