म्हारल्हेम स्ह्यो, दिनिला स्हेरतेन
साजोला थोबा च्योसिकेन फेला ह्याल
तेमाल गाङदा कोर्सिकेन
कुख्वाइसि सुनकोशी थेन रोशी स्योङ ताइला मारग्युरु
नमोबुद्धदा साक्षी थान्सि फाबा ग्रान
म्लेबारि आखाम, थे मिला नुप्बा ग्रान 
ए थेन ङा सेम ङ्हीला गिक्खे धुकधुकी
चेगाइ ब्योङ्मुबा ले
थे कुटिसिरि झनझन
लाथान थेन देउरालीरि
म्हेन्दो फुल्बा थे स्ह्यो डान्गो
नार्केला ग्यालाम ब्रामा एदा चुङ्बा या डान्गो
सडक शान्त मुबा सेम प्लिङ्बा मुबा
मौसम जेक्खे आहिन ह्याङ्ला चेगाइला लाबा नोन ब्योङ्बा मुबा । 
आम्लेगो होइ थे स्योम्बा 
थे मि
स्ह्योला दिनिसे दुबा
थे चेगाइला खँजर 
छिग आहिन
थे दुइकादे देन्बा चेगाइ हिन्ना 
थेसे मुतेबा स्ह्योदा
चेगाइला ह्याल स्होला ।

(छिगला अर्थः म्हारल्हेम– सुनौलो, स्हेर– किरण, नुप्बा– गहिरो, चेगाइ– प्रिति/माया/प्रेम, ले– नि, स्योम्बा– स्पर्श/सुमसुम्याइ, देन्बा– साँचो, (‘खँजर’ला अर्थ नेपाली थेन तामाङ शब्कोषरि आस्याप्नि– डिक्खेन)

दोःबा : यकिना अगाध