प्राकृति जेबासे च्योरप्लिङ्बा
याखारगि जेबा मनोरम ह्रि तिनि
उराठ ल्हागतिबा मरुभुमिरि क्रोचिमुला,
चार वर्ण छत्तीस जातिला
साझा म्हेन्दोवान तिनि
विवेकहीनता थेन मुर्खताला
होपहोप्पा मेरि क्रोचिबा मुला,
खाइमादाम्मान मुतेबा दुइ क्रोचिबा मुला ।
सेम नोन लोभ्याप लाबा, जाम्बुलिङदा ङोसेना लाबा
म्हुइ ह्राङ्बान टल्काप तासि क्युइ ब्योङ्बा
आकोना रापचिबा ज्योमोलुङ तिनि
अनुकुल जलवायुला ब्रान्बारि बोल्चिबा मुला
क्योङ छोन्बोला केवादाता वातावरण
म्हिला आज्याबा गेला चपेटारि
प्राकृतिक दोहनला मेरि तिनि
क्रोचिमुला, गोङ्मा गोङ्मा बोल्चिबा मुला ।
तोङ्जाछा तोङ्जा चाङ्मा क्षमता मुबा
जेबा थेन शान्तिपूर्ण म्हेन्दोवान तिनि
इमानदार च्याबा म्हिला अभावरि
दोपला माररि बोल्चिबा मुला
खाइमादाम्मान मुतेबा दुइ बोल्चिबा मुला
म्हेन्दोवानरि केसि नोन
म्हेन्दो दुइबारि याङ्बा आरे चुरि
ताङ्बा थेन ताङ्बारि याङ्बा आरे चुरि
चु ल्हाना खंख्या मुबा साजाम्बुलिङला दोप्ताकादेसे
साजाम्बुलिङला थे ल्हाना ज्योबाम्हिकादेसे
यारि कुरि तो थोसि अन्न फुइना लाबा
हथौडा ओम ज्यावल थोसि दि रेन्बा
थे ल्हाना संख्याला जगत न्हाबाकादेसे
चाबा, चिबा, क्वान्बा, संकट थेन अभावरि
बोल्चिबा मुला थे जगतन्हाबाकादे
खाइमादाम्मान मुतेबा दुइ क्रोचिबा मुला थे म्हेन्दोवान न्हाङरि ।
चाङ्बा, साङ्बा थेन निश्चल
कलकल लासि थेनआताना ब्योङ्ला
म्हेन्दोवानला कुरिन स्योङ्ला क्युइ
अन्नला भण्डार उर्वर सा
खाइमादाम्मान बोल्चिबा मुला तासि ग्वाकलिङ ।
ल्हाना ङोसेबाला ग्योइलो क्वान्बा
थे जेबा मनोरम म्हेन्दोवान
धुर्त थेन मुर्ख च्याबा म्हिला आज्याबा गेसे
लो थेन न्हुपला साँढेला नाङ्बासे
च्युम्बाकेन मुला थे म्हेन्दोवानला आकारतिनि
लिखन्डि ताबाकेन मुला म्हेन्दो आरेना थे म्हेन्दोवान तिनि
सारक्युइला स्हुरि उजाड दोजि म्हेन्दोवान तिनि ।
काभ्रे ।
(छिगला अर्थः बोल्चिबा– तड्पिरहेको, म्हेन्दोवान– फूलबारी, ज्योमोलुङ– हिमालय, चाङ्मा– सफा/उज्यालो/चहकिलो, जाम्बुलिङ– संसार, साजाम्बुलिङ– पृथ्वी/धर्ती, दोप्ता– मालिक, ज्योबाम्हि– सिंगारक/सिंगारकर्ता, ग्वाकलिङ– काकाकुल, च्युम्बा– खुम्चिएको)
दोःबा : यकिना अगाध
तपाईको प्रतिक्रिया दिनुहोस