१ किम्बु
तिगा एसे खाइमाइ किम्बु म्राङबा मुला ?
थेरि ताइला, थे म्हुक्गिला सारि
थेला वाला धब्ब चिला ।
ताइबा बिमा स्हेर स्यान्दो तिगाइ आता
ङाइ कादे गेनाम म्राङ्बा मुला–
ग्रेनग्रेन भवनग्याम ताइचिबा
ताइसि किम्बु दोबा ।
(छिगला अर्थः स्हेर– पीडा, गेनाम– मजदुर/श्रमिक)
२ ग्लेठिम
ग्रेन–ग्रेन पोबा नोन
कादे देबाःन लाला चुरि
या खियाप लाबा गेनामकादेदा
ग्लेठिम कार्यकर्तारि पोबारि नोन
कादे देबाः मुला होइ ?
क्रनेकादेसे चु पोबादा थिला
ओम सुलीदोना दोना लापिन्ना ।
(छिगला अर्थः ग्लेठिम– राजनीति, देबाः– सजिलो)
३ नामला दाम्बा
ङा खाइमाइ बैंकला साधारण कर्मचारी दोबारि आखाम
चाबा थुङ्बा स्हेला सेल्सम्यान नोन आहिन
खाजिबाइ पार्टीला नेता नोन आहिन
न्हा ट्याक्सी डाइभर
न्हा ओम प्रचाररि ब्राबा मार्केटर ।
ङाइमि जेक्खे चोखे सेम लामुबा
सहरला मुतेबा बिमा नोबा ग्लारि राप्सि
दिला रुङ्बा नाम्साला गुङरि थे म्रिङ्कोलाला दिम च्याबारि खाम्गाइ
खाल्दा ङाइ चेगाइ लाबा मुला
थेतासि ङा निर्माण गेनाम दोजि ।
छिगला अर्थः नाम– पेशा,
४ ह्रोम्हि
ङ (कोन्ज्योसोम)ला ह्रो आहिन
चुला याखारगि जेक्खे कारण मुला
थेला ज्याङ ल्हानान खेबाः ङ्हाउतेन थुइबा मुला
थेदुइरि ङान्ना गोरडु दिमम्हे
याखारगि च्युम्बा कोठारि चिमुबा ।
ओम (कोन्ज्योसोम)तेन भव्य दिम मुबा
थेरि थे याखारगि चिमुबा ।
(छिगला अर्थः ह्रोम्हि– मिमित्रता, ह्रो– मित्र/साथी, कोन्ज्योसोम– ईश्वर/भगवान, ज्याङ– जरा, खेबा– पुरानो, ङ्हाउ– अतित/विगत, दिमम्हे– परिवार, च्युम्बा– साँघुरो)
५ डोङ्बाला लोङ्बा
केवानाङ ङाइ चु तामरि विश्वास आलानि–
लुबा ताम ख्योल्बा हिन्ना
ख्योल्बा हिन्ना खालाइदा सताप थालाउ ।
केवानाङ चु ताम स्वीकार लाजि–
डोङ्बा नोन केवालान गिक्खे बो हिन्ना ।
चोदे ताना ताना नोन लोङ्बा छोर्ला डोङ्बा म्राङ्सि
लोङ्बा खाला, डोङ्बा लिच्छा स्यान्दो दुनियाँरि नोन गेनाम नोन दोसि चितोबा तामसे ।
(छिगला अर्थः डोङ्बा– मृत्यु, लोङ्बा– डर, लुबा– झुठ, ख्योल्बा– गलत, केवा– जिन्दगी÷जीवन, बो– हिस्सा, अंक, केबा– जन्म, नाबा– भोगाइ, स्हु– व्यथा÷दुःख, ल्हुइ– शरीर, ग्रेनराप– उपन्यास, स्योस्यो–पत्रिका,)
(सबीर हका इरानला गेनाम व्हाइखाब्रिखेन हिन्ना । थेला केबा सन् १९८६रि इरानला करमानशाहरि ताबा मुबा । राजधानी तेहरानरि चिबा थे भवन स्होबा ग्लारि गे लाला । केवाला नाबादा सामान्य थेन क्योङ स्हु ब्रिबा थेला व्हाइखारि गेनामला विवशता, संघर्ष थेन बाङला बयान याङ्ला । थेला गोर ङ्ही व्हाइखा पोप तेबा मुला । थेसे इरान गेनाम व्हाइखा प्रतिस्पर्धारि गिक्छा पुरस्कार याङ्जिन्बा मुला ।
याखारगि ल्हेङ्मोरि सबीरसे बिबा मुला, ‘ङा ब्लाप्बा मुला, ल्हानान ब्लाप्बा मुला । ङा केबा ङ्हाच्छा हेन्सेन ब्लाप्बा मुला । ङाला आमा ङादा फोरि छार्ना लासिकेन गेनाम लामुबा, ङा थेनोन दुइहेन्से याखारगि गेनाम हिन्ना । ङा ह्राङ्ला आमाला ब्लाप्बा महसुस लाबारि खाम्ला । थेला ब्लाप्बा दाते नोन ङाला ल्हुइरि मुला ।
सबीरला आन्सार, तेहरानरि थेतेन म्हेर्बा ग्ला आरे । सडकरि कोर्सिकेन थेसे कादे म्हुन थाबा मुला । चुनोन कारण दशक गिहेन्से थेसे ह्राङ्ला ग्रेनरापला गे जिन्ना लासि थेनताम्याङ्बा आरे । इरानरि व्हाइखा, ब्रितामकादेरि सरकारसे सेन्सरसीप लागु लाबा मुला । व्हाइखाब्रिखेन–ब्रिखेनकादेला छिग सरकारसे सेन्सर लासि डिलिट लापिन्ना, थेतासि थे अपुरो छिगह्राङ्बा दोला । फिरि थान्बा व्हाइखारि खाजिबा छिगदा कोष्ठकरि थान्बा मुला, मुल फारसी ग्योइरि इरान सरकारसे थे छिगदा सेन्सर लापिन्बा मुबा ।
सबीरला व्हाइखाकादेरि लेङ्बा जाम्बुलिङला ध्यान लिच्छाला दिङकादेरि क्योलोलो निबारि चुबा हिन्ना । थेला व्हाइखाकादेदा व्हाइखासम्बन्धी चर्चित स्योस्यो ‘मोडर्न पोयट्री इन ट्रान्सेलेसन’ (एमपीटी)से २०१५ ला जनवरी बोरि ग्ला पिन्बा मुबा । चु व्हाइखाकादेदा फारसीग्याम नसरीन परवाज थेन ह्युबर्ट मुरसे अंग्रेजीरि थेन अंग्रेजीग्याम गीता चतुर्वेदीसे हिन्दीरि दोबा हिन्ना । दोःबा : यकिना अगाध)
तपाईको प्रतिक्रिया दिनुहोस