एला केबारेला ल्हानान ल्हानान ज्याबाम्हान्बा !

चेमो कोला ! एदा एला केबारेला ज्याबा दुइसाङरि छ्युलिङ ङिस क्याम्साङग्याम तिङ्हेन्से ज्याबा म्हान्बा !’

कोल्मे केवारि तिगाइ आम्लेबा थेन आसाइ क्षणजुगु ल्हानान ताला । थे गुङ्ला तिगाइ क्षणसेन केवादा ताङ्बासोक्खे स्होपिन्ना । थेह्राङ्बान ज्याबा क्षण गुङ्ला याखारगि मिति हिन्ना यान्दे १६ । थेकुनु ए ङाला केवाला रत्नला स्ह्रुगरि केबा मुबा ।

अबोध नाछालरि बाम्सिकेन ङ्हाच्छा वाङ्बा एला गिक्छा ओम एला तोते काइ तिनि नोन सेमरि ताजा मुला । थे रेसे पिन्बा काप्तोनतेन दाते नोन चेगाइ, डान्बा थेन ज्याबासेमजुगुला ओइरो ल्हागतिसि चिबान मुला । खासरि, एदा एला आमासे ह्राङ्ला तिङ्ला बोह्राङ्नोन ख्वाइसि छार्ना लाजि ओम ङाइ ङाला आटाङ्बा ह्रोसे थे ल्हामरि ह्रोपिन्सि खाजि । लेङ्बाम एलान ज्याबाकर्मसे तिनि एला माउलिक ङोसेबा पिन्बा मुला । थेरि सफल ताजिन्बासे दोसि नोन सेमहेन्से थुजेछे मुला, बबु !

ङान्छे सातान सेमलाबा ताम तिगा जेक्खे हिन्ना बिसाम ए ग्रेन आहिन, असल व्यक्ति दोगो । केवाला गिक्छा लोप्खाङरिन ङान्छे पिन्बा संस्कार थेन दृष्टिकोण एसे तिङरि थान्गो । जाम्बुलिङदा गोबा, ङोसेबा ताङरि खाइमाइ खालाइला मिरि चोट पारआतिबा पात्र दोबारि खाम्गो ।

बबु ! ए ङान्ना आशा थेन भरोसा हिन्ना । एला म्हेमे मामसे नोन एजा ल्हानान म्हाङ थोबा मुला । तिल्मा थेन्से ह्याङ्ला लिउला लागि संघर्ष लामाह्राङ तिनि ङानि नोन एला ह्यालह्याल्बा लिउला लागि छ्योङ्चिबा मुला । अभिभावकसे ह्राङ्ला सन्तानदा रमाइलो केवा पिन्बारि खाइमा ह्राङ्ला ताङ्बा ख्लाला, खाइमा थेलान लागि ताङ्बा म्हाइसिकेन थारेङदोना दोला । ङा नोन दाते थेनोन परिस्थितिग्यााम ब्राचिबा मुला ।

दिमथेमेला छ्याम चिसि मुबा ब्राछ्याम्बा चासि ज्याबा ङ्हुबाला अनुभव लाबा सेम ङादा नोन खानाङ आरेबा हिन्ना ले ! दुइसाङ बिसे व्हा कोन्ज्योसोमला ह्रो ल्हानानला सेमसे म्हान्बा ग्लारि दोबा दुइसाङ ओम दिमथेमेला मिरि ताङ्बा थेन ङेबा म्राङ्बा अभिलासा थेतेन छ्याम ङाला तान्बाला जेबा लिउला लागि छ्युलिङ ङिस क्याम्साङ दोसि दिमथेमेलान डान्बारि छिन म्याप्चिमुला । आशा मुला खाजिबाइ रे ङाला सेमसे म्हान्बा छ्योसेला मुला । चुदिङ एला केबारेरि एतेन ङोन्छाङ ताबारि आखाम्नि, तासाइ तिगा ताजि ले ! न्हाङ्गारला असंख्य केबारेजुगुरि ह्याङ चेगाइ थेन ताङ्बा देप्सिकेन छ्याम तेन्सेला मुला । एला आमा, म्हेमे माम थेन क्योङ दिमथेमेला चेगाइ थेन स्नेहसे एसे ङाला आडुप्बा छोर्बा किन्आतोबा थाहा याङ्मा सेम ताङ्ला । थेन्से एला मुतेबा क्रियाकलापदा ङाला बिजादुइ म्राङ्ला रो, थेसे ङादा नोन थारेङ मुना मुनान ङामरि मुबा छोर्ना लाला ।

कोला ! सातान डान्गो, केबारे दिङ जेक्खे ल्हेना लाबा रे आहिन, चुमि जिम्मेवारी थेन अनुभुति काप्बा क्षण हिन्ना । मुतेबा दिङतेन ए ग्युइ, नाखाम्बा, विनम्रता थेन सेमबाङरि नोन उन्नत ताचिउ । छार ताम लोप्को, असल ह्रो दोगो, मिहेनत लाउ थेन केवाला ग्यालामरि खालाइदा चोट ल्हागाब आलाबा ग्यालाम दाङ्गो ।

ङादा छोर्ला, छ्युलिङ ङिस क्याम्साङ ङाला संघर्ष म्होस्सिला आरे । मुतेबा आपाआमासे ह्राङ ङाइ नोन ह्राङ्ला म्हाङ्जुगु एलान मिरि थान्बा मुला । ए इमानदार, मिहेनती थेन असल तासि ङ्हाच्छा वाङ्मा थे म्हाङ काकार लासिकेन छ्योसि निसेला मुला ।

लिच्छारि दोसि तिरेम–
केवारि ग्रेन आहिन, असल म्हि दोगो बबु !
एला आमाला व्हानाग्याम–
केबारेला ल्हाना ल्हानान ज्याबाम्हान्बा !
२०८२ यान्दे १६ लानिरे

(छिगदोनः चेगाइ– माया, ज्याबाम्हान्बा– शुभकामना, चेमो– प्यारो, छ्युलिङ– समुद्र, कोल्मे– मानव, केवा– जीवन/जिन्दगी, आसाइ– अमुल्य, यान्दे– भदौ, स्ह्रुग– रुप, नाछाल– अवस्था, ओम– अनि, काप्तोन– उत्सव/उल्लास, ङोसेबा– पहिचान, लिउ– भविष्य, ङ्हुबा– निद्रा, तान्बा– सन्तान, ङोन्छाङ– प्रत्यक्ष, आडुप्बा– अभाव, म्होसि– बेकार, व्हाना– तर्फ, लानिरे– सोमबार)

दोःबा : यकिना अगाध