‘ह्यापी वर्थ डे टु यु जेनिस !’ रुपेश, हरि, अञ्जली थेन मनरुपासे गिक्खे काइरि पाङ्जि ।
‘जेनिस दारे तयार ताउ, केक थातोला ।’ अञ्जलीसे पाङ्जि ।
‘ङ्हाच्छारिम केकरि म्याजिक क्यान्डल क्यातोजि ले !’ मनरुपासे म्लेबा ताम डान्बाह्राङ लासि पाङ्जि ।
‘ओम हरि, केकरि क्यान्डल क्यापिन्ना, अञ्जली थेन मनरुपासे क्यान्डिल म्रापिन्गो ।’ रुपेशसे पाङ्जि ।
‘थेलिच्छा तिगा लासे ओम ?’ मनरुपासे ङ्योइजि ।
‘जेनिससे क्यान्डल सेला ओम केक थाला । ह्याङ बेनासे ताली ह्राप्सि ज्याबाम्हान्बा पिन्बा ।’ रुपेशसे पाङ्जि ।
थे जेनिसला १२ छा केबा रे मुबा । थेसे केकरि क्यासि म्राबा २१ गोर क्यान्डिलदा बुगिरिन सेजि ।
‘नाङ्साल सिजि ल्हाउ केक थासिन ख्लागो !’ थेला गोरब्लिन ह्रोसे काइ गिरिन पाङ्जि ।
ह्रोजुगु ‘ह्यापी वर्थ डे टु यु जेनिस !’ बिसि ताली ह्राप्बारि चुजि । जेनिससे चक्कुसे केक प्लेन लाबारि चुजि ।
‘छक्काल सोम ताजि दातेनोन म्हेर्चिला’ बिबान मस्त ङ्हुबारि म्हेर्बा जेनिसदा थेला आमासे दुरदुर आङ्स्ह्युजि ।
जेनिस चोननिसि डोङ रेजि ओम क्यार्सेजासे च्यासि ‘खाइ ?’ बिजि ।
‘तिगा ताजि जेनिस, तिल्दा चोननिबा ? ओम तिगा खाइ बिबा ?’ जेनिसला आपासे ङ्योइस्ह्युजि ।
‘म्हाङरि ह्रोजुगुतेन ताङ्सिकेन केबा रे दाङ्चिबा मुबा । तिक्खुरि आमासे दुरदुर आङ्मा ङा चोन निजिम ।’ जेनिससे स्पष्टिकरण पिन्जि ।
‘देन्बान आपा, तिनि ङाला केबा रे आहिन ? खाराङ्लासि दाङ्से ?’ जेनिससे आपादा ङ्योइजि ।
जेनिसला आपासे तिगाइ बिआम्याङ्मान थेला आमासे ङ्हाच्छा पाङ्जि, ‘कोलाला केबा रे ताङ्ना लासि दाङ्तोला ।’
जेनिसला आपासे म्रिङ थेन कोलाला सुङरि प्लिक च्यासि ङ्योइजि, ‘तिल्दा दाङ्तोजि केबा रे !’
‘तिल्दा दाङ्ला केबा रे ? कोला न्हाबाला ताङ्बारि ।’ जेनिसला आमासे सुङ्स्ह्युजि ।
‘थेह्राङ हिन्साम ए कोला न्हाबा दुइरि जेक्खे ताङ्ला ? स्यान्दो रेरिजा आताङ आहिन ओम ?’ जेनिसला आपासे ह्राङ्ला म्रिङ्दा ङ्योइजि ।
आपाला ताम थेसि छक्क परतिबा जेनिससे ङ्योइजि, ‘आपा तिगा ह्राङ्से ङाला केबा रे आदाङ सुङ्स्ह्युबा हिन्ना ?’
‘हिन्ना कोला म्हिदा मुतेबा रेला ओतेबान महत्व ताला । खाजिबाइ तिरेकुनुदा महत्व पिन्सि स्यान्दो रेदा लेबा (व्हाला) आदे ।’ जेनिसला आपासे स्हिवा काइरि पाङ्जि ।
‘थेह्राङ हिन्साम ङाला केबा रेला काप्तोनरि ह्राङ ताङ आस्ह्यु ?’ जेनिससे ह्राङ्ला आपादा ङ्योइजि ।
‘तिदा आताङ्से ? ए केबासे मोक्कोन बिमा ताङ्बा ङानिन मुला । तासाइ बबु ! ए केबा रेरि जेक्खे ताङ्बा स्यान्दो रेरि एला वास्ता आलाबा लाबा हिन्साम तिनि ए चु नाछालरि तासेला ? एला न्हाबा, ख्वाबा, ग्युइसेर, दीक्षा थेन एला ज्याबा लिउला लागि म्हुनरे टु खाल्से ब्योङ्सेला ।’ जेनिसला आपासे पाङ्स्ह्युजि ।
‘खिम्जेसे ह्राङ्ला जाजामेला केबारे खाराङ्बा धुमधामसे दाङ्मुला । लोकाचारला लागि तासाइ नोन कोलाला केबारे धुमधामला छ्याम दाङ्तोला ।’ जेनिसला आमासे पाङ्स्ह्युजि ।
‘खिम्जेला ज्याबा स्हे जेक्खे किन्तोला । मोक्कोन स्हेला पे लाबा ज्याबा आहिन ।’ जेनिसला आपासे पाङ्जि ।
‘ह्राङ्से सुङ्बारि म्हाइबा ताम आगोनिले आपा ?’ जेनिससे अनभिज्ञता उन्जि ।
‘ङाइ बिबा खिम्जे मुगाइ व्हा स्यान्दो खालाइ थेन्ना ज्याबा स्हे जेक्खे पे लातोला । आज्याबा स्हे ख्लापिन्तोला बिबा ।’ जेनिसला आपासे पाङ्जि ।
‘ह्राङ्से सुङ्बारि म्हाइबा ल्हेङ्मो तिगा हिन्ना सोझो सोझो पाङ्स्ह्युगो ले ।’ जेनिसला आमासे ह्राङ्ला ह्रेम्बोदा मिक्युर्सिकेन पाङ्जि ।
‘खिम्जे खालाइ भ्रष्टाचारी मुसिम, अनैतिक तोसोसे धन सम्पत्ति पोप्बा मुसिम, खालाइ आडम्बरी थेन अन्धविश्वासी मुसिम, थेला लोप्बा लाला आदे । ह्याङ्ला खिम्जेरि ज्याबा म्हिजुगु नोन मुला । थेन्से लाबा ज्याबा गेला लोप्बा लातोला बिबा ।’ जेनिसला आपासे स्पष्टिकरण पिन्जि ।
‘तिल्दा कोल्डेङ्बा ताम लास्ह्युला ? न्होर खर्च लाबा सेम आरे थेतासि कोलाला केबा रे आदाङ सुङ्स्ह्युगोले ।’ जेनिसला आमासे छेर्सिकेन पाङ्स्ह्युजि ।
‘टु ब्योङ्सि चाबादा स्यान्दोदा उन्बारि थेन आतोबा खर्च लाबारि न्होर आता । एसे ठिक्कान पाङ्जि ।’ जेनिसला आपासे जाकि बोमो खाबाह्राङ लासि पाङ्स्ह्युजि ।
आपाला ताम थेसि जेनिस निराश ताजि । थेसे पाङ्जि, ‘आपा, रोहितला केबारेरि कादे ल्हाना रंगीचंगी मैन नाङ्साल म्राबा मुबा ? ह्रोजुगुदा फिह्युलग्याम बाबा केकेबा थेन तिगा तिगा बोलाबा मुबा ।’
‘रोहितला आपासे तिगा छोङ लाला एदा थाहा मुला ? थेह्राङ्बाला कोला ताबारि एसे गर्व लाला । ओम एसे बिबा मैन नाङ्साल म्राबातेन सेला । आहिन ? केबा रेरि नाङ्साल म्राबाका हिन्ना, सेसि दोप स्होबा ? थेतासि स्यान्दोला पे लाला आदे बिबा गोजि ?’ आपासे गोना लाजि । ‘चु नेपाली चलन आहिन बबु । चुम माङ्ग्यार ह्युलग्याम खाबा विकृति हिन्ना ।’
‘माङ्ग्यार ह्युलग्याम खाबा मुतेबा स्हे आज्याबा ताला ओम ?’ जेनिसला आमासे ह्रेम्बोदा मिक्युर्सिकेन पाङ्स्ह्युजि ।
‘ङाइ थेह्राङ बिबारि म्हाइबा खानाङ हिन्ना ओम ? छाबा बिमा खर्च ल्हाना लासि स्यान्दोदा उन्तोला बिबा चलनलाका लिब्रो लाबा मुला ।’ जेनिसला आपासे पाङ्स्ह्युजि ।
‘थेह्राङ हिन्साम ङाला केबारे खाराङ्लासि दाङ्से ?’ जेनिससे छेर्सिकेन ङ्योइजि ।
‘केबारे दाङ्तोलान बिबा तिगाइ आरे । दाङ्नोन तोसाम ल्हानानदा फाइदा ताबा थेन डान्बा नोन चिचिबा लासि दाङ्बाले ।’ जेनिसला आपासे सुङ्स्ह्युजि ।
‘तिगा लास्योम सुङ्स्ह्युगोम ?’ जेनिससे उत्सुक तासिकेन ङ्योइजि ।
‘ङाइ एला केबारे छार तोसोसे जेक्खे आहिन, वातावरण सोबा, आमदानी नोन ताबा हिसाबसे दाङ्बा विचार लाबा मुला ।’ जेनिसला आपासे सुङ्स्ह्युजि ।
‘खाराङ्लासि ?’ जेनिस थेन थेला आमा ङ्हिसेन अचम्म म्हान्सिकेन ङ्योइजि ।
‘ङाइ नर्सरीग्याम ल्होलो जातला रोरोला बेर्ना बाबा मुला । १२ लादोनान रोबा १२ तोसोला रोरोला कुया । ह्याङ्ला ख्राङ्गाला गाप्तारि थे गोरला रोरो बेर्ना सुला । थेसे ल्हानान दिङदोना जेनिसला केबारे डान्ना लासि थान्ना । बाह्रै ला रोरो चाबारि नोन याङ्ला । ओम पिङ्गाइसे वातावरण चाङ्मा थेन साल्बा नोन थान्ना ।’
‘आपाला ल्हेङ्मो ङादाम ज्याबान छोर्जि आमा । ह्राङ्दाचा खाराङ्बा छोर्जिले ।’ जेनिससे पाङ्जि ।
‘बुद्धिरि एला आपादा खाल्से डाबारि खाम्ला ले !’ जेनिसला आमासे उत्साहित तासिकेन पाङ्स्ह्युजि ।
ओम थेनिकादे तो, कुरि थेन खन्ति थोसि ख्राङ्गाला गाप्तारि रोरोला कुया सुबारि निजि ।
(छिगकि दोनः केबारे– जन्मदिन, लेबा/व्हाबा– हेला, स्हिवा– शान्त, ग्युइसेर– शिक्षा, लिउ– भविष्य, खिम्जे– छिमेकी, पे– नक्कल, मिक्युर्बा– आँखा तर्नु, छेर्बा– झर्कनु, फिह्युल– विदेश, छाबा– कमाइ/आमदानी, लिब्रो– बिरोध, तोसो– तरिका, कुया– बेर्ना, गोर– वटा, गाप्ता– डिल)
दोःबा : यकिना अगाध
तपाईको प्रतिक्रिया दिनुहोस