ह्युल ख्लाबा ल्हानान ताजिन्जि
तासाइ दातेनोन म्हाङरि खाबारि ख्लाबा आरे
थे रोशी थेन सुनकोशीला गु,
तेमालला कुरि मुबा ङाला चेगाइ नाम्सा । 
चुर्से ङा
ह्राङ्ला लिउतेन ह्युल डान्चिबा मुला 
ओम सेम रेला याखारगि ङ्योइबा
‘ओइ केपी आपा... !’
तिगा देन्बान एसे ह्युल विकास लाजि ? 
आहन टुक्कासे जेक्खे ह्युला स्होला ले ?
चुम्बिर सुङरि म्लाङ चस्मा ढल्कप लासि
खाइमादोना गाप्ला गरिबीला यथार्थ ?
भ्रष्टाचार आरेबा नेपाल बिसि
र्दिा ग्याप्से टुबेलुदिला न्होर ज्याचिबा
एला स्ह्याङ्बोकादेदा तिगा एसे ङोआसेनि ? 
एला छार युगला नारालान गुङ
क्योलोलो क्योलोलोला छार पुस्ताकादे
स्हुला दोइ पुइसि खाडिरिक्यार वाङ्बा
तिगा थे नोन आम्राङ्नि ? 
ह्युलला थोप्साङ स्होला बिसि
देन्बान झोले बिसि दाबी लाजिम तिनिहेन्से
तिगा देन्बान ह्युल स्होबा म्हाङ म्राङ्बान हिन्ना ले ?
ङाइमि म्राङ्ला एला राष्ट्रवाद
जेक्खे कुर्सीरिन सीमित मुला । 
आबि ङाइ ग्लेवादी नोन ठिक बिसिमाम
तासाइ तिल्दा केना लाचिबा मुला
गणतन्त्रला मिनरि अधिनायकवाद ? 
ह्युल विकास
एला हान टुक्का थेन भाषणसे तासेला आहिन
ज्याबा सिस्टमसे तासेला हिन्ना
थेतासि सिस्टम पोबारि
नारा आहिन सोच पोतोला ।
लिच्छाला ङ्योइबा केपी आपा... !
एला चु झोले नारासे ह्युल देन्बान ङ्हाच्छा वाङ्ला ले ?
कि थेनोन खेबाः पोररि दोसि छार फ्लाक्पा पट्टी जेक्खे हिन्ना ?

टोकियो, जापान ।

(छिगला अर्थः लिउ– भविष्य, ङ्योइबा– प्रश्न, देन्बा– सत्य÷साँच्चै, च्युम्बिर– चाउरिएको, स्हु– दुःख, थोप्साङ– भाग्य, खेबाः– पुरानो)

दोःबा : यकिना अगाध