लोप्खाङ डोमाहेन्सेन
आलातोबा शंका लामुबा
ह्रोकादेसे ङादा ।

गुरुजुगु
गिसेम गि न्हाब्याङरि ताम पाङ्बा थे मुबा
साउती लाबा म्राङ्मुबा 
‘चुला पुर्खासेम म्हे चाला म्हे
दातेइ नोन चामुसिम ।’

खाइमा ल्हानान अप्ठेरोसे
लोप्बाकेन मुबा ग्योइ
बिले
कादे गाह्रो ताला
ल्हिबा दोइ पुइसि दोखाङरि दोबारि
थेदुइरि ङादा ङोसि ह्यार्मुबा
क्यार क्यार ह्रोजुगु
‘भोटे सिसाम गाङरि, म्ल्हा ब्रा ताङरि ।’

ङाइ आपादा पाङ्मुबा
‘आपा ङादा 
बामनला कोलाकादेसे चुह्राङ पाङ्जि ।’
आपा सालिन मुस्ह्युमुबा
जेक्खे चोदे सुङ्स्ह्युमुबा
‘म्हिला लिच्छा थाब्राउ
खुरु खुरु डोगो ।’

आकुदा पाङ्मुबा
‘आप्च्याङ ङादा
बामानला कोलाकादेसे चुह्राङ पाङ्जि ।’
आकु जाकि मुडी मुस्ह्युमुबा
‘हाला थे ङादा ओन्गो
दारेम तिगाइ बिजि बिसाम
पुङगो स्वा ताइना, ङा मुला ।’

तासाइ,
च्याङ्बासे बिसाम निसाल दोसिन ख्लामुबा
‘ओइ ! काठा निउ खोज्छस् ?
आइज जुध्ने ? 
सिङ्गल सिङ्गल आइज ।’

ह्युल खानाङहेन्से खानाङ दोजि
ङा नोन ग्रेन ताजि ग्रेन
कादे वादजुगु नोन ग्लोङ्जि
धर्मनिरपेक्षता नोन म्राङ्जि 
संघीयता नोन म्राङ्जि
विद्रोहीजुगुसे म्हे थासि 
भोज चाबा नोन म्राङ्जि 
तासाइ नोन ङादा अपराधी म्हान्सि च्याला
तिगाइ जोर अपराधी मिजुगुसे ।

ङामि मुस्कानतेन ब्रेबा म्हि
बोमोदा डाबा म्हि
कादेसे ङाला जाततेन थुइसि 
नाकिला ङोन्छाङ ‘भोटे’ थुइपिन्जि
कादेसे ताल्चाला ङोन्छाङ 
तासाइ नोन कुटिसि चिबा मुला ङा
ङाइ सोचतिला ज्याबा सोचतिला
नाकिजुगु इमानदार ताला बिसि गोला
ताल्चाजुगु बाङ्बा ताला बिसि गोला ।

दारेम टा म्हाइबारि खाम्बा ताजिन्मुला ङा
थेदुइरि ङाला बिजाह्रोजुगुसे
क्रास्यारि सुबा टा ।

तासाइ नोन अवशेषजुगु
बोमोला मिनरि 
ताङ्बाला मिनरि 
क्यालोला मिनरि 
आइल्हागतिला ङातेन ।

हली म्हान्ना ङादा हली
ङाइ चेतला म्रापरि म्राङ्ला
ज्युइबा म्युङ्म्युङ्बा ताल्चा
ओम ताल्चारि म्राङ्ला
ह्रेङ्बा छोदा ।

खाल्से ङादा लोप्खाङ डोबा ङोमुबा
थे खुयु म्हे बोर्सि निला
ङाला दिमला ख्राङ्गा तासिमाम सीमा क्याम्साङदोना
लिच्छा लिच्छा मे चुङ्सिमाम
ब्राला थेला कोला 
दोसि खामा खसी डुइसिकेन बाला
कोला ललीपप सिप्सिकेन खाला ।

‘सम्धी ज्याबान मुला’ बिसि ङ्योइला
ङाइ गिक्खेन तोसोला निसाल आपिन रेमरेम
जेक्खे चोदे सोचतिला
ब्योन खसीतेन खुयु म्हे तिल्दा देप्जि ? 
थेला कोलासे मेला साइ तिल्दा ह्रिजि ? 
दोसि कोहोरे गि बोमो तिल्दा लाचिजि ?

लक्ष्मी बिबा
राष्ट्रला प्रतीक तेन्बा नोन
तिल्दा साइ लाजि ? 
तिल्दा चुङ्जि ?

ग्लुबासे जेक्खे चाबा प्रयोजनसे ग्लुजि
चुङ्बासे तिगा प्रयोजनसे चुङ्जि ?

म्हे चाबा अपराधी ताजि 
कथित धार्मिक आस्था चुङ्बा
ओम कथित ह्युललान प्रतीक चुङ्बा
ह्युल सेबाजुगु सज्जन ताचिजि ।

ङादा कठघरारि रापपुङ्जि
थेसे खारेनाङ माला क्वान्सि ब्राजि ।

दोःबा : यकिना अगाध