केवा छोनआरेबा आडान्गो
ब्रान्गो दुइसे छोनमुबा स्होला । 
आतासाइ नोन दाते म्हान्बा ह्राङ्बा
लिउ म्हारलाम स्होला । 
आब्रेगो स्हुतेन
सुख ह्राङ्नोन म्हाइसि खासेला मुला । 
स्हेरमि सामान्य हिन्ना 
स्यान्दोला ताम नाबारि,
दुइसे ह्राङ्सेन मलम फोर्सेला मुला ।

एदा ल्हानान रेम डान्ना लाजि ह्रो
ओस्बान स्हेर पाङ्जि, 
तिक्खुरि दिम ख्लासि खामा
चुह्राङ्नोन ताला बिसि गोना लाजि । 
स्हेर चुह्राङ्बान मुला फिरग्यापह्युलरि
खानाङ देबाः ताला ले !
माङग्यार दुनियाँ तिलादाम्मान तासाइ नोन
ह्राङ्ला सेम आक्राबा खानाङ ताला ले ? 
क्राला बितेमा
उन्सिकेन ब्राबारि नोन खानाङ डिक्ला ले
बेनान ङाह्राङ्बा एला ह्रो ताबारि आखाम
सत्रुसे थाहा याङ्साम, बल्ल चाजि बिला ओम ?

थेतासि ह्रो
सेमदा खिसि, ह्राङ्दा कोङ्ना लाउ
क्रेप्सा खिनोन तोला ह्रो
दारे एसे क्राबारि ख्लानोन तोला ह्रो
बाध्यता चुह्राङ्बान परतिजि थोप्साङसे
सहास ह्रुप्सि सोनोन तोला ह्रो
ब्रान्गो, ह्राङ्दा सम्हाल तिउ
ङाला ङोन्छाङ ङेनोन तोला ह्रो ।

ङादा च्यागो
तिल्मा ङानोन ओस्बान दुइरि मुबा
आक्राबा रे, आक्राबा म्हुन
थाहा आरेमुबा ह्रो
कादे क्रासाइ नोन खाल्से दया लाला ले ङाफिरि
मिख्लि खार्मा, ल्हुइ गुर्मा
रेन्बा खालाइ आरेमुबा ह्रो ।

एला ओम ङाला ओस्बान राप ताजि ह्रो
केवा छोनआरेबा आडान्गो
ब्रान्गो दुइसे छोनमुबा स्होला ह्रो ।

(छिगला अर्थः केवा– जीन्दगी, छोनआरेबा– रंगहीन, लिउ– भविष्य, म्हारलाम– सुनौलो, स्हु– दुःख, स्हेर– पीडा/व्यथा, देबाः– सजिलो, थोप्साङ– भाग्य, ङोन्छाङ– सामु)

दोःबा : यकिना अगाध