ङाला सेमला ताम गोबा एनोन हिना आमा
ख्योल्साइ सेमरि ताम छुम्सि थान्बा एनोन हिना आमा ।
खान्दामान तासाइ ज्याबा हाम्बा ङ्योइबा एनोन हिना आमा
म्हिसे तिकादाम्मा पाङसाइ सेमरि नासि छार्न लाबा एनोन हिना आमा ।।

सेमरि दुङाल थोसि ङ्हाच्छा ब्राहाम्बा एनोन ताजि आमा
दिमथेमेला ज्याबा म्हाङ थोसि ब्राबा एनोन ताजि आमा ।
हान्डो ग्युरो छेसिङ लासि ग्रेन म्हि दोना लाबा एनोन ताजि आमा
म्हि वैरिला ङोन्छाङ डासि जाजामे छार्न लाबा एनोन ताजि आमा ।।

चुरि ज्याबा लासि ब्रासाइ ताम थाबा म्हि ल्हाना मुला आमा
ह्राङ्ला मोलामसे रेम्हुन डासि ङ्हाच्छा ब्रामुला आमा ।
तिगाइ दुङाल तासाइ आमादा ङ्हाच्छा थुम डान्मुला आमा
आमला मिरि मिख्लि ताइबा गे लासि खाइमाइ आब्रा आमा ।।

ग्रान फाला आमा एसे लाबा गुण खाइमाइ फाआखाम्नि
चु सेमसे ह्राङ्ला चेगाइला बायान लाबारि आखाम्नि ।
सेमरि छार छार थोसि आमादा खाइमादाम्मान डान्मुला
ङादा दुङाल तासाइनोन आमाला मोलामसे छेप्काला ।।

सिन्धुली घ्याङलेख गाउँपालिका वडा ५ बुदुमचुली

(छिगला अर्थः ख्योल्बा– गल्ती)