बि.सं. २०६० ल्होला ड्वाफ्रे ला मुबा । याम्बुग्याम ङा बिलाम मुक्तान याखारगि अनौंठो ल्हामरि थोन्जि– दोखाङ आरेबा ।
नाइट बस क्रेसि ङा काँकरभिट्टादोना दोजि । थेरि सोमरे चिजि ओम दोसि न्हुपव्हाना बुटवल, भैरहवा तासि सुनौली बोर्डरला होटल ‘मुक्ति’रि म्हुन गि थाजि । न्हाङ्गारदाङ्से स्ह्योरि योनान भारतरिक्यार ल्हाम तिजि– दिल्ली निबा लोकल बसरि ।
२४ घण्टादोना बसरि हन्डर चामानोन दिल्लीरि आदोनि । याखारगि खाइमाइ आनुप्बा ह्राङ छोर्बा ल्हाम लिच्छा खामआखाम रेला २ ङ्ह्यामारिक्यार नयाँ दिल्लीला बसपार्करि दोजि ।
चु ल्हाम चोत्तेरि जेक्खे थेनआतानि । थेग्याम दोसि हिमाचल प्रदेशरिक्यार कुल्लु–मनाली निबा बस क्रेजि । चण्डीगढ, किरतपुर, बिलासपुर ताबान निबा ग्यालाम स्ह्योरि ह्याल तातेमा मण्डी दोजि ।
ह्रोसे पाङ्जि, ‘चुरिम डि.बी. लामा बिबा ह्याङ्लान नेपाली ठेकेदार मुला, थेला हिमाचलला ब्लोनजुगुतेन नोन ज्याबा ब्रेल्बा मुला । ह्याङ्दा ह्रुप ताबारि दोगास्ह्युला ।’
तिगाइ दुइरि ‘आउट’ बिबा जाजाबा बजाररि दोजि । ङान्दा किन्बारि खाबा डि.बी. लामामि ङाला ह्राङ्लान खिम्जे थोन्जि । ङादा म्राङ्माहेन्से थेला लिला छोन पोबाह्राङ ताजि ।
दिम– दिमथेमेला ताम लाबान थेसे ङान्दा चाबास्हे ख्वाजि– गेङ, परौठा, खु थेन दही । थेलिच्छा ङानि कुल्लु बजाररि दोजि । याखारगि होटलरि थान्जि । थेलिच्छा डि.बी. लामा खानाङ म्हाजि थाहा आतानि । ङानि गोरङ्हा मुबा । खाल्छे तिल्दा थेरि बोर्जि, तिगा गेला लागि बिबा तिगाइ थाहा आरेमुबा । रे थाल्सिकेन निजि तासाइ थे हप्ताछा दोना आखानि ।
होटलवालासे कानला न्होर ह्रिबारि चुजि, ङान्तेन तिगाइ आरेमुबा । ङा गोल्छेसे बसपार्करिक्यार थोन्जि ओम थेरि मुबा नेपालीजुगुतेन ङोसेबा देप्बारि चुजि ।
चुनोन ताङरि सिद्ध पौडेल मिनला याखारगि ठेकेदारतेन मित्रता ताजि । ह्रोसे गेलाबाजुगुदा ल्हे–ल्हादाख पुइबा तयारी लाचिस्ह्युबा चिम । ङाइ नोन निबा ताम लाजि ओम म्हुना ह्योह्राङ थोन्जि ।
१८ घण्टाला ह्रेङ्बा ल्हाम लिच्छा ल्हे–ल्हादाख दोजि । थेरि पाल ल्हागाब लासि म्हेर्गो बिबा मुबा तासाइ ङाइ माङ्ग्यार नोन म्हेर्बा ताम लामाहेन्से थेर्ला वातावरण गोबा ह्रोसे ङादा ‘ओक्सल गेस्ट हाउस’ रि दोना लापिन्जि ।
ङा थेरि ला गि चिजि ।
ल्हे–ल्हादाख ख्यारख्युरला थुमरि च्यामा थेरि छोङ– छोङनाम लाबा ल्हानान नेपालीजुगु स्याप्जि ।
थे ग्लारि गेलाबा सिजन जेक्खे ला सोम ताबा चिम । स्यान्दो दुइरि तिगाइ लाबारि आखाम । तिल्दाबिसाम थे ग्ला ग्लिङ्ला मरुभूमि हिन्ना ।
थेनोन ताङरि ङा कार्गिल थेन दरास ह्राङबा ग्लाजुगुरि नोन दोजि । दरास याखारगि जाजा तासाइ स्हिवा थेन रमणीय बस्ती मुबा । दान्नाइ– ३० दिमला नाम्सा ।
थेरि ङा १५ रेते चिजि ।
दान्नाइ ला ङ्हिलिच्छा दोसि हिमाचल प्रदेशला कुल्लु–मनाली फ्लिक दोजि ओम पत्लिकुल ख्यारख्युर ला गिते चिसि दुइ पुइजि ।
थेलिच्छा नेपाल दोसि खाबा आप्ता लाजि ।
नेपाल फ्लिकदोसि निसेला ताम लामा थेर्ला तिगाइ नेपालीजुगु क्राजि । थेनि गुङ्ला रामेछापला याखारगि खेप्पा आपा मुबा–४३ दिङ्हेन्से थेरि गे लासिकेन चिसाइ नोन ह्राङ्ला ह्युलरि दोसिमाम खाबारि आयाङ्बा ।
थेसे मिग्याम मिख्लि प्रुलप्रुल पुइसिमाम पाङ्स्ह्युजि–
‘नाम्सारि ङाला नोन दिमथेमे, जा जामे मुतेबा मुला । ङामि तिहाररि जुवा क्लाङ्मा ग्यार्जा सोम ब्रेजि । छे ल्हागतिमाहेन्से फिह्युल खाजि । दाते चोत्ते दिङ वाइजिन्जि, दारेम ङाला डोङ्बा नोन ह्राङ्ला ह्युलरि तासेला आरे ।’
चु ताम थेमा सेम क्रोजि ।
थेलिच्छा सिन्धुलीला स्ह्याङ्बो–म्हागेनला नोन राप ओस्बान... । हिमालचल प्रदेशला कुल्लु जोङ्लान जेलरि दाते नोन २५० बिमा ल्हाना नेपालीजुगु जेल केवा थाचिबा मुला ।
चु मेतबा स्हेर, मिख्लि थेन बन्धनला गुङरि ङाइ ह्राङ्लान ह्युलरि फ्लिकदोसि खाबा आप्ता लाजि ।
नेपाल दोगामा ला ङ्हा थाल्जिन्बा मुबा ।
दिमरि मुतेबा चिन्तित चिम– जा जामे, दिमथेमे । ङादा म्राङ्मा क्योङ्ला मिग्याम ताङ्बाला मिख्लि ताइजि । फिह्युलला थे ल्हाम ङाइ तिनिदोना म्लेबारि खाम्बा आरे ।
ल्हानान नेपालीजुगु ह्रुप ताजि, थेन्दा ठेकेदारजुगुसे चुङ्बा मुबा– थेनि दाते नोन ह्राङ्ला ह्युलरि दोसि खाबारि म्याङ्बा आरे । थेन्ना स्हेर, बन्धन थेन मिख्लि ङाइ ह्राङ्लान मिसे म्राङ्जि । थेतासि ङाइ बिला– ‘तिगाइ लासेला हिन्साइ ह्राङ्लान ह्युलरि लाइ । फिरग्याप ह्युलला म्हाङ देन्बा आता । थेसि आहिन, गोसि आप्ता लाइ ।’
(छिगकि दोनः ल्हाम– यात्रा, व्हना– तर्फ, ब्लोन– मन्त्री, ब्रेल्बा– सम्बन्ध, खिम्जे– छिमेकी, छोन– रंग, हप्ताछा– हप्तौं, आप्ता– निर्णय, फिह्युल– विदेश, केवा– जीवन, स्हेर– पीडा)
दोःबा : यकिना अगाध
.png)
तपाईको प्रतिक्रिया दिनुहोस