सातान स्ह्योरि ङाला आमा
मुइला म्हेक्लि होचिमा 
ङा बिसाम व्हाइखा ब्रिचिबा ताला 
तिल्दाबिसाम थे फुर्सदसे ङादा
स्ह्योङरि जेक्खे ह्रो पिन्चिबान दुइरि
फुरप तापिन्ना व्हाइखाकादे ।

क्याम्साङ नाम्साला सालिम डुइरि
दिनिला होइस्हेर फेबाकेन लामा
खेप्पादुइला आपा आमा
धर्सा छ्याबा सुक्खा ङ्होरि
तेप तेप टु ब्रेना लासि
छेला दोइ न्हासि
गारो गोठेला कुलेसोरि स्योङ्थान्मा
ङा बिसाम रेनाङला लागि
ग्लोङ्बा छ्याम्बाला छ्याम छ्याम
हतारला बु आन्हाचिमान
ह्राङ्ला ग्यामरिक्यार
मि स्योङचिबा ताला ।

ङ्यासे क्युसिकेन निमा
खुयु आमा ख्रेन्बाला बोमोरि 
कानसिम चामाहेन्से
बोबा फोरि 
खिबा टुसे बाम्बा के
कुदापला मेरि सेकाप लाचिमा
ङा बिसाम कारबाकेन लाबा
कानला धर्यता म्लेसि
व्हाइखा ब्रिचिबा ताला 
तिल्दाबिसाम
स्ह्योलिच्छाला ङ्हीछा आहारा
ङाइ नोन थे कानसिम चासि
म्रेनजिन्बा ताला ।

म्हुन चिप्सिकेन निमा आपा
रेगि ब्लाप्बासे
नुब्बा निद्रारि ब्लुम्सि ङ्होर्चिमा
ङा बिसाम सेमला उ ग्याम
फाप्बाकेन लाबा विम्ब ख्रुङचिबा ताला । 
कामरेला चेमो फुर्सद नोन
रासे ब्यनपिन्ना ओम ग्लोङ्पिन्ना
स्योङ्ला बगर ङामङुम
बुबा ल्याफ्रो छेला
ज्याबा गाँसतेन ।

थेतासिमि ङाइ म्हाइबाकेन मुला
ह्राङ न्हाङरिन ङोआसेबा फुर्सद
दिमला दारि च्योसि
ङादा च्याचिबा 
पुख्र्यौली डम्फुतेन सेम देप्सि
टुङ्ना काइतेन चेगाइ लाबा दुइ
आपाला मस्तिङ नाङ मुबा
ताम्बा दर्शन ओम मारुनी व्हाइ
थेन आमाला सुङरि कण्ठ फापारे व्हाइ
ङ्यान्बा दुइ
ओम ह्रुइ ठुङ्सा थेन बाप्साला ग्युइ
ङ्यान्बा, गोबा थेन ब्रिबा दुइ । 

दराजरि चिमथान्बा 
म्हेमे थेन मामला कुतेन
साङ्गे च्योमदान्दे थेन च्याङरेस्हिदा
क्युइ फुल्बा दुइ
खुमदिरि नाङ्बा
बुद्धचित्ता माला ङाबा दुइ
ओम रिवोतला, छ्युमिग्याजलिङ गुम्बा 
ताक्मो ल्हुइजिन, सिङ्कुन
थेन ज्यारुङ खास्योर ज्याल्सि
सचेतनादा सन्तुष्टि ताना लासि
ह्रिबा सेम मुला
मेख सिनाकि व्हाइखा ब्रिबा दुइ । 

तासाइ दर्जन गाङ्साल दुइ ग्लोङ्जिन्जि
स्याप्बारि खाम्बा आरे, ङोसेबारि खाम्बा आरे
ङोआसेबा चेमो दुइ
छोर्जि लासिकेन ब्राबा मुला थे
ङाइ ङोआसेगाइ बिसिमाम
ङादा ह्रोआपिन्बा थे निष्ठुरी दुइ । 
कुचिस दोपिन्जि थे
आगोनि थेसे ङ्हाउरि ङाइ
बाध्यताला के खिसि
म्हेक्लि होसि थेतेन दाङ्बा दुइ । 

अभ्यस्त मुबा ङ्हाच्छा ङा
ओम अज्ञात मुला ङा दातेनोन
खाइ खाराङ्बा हिन्ना दुइला ह्रिक्पा 
कि तातोला थे फारोरि
लिच्छाला लागि साँचतिसि 
आहिन बिसाम थेसे ङादा सातान
लुचिबा मुला 
मोक्कोन स्हेला क्योङ तासाइ नोन
अभाव मुला थेनोन दुइला । 

काभ्रे

(छिगला अर्थः क्युबा– गडिनु, नुब्बा– गाढा, ङ्होर्बा– घुर्नु, उ– कन्दरा, ख्रुङ्बा– कुर्नु, चेमो– प्यारो, ङामङुम– छेउछाउ, चेगाइ– माया/प्रेम, चिम्बा– थन्क्याउनु, फुल्बा– चढाउनु, ङाबा– जप्नु, ज्याल्बा– दर्शन गर्नु, ङ्हाउ– विगत, ह्रिक्पा– स्वभाव/आचारण, लुबा– झुक्याउनु/ढाँट्नु, कुचिर– कन्जुस, । दोःबा : यकिना अगाध)