घ्याङ्लेख गाउँपालिका स्तरीय गिक्छा भलिबल थेन फुटबल प्रतियोगिता तिजि
सिन्धुली, १२ तापा, कामरे । ‘ह्युल्साला लागि क्लाङ्छ्योङ, ल्हुइथाङला लागि क्लाङ्छ्योङ’ बिबा उद्घोष लासि घ्याङ्लेख गाउँपालिका स्तरीय गिक्छा ह्रेमकोला भलिबल थेन फुटबल प्रतियोगिता २०८२ चुबा मुला ।
गाउँपालिकाला स्यानचोहो शंकरमान घलानला ग्रेनडोन्बोरि गेताङ ठ्वाङ्सेन ताबा मुबा । गेताङ घ्याङ्लेख गाउँपालिका क्लाङ्छ्योङ फेल्गेबा दाछोकला चोहो अविनाश वाइबाला चोहोदानरि ताबा मुबा ।
घ्याङ्लेख गाउँपालिका क्लाङ्छ्योङ फेल्गेबा दाछोक सिन्धुलीला आयोजनारि ताबा थेच्चा प्रतियोगिता तापा १२ हेन्से १४ गतेदोना सन्चालन तासेला मुला । गाउँपालिका स्तरीय गिक्छा ह्रेमकोला भलिबल थेन फुटबल प्रतियोगिता घ्याङ्लेख गाउँपालिका २ डुम्री क्लाङ्पाङ्ग्यालरि ताचिबा मुला ।
घ्याङ्लेख गाउँपालिका स्यानचोहो शङ्करमान घलानसे खाजिबा वडाला खाजिबा टिमसे खाराङ्बा क्लाङ प्रदर्शन लाला बिबा ताम गोबारि क्लाङ्छ्योङ प्रतियोगिताला आयोजना लाबा पाङ्जि ।
थेसे पालिकानाङ ग्याम याखारगि ज्याबा क्लाङ्मि टिम उत्पादन लाबारि तिगा कात्ते खर्च ल्हागतिला थे गाउँपालिकाग्याम विनियोजन लासेला पाङ्जि । घ्याङ्लेख गाउँपालिकाला जोङस्तरला थेन प्रदेश स्तरला क्लाङ्मि उत्पादन लाबाला लागि तोबा लगानी लाबारि गाउँपालिका तयार मुबा प्रतिबद्धता व्यक्त लाजि ।
घ्याङ्लेख गाउँपालिका क्लाङ्छ्योङ दाछोकला चोहो अविनाश वाइवासे क्लाङ्छ्योङ थुमरि खालाइसे ग्यालठिम, मनोबल ताइना लाबा गे आलाबारि म्होइजेन लाजि । छ्यामरि, थेसे क्योङ क्लाङ्छ्योङ चेबो क्लाङ्मिजुगुदा अनुशासित थेन मर्यादित तासि क्लाङ क्लाङ्बाला लागि नोन म्होइजेन लाजि ।
घ्याङ्लेख गाउँपालिका स्तरीय गिक्छा ह्रेमकोला भलिबल थेन फुटबल प्रतियोगिता २०८२ रि तिनि कालीस्योङ थेन तामाजोर गुङ फुटबल प्रतियोगिता ताबा मुबा । चु क्लाङरि १–० फेबासे तामाजोरदा ब्रेना लाबान कालिस्योङसे डाबा मुला ।
गेताङरि घ्याङ्लेख गाउँपालिकाला स्यानचोहो शंकरमान घलान, वडा नं. १, ४ थेन ५ ला वडाचोहो थेन स्यान्दो म्हिकादेसे बोकिन्बा मुबा ।
(छिगकि दोनः ह्युल्सा– राष्ट्र, क्लाङ्छ्योङ– खेलकुद, ल्हुइथाङ– स्वास्थ्य, फेल्गेबा– विकास, दाछोक– समिति, स्यानचोहो– उपाध्यक्ष, क्लाङ्पाङ्ग्याल– खेलमैदान, क्लाङ– खेल, क्लाङ्मि– खेलाडी, चेबो– प्रेमी)
तपाईको प्रतिक्रिया दिनुहोस