ओन्मा ओन्मा
म्हिसे कोन्ज्योसोम न्हामुबा 
बिले–
दशरथ थेन कौशिल्या म्हि मुबा
थेन्से न्हाजि राम कोन्ज्योसोम !
बिले–
बासुदेव थेन देवकी नोन म्हि मुबा
थेन्से न्हाजि कृष्ण !
बिले–
यशोदा थेन शुध्दोधन नोन म्हि मुबा
थेन्से नोन न्हाजि गौतम बुद्ध !

ओन्मा ओन्मा चुह्राङ्बान तामुबा
म्हिसे कोन्ज्योसोम न्हामुबा
कोन्ज्योसोमसे म्हि न्हामुबा 
बिले–
रामला सन्तान
कृष्णला सन्तान
व्हा बुद्धला सन्तान
थेनि खालाइ कोन्ज्योसोम आरेमुबा
जेक्खे म्हि मुबा !

ओन्मा ओन्मा 
कोन्ज्योसोमसे म्हितेन चेगाइ लामुबा
झन दिमनाम सुताइ स्होमुबा
बिले–
रामसे सीतातेन
कृष्णसे गोपिनीकादेतेन
चुह्राङ्बा चुह्राङ्बान !

ओन्मा ओन्मा
कोन्ज्योसोमकादे
तिनिह्राङ्बा
आम्राङ्बा थेन आतंककारी आतामुबा ।

ओन्मा ओन्मा चुह्राङ्बा तामुबा
बिले–
हात्तीला थोबो म्हिदा थुइमुबा
बोकाला थोबो नोन थुइमुबा
चराकादे ताम पाङ्मुबा
पशुकादे थेन दोङ बिरुवासे नोन ताम पाङ्मुबा
म्हि युङ्बा दोसि नोन केमुबा
बिले–
परस्त्री गमनला केबासे 
विष्णु कोन्ज्योसोम शालिग्राम दोबा मुबा !

ओन्मा ओन्मा 
शुन्य ग्याम मुतेबा स्हे ठुङ्मुबा
याखारगि म्हि जेक्खे तामा नोन
थेदा गणितसे शुन्य तेन्मुबा
बिले–
सृष्टिला उषादुइरि
जेक्खे शुन्य मुबा
तासाइ याखारगि ह्रेमकोला बिसाम शुन्य न्हाङरिन मुबा
थे ब्रम्हा बिबा म्हिसे
चु मुतेबा बम्हाण्ड स्होजि ।

ओन्मा ओन्मा तिगाइ स्होबारि 
शुन्य ग्याम नोन संभव मुबा !

ओन्मा ओन्मा 
म्हि स्होबारि 
जामेकोला थेन ह्रेमकोला आतोमुबा
ङ्या थेन डिम्बा आतोमुबा 
पाठेघर थेन कोला न्हाबा स्हु आतोमुबा
बिले–
ब्रम्हासे सुङग्याम नोन म्हि न्हाजि
पाखुराग्याम नोन न्हाजि
काङसुग्याम नोन न्हाजि
ओम काङफ्ला ग्याम्सेन न्हाजि ।

दातेला शताब्दीरि 
विज्ञानसे लाबा चमत्कार
ओन्मा ओन्मा देबाः लासि तामुबा !

तिल्दाबिसाम–
दाते ङ्योइसि हैरान ताना लाबा नास्तिक मुला
प्रमाण म्हाइसि हत्तु ताना लाबा विज्ञानचेमो मुला
तथ्य म्हाइसि धौ धौ ताना लाबा भौतिकवादी मुला
ओन्मा ओन्मा
चुह्राङ्बा खालाइ नोन आरेमुबा
जेक्खे जय जय लाबाजुगु मुबा
थेतासि ओन्मा ओन्मा
असंभव असंभव ताम नोन तामुबा !
२०७६।०५।२८, भक्तपुर
(छिगला अर्थः ओन्मा– उहिले, कोन्ज्योसोम– भगवान, केबा– जन्मनु÷राप्नु, ङ्या– बीर्य, देबाः– सजिलो, चेमो– प्रेमी)

दोःबा : यकिना अगाध